Read Kok Borok 1 HABUGRA 2 Bible Online

1 HABUGRA 2 - Kok Borok bible

1 HABUGRA 2

¹Daud thwinani kasu khe, bo bwsla Solomonno barja yapharwi sa kha,

²“ani thwina jora sók phai kha, aboni bagwi bwkha rak di tei chwlaba chwla hai’-no wng di,

³tei nini Subraiyung Kaitor naima hai khe’-no khlai di, bini lamarok tẃi him di, bini kerongni bebakno tei bini dagimarokno khnanani, bini bujsóino tẃinani, bini kókno sajaknairokno sanani bagwi Musini kerongo swijak tongma tẃi’-no khlai di, hakhe nwng tangma bebak samungo’-no tei thángma’-ono hamchanai.

⁴Aphuru khe Subraiyung bini swmai tangmano narwgwi manna bagwi hai hwnwi sanai, ‘Tumungno nini bosongrok bahai khe tong lai kaichom lai khe tei bórok khá bai khúk bai khir khir khe kók khna khe Israilni bugra wngnani bagwi borokni biyal wng glak.’

⁵“Oro kók kisa tongo, nwng muitu wngna; Nerni bwsla Abner tei Jetherni bwsla Amasa bórok khoroknwi wng kha Israil sengkrakrokni bokhorok khoroknwi tongmani, Jeruani bwsla Joab bórokno butharwi ano tamo khlai kha. Nwng muitu manna, bahai khe bo kwchang kwchang khe tong phuru bórokno butharnaino yagul suna bagwi buthar kha. Bini mungsa cha ya kwrwi.[2] Bo bororokno buthar kha tei ang[3] khe tabuk bini samungni bagwi ma ruju-ui tongo. Phiya ang khe ba aboni bagwi manjago.[4]

⁶Nwng sima rwngma bai khlai di, nwng bono haino thwi kosong thwina ta rw di.

⁷Tamo khe Giliadsa Barjilaini bwsajlasongrokno khairok ja di tei bórokno naikini khlai ja di, tamni hwn ba ang nini takhuk Absalomni yakni khárwi tong phuru bórok ano khairok kha.

⁸Benjamin bosongni Bahurimni Gerani bwsla Simeibo khoroksa tongo. Ang Mahanaimo tháng phuru bo ano belai khe khá hamya bai swrai kha, tamo khe bo ang bai Jordan rukungo malai phuru ang bono kwrak khe Subraiyungni mungwi kók rw kha, ang nono seng bai buthar glak.

⁹Tamo khe tabuk nwng bono majra ber yaui tongwi man glak. Nwng si-o tamo khlaina nangnai, nwng bono butharna nangnai.”

¹⁰Daud thwi kha hakhe Daudni kamiyungo phobjak kha.

¹¹Bo nokha bisik brwichi jora Israilni bugra chá lang kha, Hebrono tongwi nokha bisik sni tei Jerusalemo tong twtwi nokha bisik thamchitham bugra chá lang kha.

¹²Solomon bupha Daudni yakchu-o bugra chá kha, bini bugrani phankrak khe songchajak kha.

¹³Adonijani buma wng kha Hagit, bo Solomonni buma Batsebani thani tháng kha; “Bahai kók kahamni bagwino phai khna bla?” Hwnwi bo sẃng kha. “I’n haino,” hwnwi bo sa kha,

¹⁴hakhe bo kók manju-ui, “Ang nono kók tháisa sana tongo,” hwnwi sa kha. “Bubo tẃi tamo?” Hwnwi bo sẃng kha.

¹⁵Bo hai hwnwi sa phi kha, “Nwng saui mano ang se bugra wngna tongmani, Israilni bebakno abonono naiwibo tongmani, tamo khe abo wng li ya, ani takhuk bugra wng kha tamni hwn ba Subraiyungbo abono naima ba.

¹⁶Tabuk ang nono mungsani bagwi koina nai-o; nwng gosi ya ta wng ja di.”

¹⁷“Bubo tẃi tamo?” Hwnwi Batseba sẃng kha. Bo hai hwnwi sa kha, “Bugra Solomonno sẃng ja di ang si-o bo nono i’nhi hwn glak ano Sunamjwk Abisagno káijagwi hik khlaina rw ja di.”

¹⁸“I’n, au, ang nini bagwi bugrano sanai,” hwnwi Batseba sa kha.

¹⁹Hakhe Batseba Adonijani bagwi kók sa laina hwnwi bugrani thani tháng kha, bugra bumano khulumna bagwi bacha kha tei bomwi khulum kha, hakhe bo achukthayungo achuk kha, phiya tei kaisa achukthai na rw hor khe bini yagra bwkhak bumano achuk rw kha.

²⁰Batseba hai hwnwi sa kha, “Ang nono kók tháisa sana tongo; I’nhi ta hwn ja di.” “Ama tamo kók sa di, ang nini kók narwknai,” hwnwi bo sa kha.

²¹Batseba hai hwnwi sa kha, “Nini takhuk Adonija Sunamjwk Abisagno hik na si thung.”

²²“Nwng tamo wngwi Sunamjwk Abisagno bono rw di hwnwi ano san lang?” Hwnwi bugra sa kha. “Nwngba bono ani achukthaino phano sanwi rwui man bla. Phiya bo ani takhuk okra tei ochai Abiathar tei Jeruiani sajla Joabbo bini bwkhak.”

²³Hakhe Solomon Subraiyungni mungwi kwrak khe swmai tang kha, ang Adonijano omo hai sanmani bagwi buthar ya hwn khe Kaitor ano buthar si thung!

²⁴Subraiyungno ano ani pha Daudni achukthai-o kwrak khe achuk rwui songcha kha; bo bini kókno narwk kha, ano tei ani bosongno ha yaphar kha. Ang Subraiyung kwthangni mungwi swmai tango tini’-no Adonija thwinai.

²⁵Hakhe bugra Solomon Benaiano dagi khe thángwi Adonijano buthar kha.

²⁶Bugra Solomon ochai Abiatharno hai hwnwi sa kha, “Nwng nini kami Anathoto tháng di. Nwng thwina nangma se, tamo khe ang nono tabuk buthar glak, tamni hwn ba nwng ani apha Daud bai tong phuru Subraiyungni swmai bokhokni barja tongmani, nwng bo bai baksa bebak tong keseprok manjak kha.”

²⁷Hakhe Solomon Abiatharno Subraiyungni ochai wngwi tongmani sokok kha, abo hai khe’-no bo Silo-o Elini núkhungno tẃiwi samani abo nang phai kha.

²⁸A wngmano Joab khna kha. Bo Adonijani bwkhak tongmani tamo khe Absalomni bwkhak ya. Hakhe bo Subraiyungni ríni nogo khárwi thángwi háyáni buchugo[5] romwi tongwi kha.

²⁹Bugra Solomonni thani Joab khárwi thángwi ríni nogo tongwima kók sógwi khe’-no Solomon Joabno hai hwnwi sẃngna bagwi borok rohor kha, “Tamni bo ríni nogo ma khár lang.” Aphuru khe Joab hai hwnwi saui rohor kha, “Bo Solomonno kirima bai se Subraiyungni thani ma kháro.” Hakhe bugra Solomon Joabno butharna bagwi Benaiano rohor kha.

³⁰Hakhe bo Subraiyungni ríni nogo thángwi Joabno hai hwnwi sa kha, “Bugra nono ‘Nongkhor di hwnwi dagiui rohoro.’ ” Joab hai hwnwi sa kha, “Ang orono thwinai.” “Benaia kiphilwi bugrani thani thángwi Joab samani a kókno bugrano saui kha.”

³¹“Joab sama tẃi’-no khlai di hwnwi Solomon sa kha. Bono buthar di tei phob di. Hakhe ang eba Daudni bosongni khoroksa phano Joab borok kahamrokno butharma majrano tẃina nang glak.

³²A butharmano tẃiwi Subraiyung Joabno majra khlainai, abo apha Daudno khna rw yaui khlaimani se. Joab khoroknwi borok kahamrokno buthar kha, bórok bini slái borok kaham gwja se; Israilni sengkrak bokhorok khe Nerni bwsla Abner tei Judani sengkrak bokhorok khe Jetherni bwsla Amasa.

³³Bórok thwimani a majra Joab bai bini bosongrokni thani mol brúmni bagwi klainai tamo khe Subraiyung Daudni achukthai-o achuknai Daudni bosongno mol brúmno kwplai khlainai.”

³⁴Hakhe Benaia Subraiyungni ríni nogo thángwi Joabno buthar kha, hakhe bo bini kamini hasinglwngo phobjak kha.

³⁵Hakhe bugra Benaiano Joabni yakchu-o sengkrak bokhorok chong kha tei Abiatharni yakchu-o ochai Sadokno chong kha.

³⁶Hakhe bugra Simeino ring rohor kha tei bono hai hwnwi sa kha, “Jerusalemo nwng nini nok tang si di. Nwng orono tong di, abo yakarwi ta tháng di.

³⁷A salo nwng nongkhor khe tei nwng Kidron twisa lái khe le thw se thwinai, nwng sak baithangno majra klainai.”

³⁸“I’n au bugra,” hwnwi Simei sa kha. “Ang nwng sama hai’-no khlainai.” Hakhe bo Jerusalemo sal kolokma tong kha.

³⁹Hakhe nokha bisik tham lái khe bini seleng khoroknwirok, Makani Akisni bwsla Gatni habugrani thani khárwi tháng kha. Simei bórokno Gato hwnwi khna khe’-no

⁴⁰bórokno naitukna bagwi bo bini koraichirkani saka-o kasaui Gatni bugra Akisni thani tháng kha. Bo bórokno nogo kiphilwi tubu kha.

⁴¹Solomon, Simeino Jerusalemni Gato thángwi kiphil kha hwnwi khna khe’-no

⁴²bo Simeino ring rwhorwi hai hwnwi sa kha, “Ang nono Subraiyungni mungwi swmai tang rwui sa kha, Jerusalemni ta ongkhor di, ang nono ragdama khe sa kha, nwng omo hai khlai khe nwng thw se thwinai. Nwng abono sa ya da tei nwng ani kók khnanai hwnwi kók rw ya da?

⁴³Hakhe nwng tamni Subraiyungni swmai narwk li ya wngwi ani kókno khna ya wng lang?

⁴⁴Nwng kaham khe saui mano nwng ani apha Daudni thani tamo samung cha ya khlai kha. Subraiyung aboni bagwi nono majra rwnai,

⁴⁵tamo khe bo ano hamari rwnai tei bo Daudni achukthayungno mol brúmni bagwi narwk tongnai.”

⁴⁶Hakhe bugra Benaiano dagi kha, bo thángwi Simeino buthar kha. Solomon tabuk bugra.