Read Kok Borok 1 HABUGRA 15 Bible Online

1 HABUGRA 15 - Kok Borok bible

1 HABUGRA 15

¹Israilni habugra Nebatni bwsla Jeroboam habugra chámani nokha bisi chichar phuru, Abijam Judiani habugra chá-o,

²bo Jerusalemo nokha bisik tham bugra wngwi tẃither kha. Bini buma wng kha Abisalomni bwsajwk Maka.

³Bo bupha sumsokrok khlai langma hai’-no khlai kha; búchu Daudni bwkha hai khe bini bwkha Subraiyung Kaitorni thani sói khe tong li ya.

⁴Tamo khe Daudni bagwi se Subraiyung bini Kaitor chati kaisa rw kha, bini yakchu-o Jerusalemo bugra wngnani tei Jerusalemno kwrak khlaina bagwi bwsa chwla khoroksa rw kha.

⁵Tamni hwn khe, Daud Subraiyungni mokolo chajakma simi se khlai kha, bo thwi yasak’-no Kaitor bono dagima kókrokni ayang uyang wng li ya, sói Hitisa Uriano simi se dera rw si-o.

⁶Abia kwthang tong lang sak’-no Rehoboam bai Jeroboam choba nang lai máng ma tháng kha.

⁷Tabuk Abijam tang langma samungrokni kók tei bini samung tangmani kókrok ha Judani habugrarokni bosongni láibuma bijabo swijak li ya da wng kha ba? Abijam bai Jeroboam choba nang lai máng tháng kha.

⁸Abijam thwi kha tei Daudni kamiyungo bini chuchusongni simalwngo phobjak kha tei bini yakchu-o bwsla Asa habugra chá kha.

⁹Israilni bugra Jeroboam habugra chámani nokha bisik nwichi phuru, Asa habugra chá-o.

¹⁰Hakhe bo nokha bisik brwichisa Jerusalemo bugra chá kha. Bwchwi Maka wng kha Abisalomni bwsajwk.

¹¹Asa búchu Daud haino Subraiyung chajakma haino khlai kha.

¹²Bo bebak tongmung sitra tongnai chwla tei bwrwirokno hani tikhlai rwui rohor bai kha tei bini chuchusong takmani bebak mwtairokno norwi khibi bai kha.

¹³Bo bwchwi Makanobo Isirini buma wngmani nor kha, tamni hwn ba bo mai-khul ham rwnai mwtaijwk hwnjakmani Aserani mwtai tak kha; tei Asa a mwtai takjakno tanwi Kidron twisani harungo sók kha.

¹⁴Tamo khe bo hatháirokni háyárokno khe nor li ya hai phano bo thwi yasak’-no bini Subraiyungni kókno khnaui tháng kha.

¹⁵Bo Kaitorni thani yapharma manwirokno noktharo ton kha, abono karwibo bo sakbo rukphai tei rangchakrokni manwirokno yaphar kha.

¹⁶Judani bugra Asa bai Israilni bugra Basa bórok khoroknwi bugra cháui tong lai sakno choba nang lai máng tháng lai kha.

¹⁷Ha Israilni bugra Basa ha Judano kebengwi bacha kha tei ha Judani habugra Asani ha-o khoroksabo tháng phai khlaiwi man ya khlaina bagwi Ramano songcha kha.

¹⁸Hakhe Asa Subraiyungni nokni rangkhógo karwi klangjakma bebak rangchak tei rukphairok naui pái kha tei bini selengni yago yapharwi rw kha. Tei habugra Asa bórokno hai hwnwi saui Tabrimonni bwsla Benhadad tei bo wng kha Hejionni busuk, Damaskoso tongnai Siriyani habugra.

¹⁹“Phai di chini aphasong bai nwphasong yak baksa wng lai tẃi khe chwngbo haino yak baksa wng lai anw. O rukphai tei rangchakrok wng kha nini bagwi hili rohorma se. Hakhe nwng tabuk, Israilni bugra Basa bai halok kak si di, hakhe bo bini sengkrakno ani hani rosaui ma tlangnai.”

²⁰Bugra Benhadad Asa kók rohormano narwk kha, hakhe bo bini sengkrak bokhorokno dagiui rohor kha, Israilni kamiyungrogo sengkrakrokno tẃiwi habwi si di. Hakhe bórok Ijon, Dan, Abel-bet-maka, bebak Chinerotno tei Naptalini bebak amchoino na bai kha.

²¹Bugra Basa a kókno khna kheno bo Ramano songchama mwthak kha tei Tirja’-ono tong kha.

²²Bugra Asa ha Juda gwnangwi kók sakhlaiwi rw kha; bebakno phai bai di khoroksabo karjagwi man glak. Hakhe bórok holongrok tei buphangrok Ramani a Basa-o tangna bagwi samungo thepama a holongrok tei buphangrokno tlangwi tháng kha; a manwirok bai’-no Asa Mijpa tei Gebano tisa kha, abo wng kha Benjaminni amchoini kamiyung.

²³Asa khlaima bebak samungrokni kókrok, bini phanni kókrok, bo tangma bebak samungni kókrok tei bo songchama kamiyungrokni kókrok, bebakno ha Judani habugrarokni bosongni bijap láibuma-o swijak kwrwi diba? Tamo khe bo chakra wng phuru yakung man ya bemuk bai manjak lang kha.

²⁴Asa thwi kha tei Daudni kamiyung bugrarokni mangkhorrok bai baksa’-no bo phobjak kha. Hakhe bini yakchu-o bwsla Jihosapat bugra chá kha.

²⁵Judani bugra Asa habugra cháma nokha bisik nwini jora-o bugra Jeroboamni bwsla Nadab ha Israilni bugra chá-o tei bo nokha bisik nwi bugra chá kha.

²⁶Bini slái swkang bupha Subraiyungni thani sumsok khlaima haino tei bupha tong langma hai kheno tong kha tei Subraiyungni mokolo bo’-bo sumsok khlai kha tei abo bai’-no Israilno sumsogo khiklai kha.

²⁷Hakhe Isakar bosongni, Ahiani bwsla Basa, bono kebengwi hamya kók chap kha; tei Basa bono Gibethono buthar kha, abo wng kha Philistiasarokni ha; tei bini sengkrakrok Philistiani Gibeonni kamiyungno yago chop kha.

²⁸O wngmani khe ha Judani habugra Asa bugra chámani bisik thamni jora-o se wngo. Hakhe Nadabni yakchu-o Basa bugra chá kha.

²⁹Bo habugra chá khe’-no habugra Jeroboamni núkhungni bebaknono buthar bai kha, Subraiyung bini seleng Silo-o tongnai diyari Ahiani khúk tẃi sama tẃi’-no Jeroboamni núkhungni khoroksa kwrwi tẃi buthar bai kha.

³⁰Mo wngma khe Jeroboam sumsokrok khlaimani bagwi tei bo abo bai Israilno sumsogo khiklai kha, phiya bini khá tholma bai Israilni Subraiyung Kaitorno joli rwmani bagwi se omo wngo.

³¹Tabuk Nadab khlaimani bebak samungrokni kókrokno Israilni bugrarokni bosongni bijabo swijak kwrwi diba?

³²Ha Judani habugra Asa bai Israilni habugra Basa bórok kwthang tong laisak’-no thak yaui choba nang lai máng tháng kha.

³³Judani habugra Asa bugra chámani nokha bisik thamni jora-o, Ahiani bwsla Basa Israilni bugra chá-o, bo Tirja-o nokha bisik brwichinwi bugra chá kha.

³⁴Bo Subraiyungni thani sumsok khlai kha tei Jeroboam tong langma hai kheno tong kha, bini sumsok bai khe bo Israilrokno sumsogo khiklai kha.