Read Kok Borok 1 HABUGRA 14 Bible Online

1 HABUGRA 14 - Kok Borok bible

1 HABUGRA 14

¹A jora-o bugra Jeroboamni bwsla Abia hamya klai kha.

²Jeroboam bihikno hai hwnwi sa kha, “Sakno sinijak ya tẃi khe rí-chum na di nono bugrani bihik hwnwi siniui man glak, ano nwng Israilni bugra chánai hwnwi sanai Silo-o tongnai diyari Ahiani thani tháng di.

³Nini logi-o auang lepchi tei kisa auang budul tei lotasa piya bwtwi tlang di, hakhe chini bwsani tamo wng kha bo nono sa anw.”

⁴Hakhe bo Silo-o Ahiani nogo tháng kha. Chakrasukma bai bo mokol nuk li ya;

⁵tamo khe Subraiyung Ahiano sa kha, Jeroboamni bihik bwslani kók sẃngna bagwi phai tongo, abo hamya klaijak. Subraiyung Ahiano tamo nangnai saui ton kha. Jeroboamni bihik aro sógwi kha, hakhe bo sinijak ya hai khe tong ti kha.

⁶Ahia bono duglamo sók phaima khna khe’-no bo hai hwnwi sa kha, “Hap phai di, ang si-o nwng Jeroboamni bihik. Tamo nwng bui hai khe sinijak man ya tẃi khe tong ba? Nini bagwi kók khna rwjaknai hamya kók tongo.

⁷Tháng di tei Jeroboamno saui di, omo Subraiyung Israilni Kaitor sa-o hwnwi bono saui di; ang bororokni bisingo nono ani Israil bororokni naikolphangni bagwi chongo.

⁸Ang Daudni bosongni yakni ha segwi naui nini yago rw-o. Tamo khe nwng ani seleng Daud hai wng ya, bo le ani kók khna súgo, ani dagimarokno khlai-o tei ang khlai di hwnmano simi se khlai-o.

⁹Nwng nini slái swkang habugra wngnairokni slái’-bo teibo kotor sumsok khlai kha. Nwng ano khibi kha tei nwng ano mwtai tagwi tei manwirok bai mwtai tagwi khulumui ano joli rw kha.

¹⁰Aboni bagwi ang nini bosongrokni saka-o urumuru phnangnai tei Israilni Jeroboam bosongni chwla bwsa tamo chwrai tamo kotor, khajak tei yókjak bebak’-no buthar bainai. Ang Jeroboamni núkhungno narwk glak; bórokno khi hai khe pái rw súgwi khibiui rohornai.

¹¹Nini núkhungni kamiyungo thwinairokno khe sẃi bai chájaknai tei haino auaro thwinairok khe toksa toktẃirok bai chájaknai hwnwi, ang Subraiyung sa-o.”

¹²Hakhe Ahia khúk thak yaui Jeroboamni bihikno hai hwnwi sa kha, “Tabuk nogo kiphilwi tháng di. Nwng nini kamiyungo thángwi sógwi khe’-no nwsla thwinai.

¹³Israilni bebak bororok bini bagwi kap anw tei bono phob anw. Bo simino Jeroboamni núkhungni kaham khe phobjaknai, tamni hwn ba Israilni Subraiyung Kaitor bono simi se hamjago.

¹⁴Phiya Subraiyung bini bagwi Israilni saka-o bugra khoroksano achuk rwnai; a salo’-no tei tabuk’-no,[17] bo Jeroboamni núkhungno swkagwi páinai!

¹⁵Subraiyung Israilrokno swpraknai, bo twisa-o buduk jangrijak tẃi jangrijaknai. Bo Israilni bororokno bini bosongrokno rwma ha kahamni phuichanai tei bórokno Uphratis twima lái rwui kobon kochok khlai rwnai. Tamni hwn ba bórok buphangni mwtai tagwi Subraiyungno joli rw kha.

¹⁶Jeroboamni sumsokrokni bagwi Subraiyung Israilno yakar sinai, tamni hwn ba bo Israil bororokno sumsok khlai rw kha.”

¹⁷Jeroboamni bihik bachaui nongkhorwi thángwi Tirja-o tháng kha. Bo bini nogo hap khe’-no a chwrai thwi kha,

¹⁸Subraiyung bini seleng diyari Ahiano sama tẃi’-no Israilni bororok bono phob kha tei bini bagwi kap lai kha.

¹⁹Jeroboam bebak samung khlai langmani kókrok, choba nang laimani kókrok tei bubo tẃi khe bororokno tẃither kha a kókrok Israilni bugrarokni bosongni láibumani bijabo swijak tongo.

²⁰Jeroboam nokha bisik nwichinwi bugra chá lang kha. Bo thwi kha tei phobjak kha, bini yagulo bwsla Nadab bugra chá kha.

²¹Solomonni bwsla Rehoboam ha Juda-o bugra chá kha. Aphuru bini umor wng nokha bisi brwichisa tei bo Jerusalemo bisichisni bugra chá kha, a kamiyungno’-no Subraiyung Israilni bebak amchoirokni bisingo bo baithang surijakna bagwi chongo. Rehoboamni buma wng kha Ammonjwk Nama.

²²Judaini bororok Subraiyungni thani sumsok khlai kha tei bórokni chuchusongni sláibo bórok teibo Subraiyungno joli rw kha.

²³Tamni hwn khe bórok hathái kuchukrogo háyá songcha kha, thonglarok, buphangni takjak mwtairok tei bebak buphang saklomrogo háyárok tang kha.

²⁴Tei a ha-o tongmung sitra tongnai chwlarok tei bwrwirok tong bai-o; buini tongthok rwna bagwi rw laima se. Subraiyung Israilrokni bwskangni normani tei dopharok bebak selengmasingcha, lachimasingcha tongmung tongnairok hai khe tong kha.

²⁵Rehoboam bugra chámani nokha bisik bani jora-o Ijipni bugra Sisak Jerusalemo choba bacha phai phuru omo wngo.

²⁶Tei bo Subraiyungni noktharni bebak rang rírok tei habugrani noyungni rangchak-ríchakrok tlangwi tháng bai kha. Bo Solomon rangchakni phui takmaroknobo tlangwi tháng bai kha.

²⁷Aboni yagulo bugra Rehoboam pitolni phuirok snam kha tei noyung duglam mwrwknai bokhorokrokni barja tẃinaino abórokno rw bai kha.

²⁸Hakhe noktharo bugra hap brúmno mwrwknairok a phuirokno tikhlaiwi tubu-o tei haino hai a mwrwkjak nogo daui tonwi phiro.

²⁹Habugra Rehoboam tang langma bebak samungrokni kók Judani habugrarokni bosongni láibuma bijabo swijak li ya diba?

³⁰A jora-o Rehoboam bai Jeroboam thwi yasakno choba nang laiwi máng tháng kha.

³¹Rehoboam thwi kha tei Daudni kamiyungo bini chuchusongni simalwngo phobjak kha bumani mung khe Nama, bo Ammonjwk. Hakhe bini yakchu-o bwsla Abia habugra chá kha.