Read Kok Borok 1 HABUGRA 18 Bible Online

1 HABUGRA 18 - Kok Borok bible

1 HABUGRA 18

¹Sal kisa lái khe, uatwi phai ya wngmani nokha bisik thamni jora-o, Subraiyung Eliano hai hwnwi sa kha, “Tháng di nwng bugra Ahab bai nukjagwi di tei ang uatwi rohornai.”

²Hakhe Elia Ahab bai malaina tháng kha. A jora Samaria-o belai khe chacharara nangwi tongo,

³hakhe Ahab noyungni barja bokjak Obadiano ring kha, (Obadia wng kha Subraiyungno khá rwui surinai khoroksa,

⁴Jesebel Subraiyungni diyarirokno butharwi tong phuru, Obadia bórokni bisingo khorok sara diyarirokno naui hakhoro bachi-bachi khe huiwi tonwi kha tei bórokno chána nungna rw kha.)

⁵Ahab Obadiano hai hwnwi sa kha, “Phai di tháng lai anw tei bebak twimuk tei twima rukungrogo kisa jabra kwthang da manno, korai bai koraichirkarokno simi phano mwthangwi da manno. Hakhe chwng chini mal-matarokno masabo butharna nang glak.”

⁶Bórok khoroknwi sabo biyang thángnai bak lai kha, khoroksa yang tei khoroksa uyang khe tháng lai kha.

⁷Obadia lama-o himwi tong phuru, bo achomsa Elia bai malai kha. Bo bono sini kha tei bokhorok bomwi khulum kha tei “Nwng kubui’-no bo’-no wngna bla?” hwnwi sẃng kha.

⁸Hakhe bo bono hai hwnwi sa kha, “I’n omo ang’-no, nini bugrano ‘Iko Elia oro se’ hwnwi saui di.”

⁹Obadia hai hwnwi sa kha, “Ang tamo khlai lang ba nwng ano tong khochoro khiklai, bugra Ahab bai butharjaknai?

¹⁰Kwthang Subraiyung nini Kaitorni mungwi sa-o, bugra nono ha gwnangwi’-no naituk rw kha. A habugrarok bini ha-o nono kwrwi hwnwi sa kha, Ahab a hani tẃiphangrokno nono man li ya hwnwi swmai tangwi ma sa rw anw.

¹¹Tei tabuk nwng khe, nwng oro se hwnwi ano sa rwna nai-o hai da?

¹²Ang oroni kutul khe’-no Subraiyungni phola nono tlangwi tháng khe le? Hakhe, ang Ahabno nono oro se hwnwi saui, bo nono oro nuk phai ya hwn khe, bo ano butharnai. Muitu narwk di ang chwraini simi’-no khá bai Subraiyungno surinai borok.

¹³Jesebel Subraiyungni diyarirokno buthar phuru ang bórokni bisingo khorok sarano, khorok bachi-bachi khe hakhoro huiwi ton kha tei bórokno chámung nungmung rohor kha, abono nwng khna ya diba?

¹⁴Hakhe bahai khe nwng ano bugrano thángwi nono oro se hwnwi sa di hwnwi dagi ba? Bo ano buthar anw!”

¹⁵Elia hai hwnwi sa kha, “Ang kwplaisa Subraiyungni mungwi sa-o, tini’-no ang bugrani thani nukjagwinai.”

¹⁶Hakhe Obadia bugra Ahabni thani thángwi sa kha, hakhe Ahab Elia bai malaina tháng kha.

¹⁷Ahab bono nuk khe’-no hai hwnwi sa kha, “Nwng orono hai da, Israilo urumuru phnangnaisa?”

¹⁸Elia hai hwnwi sa kha, “Ang Israilo urumuru phnangnai ya; tamo khe nwng se tei nwphani nokni bororok se Subraiyungni dagimarokno khna yaui Bal mwtaino khulumo.

¹⁹Tabuk Israilni bebak bororokno ang bai Karmel hathái-o malaina bagwi sa di. Bórok bai baksa khorok 450 Balni diyarirokno tei Isiri Jesebel bai chubajak khorok 400 mwtai Aserani diyariroknobo tubu di.”

²⁰Hakhe bebak Israilrokno tei Balni diyarirok hathái Karmelo kuthumna bagwi dagi kha.

²¹Elia lukurokni thani thángwi hai hwnwi sa kha, “Norokni kháno kwrak khe snamnani tei bwswk lerna nangnai kho? Subraiyungno Kaitor hwn khe bono’-no suri di! Phiya Balno hwn khe bono suri di, hai phano lukurok kók tháisa phano pung li ya.

²²Hakhe Elia sa kha, ang simi se Subraiyungni diyari tong si-o tamo khe oro khorok 450 Balni diyari tongo.

²³Aboni bagwi tabuk musuk maknwi tubu di tei musuk masa chwla bórokni bagwi chong thung, abono bophon bophon khe kwragwi bol saka-o bera thung tamo khe hór le ta rw di. Tei masa musuk chwlano angbo haino bol saka-o beranai tamo khe hór le rw glak.

²⁴Hakhe Balni diyarirok bórokni mwtai Balno suri thung tei angbo Subraiyungni thani surinai tei hór rohorwi surima khnanai bo’-no kubui Kaitor wngnai.” Lukurok kubuino nainani bagwi lon lai kha.

²⁵Hakhe Elia Balni diyarirokno hai hwnwi sa kha, “Norok oro kwbángmaba norok’-no swkang musuk chwla naui tiyar khlai gra di. Norokni mwtaini thani suri di, tamo khe bol saka-o hór le ta phnang di.”

²⁶Bórok a musuk chwla tubumano na kha tei abono tiyar khlai kha, phiya phung aini simi sal dibor jora Bal mwtaini mung khu-ui hai hwnwi suri lai kha, “O Bal chini ringmano khna ja di!” Phiya mungsa khorang phano khna li ya, kebo sabo sakhlai li ya. Hakhe bórok snam laimani a háyáno kitingwi bagrum lai kha.

²⁷Diboro hwn khe’-no Elia bórokno hai hwnwi saui mwnwina cheng kha, “Sotonwi suri lai di! Bal mwtaino! bo thu-ui se muktrwi thángwi imang nugwi tong khna, eba lenglaui tong khna, eba khe beraina tháng khna! Wng ya kheba bo muktrwi thángwi tong khna, norok bono sochana nangnai.”

²⁸Hakhe diyarirok sotonwi chirigwi suri lai kha tei bórokni raida tongmani tẃi thẃi chersaui phai ya sak busu bai tei sengsa bai sak-sakno ra lai kha.

²⁹Sal thángwi sarik wng kha bórok kók mwtai sa laima thak li ya bagrummabo thak lai li ya; hai phano mungsa kók sajak li ya, kók tháisabo khna rwjak li ya.

³⁰Hakhe Elia lukurokno hai hwnwi sa kha, “Ani gana-o phai bai di,” tei bebakno bono kuthum lai kha. Bo Subraiyungni a báijak háyáno nor bai kha.

³¹Elia tháichiknwi holongthai na kha, bosong chiknwini mungno rwgwi bo abo na-o, abórok wng kha Jakobni bwsarokni mungwi bono’-no Subraiyung Israil hwnwi mung pharmani.

³²Bo a holongrok bai khe Subraiyungni háyá tang kha tei abo kitingwi hakhor khur kha, abo litar chibrwi twi chak anw.

³³Hakhe bo háyá-o bol bera kha tei a musuk chwlano kwragwi bophon bophon khlai kha tei a bol saka-o bera kha. Bo hai hwnwi sa kha, “Gola tháibrwi twi supungwi abono a yaphar thani tei bol saka-o lukhlaiwi rw di,” hakhe bórokbo abo haino khlai lai kha.

³⁴Hakhe bo hai hwnwi sa kha, “Haino hai khlai phi di tei bórokbo khlai lai kha.” Tei uáisa khlai phi di hwnwi bo sa kha tei bórokbo khlai kha.

³⁵Twi háyáni yang yang kochok bai kha tei a hakhorbo pung kha.

³⁶Sarikni ratharwi yapharma jora-o khe diyari Elia háyá-o tháng kha tei hai hwnwi suri kha, “O Subraiyung Abrahamni Kaitor, Isak tei Jakobni Kaitor nwngno Israilni Kaitor tei angbo nini seleng phunuk si di tei ang nwng dagima tẃi’-no khlai kha.

³⁷Ano kók sa di, Subraiyung hakhe bui saui man anw nwng se Subraiyung Kaitor tei nwng se bórokni kháno kiphil rwui tono.”

³⁸Subraiyung hór rohor khlai kha tei abo a yapharmano kham rwui pái kha, bolrok, a holongrok tei harok khampra bai kha, hakhorni twirok ranwi ma tháng bai kha.

³⁹Lukurok abono nuk khe’-no, bórok ha-o botok khe goirok laiwi hai hwnwi sa lai kha, “Subraiyung Kaitor; Subraiyung simi se Kaitor!”

⁴⁰Elia Balni diyarirokno rom bai di hwnwi dagi kha; khoroksano phano ta phiyók di! Lukurok bórok bebakno’-no rom bai kha, hakhe Elia bórokno kháma bwkhak Kison twima phaising tlang thángwi buthar bai kha.

⁴¹Hakhe Elia bugra Ahabno hai hwnwi sa kha, “Tabuk tháng si di tei cháui nungwi si di. Ang uatwi phaima khorang khnaui tongo.”

⁴²Ahab chána nungna hwnwi tháng khe’-no Elia Karmel hathái-o kasaui tháng kha, bo aro bomwi suri kha, bini bokhorok aphuru bini yáskú kongnwini kwcharo,

⁴³bo bini selengrokno hai hwnwi sa kha, “Tháng di tei twijlang bwkhak nahar di.” A seleng thángwi kiphilwi hai hwnwi sa phai kha, “Ang mungsa phano nuk ya.” Elia bono abo hai khe uáisni thángwi nai di hwnwi dagi kha.

⁴⁴Uáisni phuru bo kiphilwi hai hwnwi sa phai kha, “Ang chumui kisicha nuk kha, yaphani slái se tor glak twijlangni kasaui phai-o.” Elia bini selengno hai hwnwi dagi kha, “Tháng di bugra Ahabni thani tei bono saui di dakti bini koraini malkhungo kasaui nogo tháng thung, wng ya khe uatwi bai lama kasujaknai se.”

⁴⁵Srapsa tong kheno chumui kosom bai khe koboljak kha, nokbar sibchana cheng kha tei uatwi bwthái kotor klaina cheng kha. Ahab bini korai malkhungo kasaui Jejrilo thángna lam rw kha.

⁴⁶Eliani saka-o Subraiyungni suar phaiwi sók phai kha; bo bini ríno bwchango kwrak khe kha kha tei Ahabni slái swkang Jejrilo khachigwi tháng kha.