Read Kok Borok 1 HABUGRA 19 Bible Online

1 HABUGRA 19 - Kok Borok bible

1 HABUGRA 19

¹Bugra Ahab bini bihik Jesebelno Elia khlaima a samungrokni kókno tei Balni bebak diyarirokno bahai khe seng bai tanwi butharwi pái kha saui khna rw kha.

²Jesebel Eliano hai hwnwi kók kwchárwi rohor kha, “Ang nono khwna o jora’-ono nwng diyarirokno butharmani hai khe’-no nono buthar ya hwn khe mwtairok ano buthar thung.”

³Elia omo hai nuk khe’-no kirijak kha tei bo thangna bagwi khár kha; bo ha Judani Birseba-o tháng kha tei bini selengno aro’-no klangwi tháng kha.

⁴Tamo khe bo sakphang khe sapung himwi hasing panthor tẃi khe tháng kha tei buphang phangsani saklomo khe achugwi kha tei thwi si thung hwnwi hai hwnwi suriui sa kha, “Wng kha tei nang li ya! Subraiyung tabuk ano tlang si di, angbo ani chuchusongni slái kaham ya!”

⁵Hakhe bo buphang saklomo rokoui muktrwi tháng kha tei achomsa suari khoroksa phaiwi bono tangwi hai hwnwi sa phai kha, “Bacha di tei chá di.”

⁶Hakhe bo ayang-uyang naisik kha tei nuk kha bokhorok gana-o auan lepsa tei twini khuri tháisa berajak. Bo chá kha tei nung kha tei hai’-no hai roko phi kha.

⁷Subraiyungni suari haino hai phaiwi bono sak tangwi hai hwnwi sa phai kha, “Bacha di tei chá di, wng ya khe nwng lama himna bagwi belai’-no wngjaknai.”

⁸Hakhe bo bacha kha tei chá kha nung kha; tei a chámungno cháui bo nokha sal brwichi hor-sal himwi Kaitorni hathái Horeb jora tháng kha.

⁹Aro sógwi khe bo horo tongna bagwi hakhor kaisa-o tháng kha tei aro’-no horsa tong kha. Achomsa Subraiyung bono hai hwnwi sa kha, “Elia nwng oro tamo khlaiwi tong?”

¹⁰Hakhe bo hai hwnwi sa kha, “Subraiyung kwplaisa Kaitor, ang nini bagwi bwswk se bwkha nangjak; hai phano Israilni bororok nwng bai swmai narwk li ya, nini háyárok swbai kha tei nini diyarirokno seng bai tanwi buthar bai kha. Ang simi se tong rwk si-o tei bórok ano butharna nai tong lai kha.”

¹¹Bo hai hwnwi sa kha, “Ongkhorwi hathái saka thángwi Subraiyungni bwskango bachaui di.” Aphuru Subraiyung ayang tẃi khe thángwi tongmani tei bini bwskang tẃi nokbar kotor hatháirokno khaknwi khe phekok kha tei holongthairokno swbaiwi phondrik-phandrak khlai kha, phiya ba a nokbaro Subraiyung kwrwi; a nokbar kotorni yagulo khe bangla kotor phai kha, phiya ba Subraiyung arobo kwrwi.

¹²Bangla thak khe’-no hór phai kha, tamo khe a hórobo Subraiyung kwrwi; hórni ulo khe, serek-serek khe khorang hai khna kha.

¹³Abono khna khe’-no Elia bini rí bai khe mwkhang kholobwi ongkhorwi hakhorni duglamo bachaui kha. Aphuru khe khorang kaisa bono hai hwnwi sa kha, “Elia nwng oro tamo khlaiwi tong?”

¹⁴Hakhe bo hai hwnwi sa kha, “Ang Sengkrakrokni Subraiyung Kaitorni bagwi bwswk bwkha rwjak; tamo khe Israil bororok bórok nwng bai swmai tangmano swbai kha, nini háyárokno swbai kha tei nini bebak diyarirokno seng bai tanwi buthar bai kha. Ang simi se karjak si-o; tei anobo butharna bagwi nai lai kha.”

¹⁵Hakhe Subraiyung bono hai hwnwi sa kha, “Tháng di Damaskosni haphar bukcha-o tháng di; tei nwng aro sógwi khe Hajaelno Siriyani habugra chong di.

¹⁶Tei nwng Nimsini bwsla Jehuno Israilni bugra chong di tei Abel-meholani Saphatni bwsla Elisano nini yakchu-o diyari chong di.

¹⁷Omo hai wngnai Hajaelni sengni yók khe Jehu bai butharjaknai; tei Jehuni yakni yóknaino khe Elisa butharnai.

¹⁸Hai phano ang Israilrokni bisingni’-no ani kók narwknairok tei Bal mwtairokno khulum ya tei takjak mwtairokno motom su ya abo hai khorok snisai Israilno kwthang narwknai.”

¹⁹Hakhe bo aroni kutulwi tháng kha tei Saphatni bwsla Elisano bojro jor chinwi musukrok bai khe al rwui tongma nugwi kha; bo khe bini bwskangni jor chisani uklokni jor chi nwirok bai khe al rwui tongo. Hakhe Elia bini gana tẃi láiwi tháng kha tei bini dulaino naui Elisani saka-o phinwi rw kha.

²⁰Hakhe Elisa bini musukrokno yakarwi Eliani uklogo khachigwi tháng kha tei hai hwnwi sa kha, “Ani ama bai aphano páithakni bagwi motom su-ui phai grana, hakhe ang nwng bai baksa thángnai.” Elia hai hwnwi sa kha, “Au, kiphilwi tháng di, ang nono kasu ya!”

²¹Hakhe Elisa bini aroni kiphil kha tei musuk jorsa na kha tei abórokno rathar kha tei aboni horbakrokno khe bol snamwi bahanno ruk kha tei bororokno rw khe bórok chá lai kha. Hakhe bachaui thángwi Eliano rwktharwi tháng kha tei bini seleng wngwi kha.