Read Kok Borok 1 HABUGRA 17 Bible Online

1 HABUGRA 17 - Kok Borok bible

1 HABUGRA 17

¹Giliadni Tisbi-o Elia hwnwi diyari khoroksa tongo, bo bugra Ahabno hai hwnwi sa kha, “Ang surima Israilni kwthang Kaitor Subraiyungni mungwi, ang nono sa-o, phainai nokha bisik nwi eba bisik thamni bisingo siyari eba uatwi ang sa ya sak klai glak.”

²Hakhe Subraiyung Eliano hai hwnwi sa kha,

³“Oroni kutulwi tháng di, salkabai bwkhak thángwi Cherit twisa gana-o khe huijagwi di, abo Jordanni twi-o thángwi klai-o.

⁴A twisa nono nungjaknai twi rw anw tei ang tokha bororokno nono chámung tunna bagwi dagi kha.”

⁵Hakhe Elia Subraiyungni kók khna kha tei thángwi Cherit twisa gana-o tongwi kha, abo Jordanni salka bwkhago.

⁶Bo a twisani twi nung kha tei phung brúmno tei sarik brúmno tokha bororok bini bagwi auang tei muihan rw phai kha.

⁷Tamo khe sal kisa lái khe’-no uatwi phai yani bagwi a twisa ranwi tháng kha.

⁸Aphuru Subraiyung Eliano sa kha,

⁹“Hakhe tabuk Sidonni gana-o Sarepat kamiyungo tháng di tei aro tongwi di. Ang aro tongnai randijwkma khoroksano nono chá rwna bagwi dagi kha.”

¹⁰Hakhe Elia Sarepato tháng kha, bo a kamiyungni dugar kotor gana-o sógwi khe’-no, bo randijwk khoroksano bol thumwi tongma nugwi kha. “Ano kisa twi nungjaknai rw phai gra di,” hwnwi bo a randijwkmano sa kha.

¹¹Bo twi naharna hwnwi tháng kha, bo bono ringhor phirwi hai hwnwi sa kha, “Kisa auangbo ani bagwi tubu ja di.”

¹²A randijwkma hai hwnwi sa kha, “Ang nini Subraiyung Kaitorni mungwi swmai tangwi sa-o, ani nogo chána mai khopsabo kwrwi, twgo moida mochomsa tei olib thok thopsa’-no tong si-o. Ang oro phaima khe kisa bol tlangwi moida kisano serwi angsla bai chá anw hwnwi se. Abono chini páithakni chámung wngnai tei ani sajla bai ang thwinai.”

¹³Elia bono hai hwnwi sa kha, “Ta kiri di; tháng di, thángwi nwng sama hai khlai di; tamo khe auang lepsa bwsate khe snamwi ano rw phai gra di, aboni ulo khe nini bagwi tei nwslani bagwi snam di.

¹⁴Subraiyung, Israilni Kaitor hai hwnwi sa-o, ‘Subraiyung ha-o uatwi rohor ya sak a moidani twkbo bukcha wng glak tei a thok sisibo ran glak.’ ”

¹⁵A randijwk diyari Elia bono sama tẃi’-no thángwi khlai kha tei sal kwbángmani bagwino bórokni chámung thwgwi se bára tong kha.

¹⁶Eliani bising tẃi Subraiyung kók rwma tẃi’-no, a twk bukchabo wng li ya tei a thok tongma ran li ya.

¹⁷Sal kisa ulo kheno a randijwkni bwsla hamya klai kha; bo teibo hamya bari kha, ulo khe bo thwi kha.

¹⁸Bo Eliano hai hwnwi sa kha, “O Kaitorni borok, nwng ano tamo khlai lang? Nwng ba oro tamo. Kaitorno ani sumsokrokno muitu khlaiwi rwna tei ani angslano thwi rwna da phai lang?”

¹⁹“Nwslano ano rw di,” hwnwi Elia sa kha. Bo a chwraino randijwkmani yakni na kha tei bo tongmani a kuchukni khotolo tlangwi bono thuyamo mokholwi rwui kha.

²⁰Hakhe bo sotonwi hai hwnwi suri kha, “O Subraiyung ani Kaitor, nwng tamo wngwi o randijwkno omo hai khairokmasingcha samung khlai lang? Bo ano naina nukna bagwi bwswk se khairokma kupulung, tabuk nwng bwslano buthar kha hai da?”

²¹Hakhe Elia a chwraini saka-o uáitham botok wngwi hai hwnwi suri kha, “O Subraiyung ani Kaitor, o chwraino mwthang ja phi di!”

²²Subraiyung Eliani surimano khna kha; a chwrai haino hai rangma socha kha tei kwthang wng phi kha.

²³Elia kuchukni khotolni tubu-ui a chwraino hani khotolo bumani aro tlangwi tháng kha tei hai hwnwi sa kha, “Naisik di, nwsla tháng phi kha!”

²⁴A randijwk Eliano hai hwnwi sa kha, “Tabuk ang saui man kha nwng Kaitorni borokno tei sóino Subraiyung nini khúk tẃi kók sa-o.”