Read Kok Borok 1 HABUGRA 16 Bible Online

1 HABUGRA 16 - Kok Borok bible

1 HABUGRA 16

¹Subraiyung Hananni bwsla Jehu diyarino Basani bagwi hai hwnwi kók sa kha;

²“Nwng swkango mungsa buya tongmani se, tamo khe ang se nono ani borok Israilrokni tẃiphang snamo. Phiya nwng tabuk Jeroboam haino sumsok khlai khua tei ani Israil bororoknobo sumsogo khiklai kha. Bórokni sumsok bai ano joli rw kha,

³nai di, ang Basano rosaui tlangnai tei bini núkhungni bebak’-no tlangwi páinai; tei nini núkhungno ang Nebatni bwsla Jeroboamno khlai tẃi’-no nini núkhungno khlainai.

⁴Basanni borok khoroksa swk kamiyungo thwi khe bono sẃirok cháui páinai tei hapharo thwinaino khe toksa toktẃirok cháui páinai.”

⁵Tabuk Basa tang langma tei bini samungni kókrok tei bini phanni kókrok, Israilni bugrarokni bosongni bijabo swijak ya diba?

⁶Basa thwi kha tei Tirja-o bini chuchusongni simalwngno phobjak kha. Hakhe bini yakchu-o bwsla Ela bugra chá kha.

⁷Subraiyungni kók, Basa tei bini núkhungni bagwi Hananini bwsla Jehu diyarini khúk tẃi sa kha, abo Subraiyungni thani Basa tei bini núkhung kebengwi sa kha, tamni hwn khe bo Subraiyungni mokolo bebak samung hamya tangmarok tei bini yak baithang tangma samungrok Subraiyungno joli rw kha, bo bugra Jeroboam hai samung hamya tang kha tei bo Jeroboamni núkhungnobo sokomor kha.

⁸Judani bugra Asa habugra chámani nokha bisik nwichidok phuru Basani bwsla Ela Israilni bugra chá kha tei bo Tirja-o nokha bisik nwi bugra chá kha.

⁹Habugrani korai malkhung bodol khaksani tẃiphang Simri bini bagwi hamya chap kha, salsa bo Tirja-o noyungni barja Arjani nogo nungwi phek kha.

¹⁰Simri nogo habwi bono butharwi pái kha tei bini yakchu-o bugra chá kha. Omo wng kha Juda-o Asa bugra cháui tongmani nokha bisik nwichisni phuru wngo.

¹¹Aboni ulo khe bo bugra chána cheng khe tei bini achukthayungo achuk khe’-no bo Basani nokni bebak butharwi pái kha; bo khoroksa chwlano phano kwthang narwk li ya, bini sandairokno eba bini kichingsongni berebo khoroksano phano kwthang narwk li ya.

¹²Subraiyung Jehu diyarini khúk tẃi Basani bagwi sama tẃi’-no, Simri Basani núkhungni bebakno’-no buthar kha.

¹³Tamni hwn khe Basa tei bwsla Ela sumsok khlaimani bai Israilno sumsok khlai rw kha tei samung nang ya takjak mwtairok bai khe bórok Israilno sumsogo khiklaima bai bórok Subraiyung Israilni Kaitorno joli rw kha.

¹⁴Ela khlai langmani bebak samungni kókrok, Israilni bugrarokni kothoma-o swijak tongo.

¹⁵Judani bugra Asa bugra chámani nokha bisik nwichi phuru Simri Tirja-o tongwi Israilo nokha salsni bugra chá kha. Israilni sengkrak bodol Philistiani kamiyung Gibethonni samo batham kha lai kha.

¹⁶Bórok Simrino kók chabo hwnwi tei bono butharma kókrok khna khe’-no, bórok bebakno a bathamo’-no sengkrak bokhorok Omrino bebak ha Israilni bugra hwnwi sakhlai kha.

¹⁷Hakhe Omri tei bini sengkrak bodolrok Gibethon yakarwi Tirjano khobwi ton lai kha.

¹⁸Simri nuk kha kamiyung báijak, hakhe bugrani noyung bisingo habwi katima khotolrogo tháng kha. Noyungo hór phnangwi rw kha tei khamwi thwi bai kha.

¹⁹Omo wng khe bo Subraiyungni thani sumsok khlaima bai se. Jeroboam khlaima haino bo sumsok khlai kha tei bini sumsokrok bai bo Israilno sumsogo khiklai kha.

²⁰Tabuk Simri khlaima bebak samungni kókrok tei bo hamya chapmani kókrokbo Israilni bugrarokni bosong bijabo swijak ya diba?

²¹Hakhe Israilni bororok khaknwi khe kak lai kha; bórokni bisingo baksa khe Ginatni bwsla Tibnino bugra chá rwna nai lai kha tei baksa khe Omrino hamjago.

²²Tamo khe Omrini bodolrok Ginatni sajla Tibnino mechen kha; hakhe Tibni thwi kha tei Omri habugra chá kha.

²³Hakhe ha Judani habugra Asa bugra chámani nokha bisi thamchisa-o, Omri Israilni bugra chá kha tei bo nokha bisi chinwi bugra chá kha. Yaphangni bisidok khe bo Tirja-o bugra chá kha

²⁴tei ulo khe bo Semer hwnwi borok khoroksani thani dul doksai rangchak budul rwui Samariani hatháino paiwi na kha. Omri a hatháino songcha kha aro kamiyung khungsa tisa kha tei abono swkangni a bugrani mung Semerni mungno rwksaui Samaria hwnwi mung phar kha.

²⁵Omri Subraiyungni bwskango samung hamya khlai kha tei bini slái swkang tongnairokni slái teibo hamya khlai kuk kha.

²⁶Bo’-bo Nebatni bwsla Jeroboam khlai tẃi’-no khlai kha tei bini sumsok bai khe bo Israilni bororokno sumsok khlai rw kha, bórokni takjak mwtairok bai Subraiyung Kaitorno joli rw kha.

²⁷Tabuk Omri khlai langma bebak samungni kókrok tei bini phanni kókrok Israilni bugrarokni bosongni bijabo swijak li ya diba?

²⁸Ha khe Omri thwi kha tei Samaria-o buphasong phobjak thani phobjak kha. Bini yakchu-o bwsla Ahab habugra chá kha.

²⁹Asa Juda-o habugra chámani nokha bisik thamchicharni jora-o Ahabni bwsla Omri Israilni habugra chá-o; tei bo Samaria-o nokha bisik nwichinwi Samaria-o habugra chá kha.

³⁰Hakhe Omrini bwsla Ahab bini slái swkang tong langnairokni slái’-bo Subraiyungni thani sumsok khlai kuk kha.

³¹Hakhe bo abono helengsasa hai khe naui Nebatni bwsla Jeroboam khlaima hai sumsok khlai kha, bo Sidonni habugra Ethbalni bwsajwk Jesebelno káijak kha phiya Balno mwtaino mon kha tei khulum kha.

³²Bo Samaria-o Balni bagwi surina nok khungsa tang kha tei bini bagwi háyá tang kha tei abono a surima nogo ton kha.

³³Bo mwtaijwk Aserani takjak mwtainobo ton kha. Bo bini slái swkang Israilni tei bini swkangni habugrokni slái phano hamya samung khlaiwi Subraiyung Israilni Kaitorno joli rw kha.

³⁴Bini jora’-ono Bethelni Hiel Jerikono tisa kha. Subraiyung Nunni bwsla Josuani khúk tẃi sama hai khe’-no bo bwsla okra Abiramni langmano rwui thongla kái kha tei bwsla kusu Segubni langmano rwui duglam snam kha.