Read Kok Borok 1 HABUGRA 20 Bible Online

1 HABUGRA 20 - Kok Borok bible

1 HABUGRA 20

¹Bugra Benhadad Siriyani habugra bini bebak sengkrak bodolrokno thum kha tei khorok thamchinwi kubun habugrarok bai bórokni korairok bai tei korai malkhungrok bai khe thángwi Samariano gerebwi ton kha tei abono habwi swpragwi kha.

²Hakhe bo Israilni bugra Ahabni thani kamiyungo tẃitun rohor kha tei hai hwnwi sa hor kha, “Bugra Benhadad hai hwnwi sa-o:

³‘Nini rukphai tei rangchakrok ani se; nini naithok kuk bihiksongrok tei bwsarok ani se.’ ”

⁴Tei Israilni bugra uphilwi hai hwnwi sa kha, “Ani bugra, habugra, sói nwng samani haino ang tei ani tong kwrwi bebak nini máng se.”

⁵Hakhe tẃitunrok kiphilwi phaiwi hai hwnwi sa phai kha; “Benhadad hai hwnwi saui di hwnwi saui rohor kha, ‘Nwng nini bebak rangchak rukphairok tei nini nihiksongrokno tei nwsarokno ani yago yapharwi rw bai di.’

⁶Hai phano ang khwna omo hai jora’-ono ani selengrokno nini nokno naitukna tei nini selengrokni nokrokni manwirokno naitugwi naina bagwi rohornai; tei nwng mokol bai hamjakma manwirokno khochaui nanai tei tlangwi thángnai.”

⁷Hakhe Israilni bugra ha gwnangwini bebak tẃiphangrokno ringwi hai hwnwi sa kha, “Nai di o borok bahai khe chwngno tong khochoro khiklaina bagwi nai. Bo ano ani hikrokno tei bwsarokno ani rukphai tei rangchakrokno rwui rohor di hwnwi san rwhoro tei angbo i’n-no ma hwn kha.”

⁸Tei bebak tẃiphangrok tei lukurok hai hwnwi sa kha, “Bini kókno khunju ta kan di tei I’nbo ta hwn di.”

⁹Aboni bagwi bo Benhadadni tẃitunrokno hai hwnwi saui rohor kha, “Ani bugra habugrano saui di, ang bini swkangni a sanmungni kókrok le ang khlainai tamo khe aboni ulni tei omorokno le ang khlaiwi man ya.” Hakhe a tẃitunrok kiphilwi tháng bai kha tei bini thani kók tubu-ui phai lai kha.

¹⁰Hakhe Benhadad borok rwui rohorwi hai hwnwi sa rw hor kha; “Mwtairok ano abo hai’-no khlai thung teibo bára se khlai thung, tumungno Samariani ha ano rwktharnairokni khoroksa khoroksani bagwi hadlwi mochomsa mochomsa phano tong rwk khe ano abo hai’-no khlai thung!”

¹¹Hakhe Israilni habugra uphilwi hai hwnwi sa phi kha, “Bono sa di: Bugra sengkrak kubuino bo chobani swkang kung chuk ya tamo khe chobani ulo se kung chugo.”

¹²Omo hai wng kha: Benhadad bugrarok bai khe ríni nogo nung laiwi tong lai phuru bo bini selengrokno dagiui hai hwnwi sa kha, “Tiyar wng si di.” Hakhe bórok tiyar wngwi yapri sé lai kha.

¹³Tei a jora-o, diyari khoroksa Israilni habugra Ahabni thani phaiwi hai hwnwi sa phai kha, “Subraiyung hai hwnwi sa-o; ‘Nwng a kwbángma sengkrakrokno nuda nuk kha?’ Nai di, ang tini’-no bórokno nini yago yapharnai, hakhe nwng saui man anw ang’-no Subraiyung.”

¹⁴Hakhe Ahab hai hwnwi sẃng kha, “Sabo bai?” Hakhe bo hai hwnwi sa kha, “Subraiyung hai hwnwi sa-o: ‘Amchoirokni sikla tẃiphangrokni tẃi wngnai.’ Hakhe bo sabo chobano jai khe tẃidulnai?” Hwnwi sẃng kha. Hakhe bo, “Nwng” hwnwi sa kha.

¹⁵Hakhe bugra angkorni dagiphangrokni yago tongma bebak sikla sengkrakrokno ring kha, bebagwi borok khorok 232 ká-o. Aphuru khe bo tei khorok 7,000 sengkrakrokno thum kha.

¹⁶Hakhe bórok nongkhorwi thángwi diboro choba bachaui kha. Aphuru Benhadad tei bono chubanai khorok thamchinwi habugrarok ríni nogo nung laiwi phek laijak.

¹⁷Angkorni sikla tẃiphangrok swkang nongkhor lai gra kha. Tei Benhadad mwrwknairokno naichomna bagwi rwui rohor kha tei bórok bono hai hwnwi sa kha, “Bororok Samariani nongkhorwi phai laiwi tongo.”

¹⁸Hakhe bo hai hwnwi dagi kha, “Bórokno kwthangno romwi tubu di, bórok choba nang laina bagwi phano phai thung eba kwthana kók sana bagwi phano phai thung.”

¹⁹Hakhe angkorni o sikla sengkrakrok kamiyungni choba nang laina bagwi Israilni sengkrakrok bai tháng lai kha.

²⁰Tei nang lainairok khoroksa tei khoroksa choba nang lainaino buthar kha. Israilrok bórokno riphrigwi tháng kha; tei Aramni habugra Benhadad korai kasaui tei bini logi korai malkhung tẃiwi khár lang kha.

²¹Hakhe Israilni bugra nongkhorwi riphrigwi tháng kha tei korairokno, korai malkhungrokno swprak kha tei Siriyarokno mechenwi belai kirimasingcha khe buthar bai kha.[18]

²²Hakhe diyari bugra Ahabno thángwi hai hwnwi saui kha, “Kiphilwi tháng di tei nini sengkrakrokno chabwi di tei kaham khe chap di, tamni hwn ba Aramni habugra haino hai sachlang phai khe chobani bagwi yak tisa phinai.”

²³Hakhe Siriyani bugrani tẃiphangrok bono hai hwnwi sa kha, “Bórokni mwtairok wng kha hatháini mwtai se. Aboni bagwino bórok chini slái rak kugo; tumungno chwng bórok bai harungo choba khlai khe le chwng bórokno páinai.

²⁴Tabuk khorok thamchinwi bugrarokno dagiphangni norwi bórokni sak slái-o sói sengkrakphangrokno chong si di.

²⁵Nwng nini nangsak kwbáng sengkrakrokno ring di, abo swk’-no korai tei korai malkhungbo na di. Chwng Israilrok bai harungo nang lainai tei tabuk le chwng bórokno mechennai.” Bugra Benhadad a kókno lon kha tei bórokni kókno na kha.

²⁶Teini bisi-o khe bo bini bororokno ring kha tei bórok bai khe, Israilrok bai nang laina bagwi Aphek kamiyungo tháng kha.

²⁷Yang Israilrokno thumjak kha tei chámungrok rwjak kha tei Siriyarok bai choba nang laina bagwi ongkhor lai kha; Israilrok Siriyarokni tei babaisa bwkhak batham kha lai kha, bórok bodol dolnwi hai khe se nukjak si-o, phiya Siriyarok ha gwnangwi kupulung wngwi tong kha.

²⁸Kaitorni borok khoroksa ha Israilni bugrani thani phaiwi hai hwnwi sa kha; Subraiyung hai hwnwi sa-o: “Tamni hwn khe Siriyarok hai hwnwi sa lai-o, ‘Subraiyung wng kha hatháirokni Kaitor se, harungrokni Kaitor ya,’ aboni bagwi ang o borok kwbángmano nini yago yapharnai hakhe ang se Subraiyung hwnwi nwng saui mannai.”

²⁹Nokha salsni romwi Siriya bai Israilrok mwkhang nahar laiwi batham kha laiwi tong kha. Hakhe nokha salsnini salo kheno bórok choba nang lai kha; tei Israilrok yakung bai himwi choba khlainai sa-rasai Siriyarokni sengkrakrokno salsani salono buthar kha.

³⁰Tamo khe tong rwknairok khe Aphek kamiyungo khár kha; tei aboni deual bai klai kha, a karjagwi tong rwknairokni bere khorok snini saka-o klai kha. Benhadad a kamiyung bisingo’-no kháro tei nok kaisani uklokni khotolo huijagwi kha.

³¹Bini tẃiphangrok bini thani thángwi hai hwnwi sa lai kha, “Chwng khna-o Israilni bugrarok khairokma gwnang se hwnwi. Nwng sa khe chwng Israilni bugrani thani rí kichikrok bwchango bului tei kotogo dwkhwi bului thángwi malai anw, bo nono mwthangna phano tongo.”

³²Hakhe bórok bwchango rí kichik bul kha tei totra’-obo dwkhwi bului Israilni bugra bai thángwi hai hwnwi malaiwi sa lai kha, “Nini seleng Benhadad nini thani mwthang ja di hwnwi koi ja-o.” Ahab hai hwnwi sẃng kha, “Bo tabukbo kwthang tong kho hai da? Bo ani takhuk se.”

³³A bororok abono kahamni mari hwnwi chongwi dodro dodro bini kókno rwksaui “Au, Benhadad nini takhuk’-no” hwnwi sa lai kha. “Bono tubu-ui phai di” hwnwi habugra dagi kha. Benhadad aro sók phai khe’-no Ahab bono bo bai baksa korai malkhungo kasa rw kha.

³⁴Benhadad bono hai hwnwi sa kha, “Apha Samaria-o khlaima hai khe nwngbo Damaskoso pai-phal khlaiwi manna tẃi khe ang nono apha nini nwphani aroni manmani kamiyungno kiphilwi rwnai.” Israilni habugra aphuru khe hai hwnwi sa kha, “Ang nono abo hai khlai rwnai.” Hakhe bo bo bai kók kha lai kha tei bono phiyógwi rohor kha.

³⁵Subraiyung dagimani bagwi diyari bodolrokni bwsarokni bere khoroksano hai hwnwi sa kha, “Ano swprak ja di.” Tamo khe a borok bono buna lon li ya.

³⁶Hakhe bo bono hai hwnwi sa kha, “Nwng Subraiyung dagimani kókno na li ya aboni bagwi nwng oroni nongkhorwi tháng khe’-no singho bai uátharjaknai.”

³⁷Hakhe a diyari haino hai tei khoroksa borokni thani hai hwnwi thángwi saui kha, “Ano swprak ja di.” Hakhe a borok bo sama tẃi’-no swprak kha; bo bono sotonwi swpragwi khiklaiwi rw kha.

³⁸Hakhe a diyari thángwi pái kha tei lama-o habugrano naisingwi tong kha tei mwkhango rí khaui sinijak ya khe huijagwi tong kha.

³⁹Tabuk a diyari láiwi thángna nai phuru khe a diyari bono ringwi hai hwnwi sa kha, “O bugra, ang choba khlaiwi tong phuru khoroksa sengkrak ani thani khoroksa arirokni sengkrak khoroksano romwi tubu kha tei sa kha, ‘O bororokno mwrwgwi ton di; bo yógwi tháng khe nwng butharjaknai eba khe nwng 3,000 rukphai budul ma rwnai.’

⁴⁰Tamo khe ang tei mungsa-o pái lai ya wngmani bai a borok yógwi tháng kha.” Hakhe bugra hai hwnwi sa kha, “Nwng khúk baithang’-no nini majrano sa kha, nwng tabuk nini suthaino ma rwnai.”

⁴¹A diyari bini bumkhangni ríno khuk kha, hakhe Israilni bugra bono diyarirokni bere khoroksa se hwnwi sini kha.

⁴²Hakhe bo bono hai hwnwi sa kha; “Subraiyung hai hwnwi sa-o: Tini ang buthar di hwnwi dagima a borokno nwng phiyók kha. Nwng aboni bagwi nini langma rwui ma sunai tei nini bororok bórokni bororokni yagulo sokomorjak bainai.”

⁴³Hakhe Israilni habugra khá hilik khe tei khá báijagwi Samaria-o kiphilwi tháng kha.