Read Kok Borok 1 HABUGRA 21 Bible Online

1 HABUGRA 21 - Kok Borok bible

1 HABUGRA 21

¹Omo hairokni ulo omo hairok wng kha: Jejrilo tongnai Nabot hwnwi borok khoroksani Samariani bugra Ahabni noyungni gana-o Jejrilo angur bwlwng kaisa tongo.

²Hakhe Ahab Nabotno hai hwnwi sa kha, “Nini angur bwlwngno ano rw di; ang omono man khe muikwthwng bari khlainai tei omo ani noyungni gana-o wngwi tongmaba; aboni yagulo ang nono kaisa kaham angur bwlwng kaisa rw anw. Eba nwng nai khe ang nono omoni bagwi dormai kwbáng rwui rw anw.”

³Phiya Nabot Ahabno hai hwnwi sa kha, “Subraiyung sa-o o angur bwlwng ani chuchusongni aroni manmani se, buino ta rw di!”

⁴Hakhe Ahab bwkha hamya wngjagwi nogo tháng kha tei Jejrilni Nabot bono sama kókno khnaui jolijak kha; aboni bagwi bo hai hwnwi sa kha, “Ani chuchusongni klangmano ang nono rw ya.” Hakhe bo deual bwkhak mwkhang rohorwi bo bini thuyamo rokoui kha tei mungsa phano chá li ya.

⁵Tamo khe bihik Jesebel bini thani phaiwi bono hai hwnwi sẃng kha, “Nwng tamni aswk bwkha hamya wngjak kha. Nwng tamni cha ya wngwi tong lang?”

⁶Bo bihikno hai hwnwi sa kha, “Tamni hwn ba ang Jejrilni Nabotno hai hwnwi sa kha, ‘Nini angur barino ano rang bai phal di; eba khe tumung nwng nai khe, ang nono aboni slái-o tei khungsa angur bari rw anw;’ phiya ba bo hai hwnwi sa kha, ‘Ang nono ani angur barino rw glak.’ ”

⁷Hakhe bini bihik bono hai hwnwi hwn kha, “Nwngba Israilni bugra ya da? Thuyamni bacha di, khá tongthok di tei chá di. Ang nono Nabotni angur bwlwngno rw anw!”

⁸Hakhe Jesebel Ahabni mungwi kaisa kóktun swi kha tei bono sil bu-ui rw kha tei a kóktunrokno kamiyungo Nabot bai baksa tongnai tẃiphangrokno tei Jejrilni bokhorokno rohor kha.

⁹A kóktuno omo hai hwnwi swijak: Sal kaisa chong di chá yaui tongna bagwi tei bebak bororokno kwrẃngsa khe ring bai di tei Nabotno bororokni thani bóromni achukthai-o achuk rw di.

¹⁰Borok hamya khoroknwino tubu-ui bono mwkhang naisingwi majra ber rwui sa rw di, o borok Kaitorno tei bugrano hamya sa kha. Ulo khe bono kamiyungni phataro tlangwi holong khitarwi buthar di.

¹¹Hakhe bini kamiyungni bororok, tẃiphangrok tei bini kamiyungo tongnai borok kahamrok, Jesebel bórokno khlai di hwnwi rohorma haino khlai kha, bo bórokno kóktun swiwi rohorma hai’-no khlai kha.

¹²Bórok chá yaui tongna bagwi sakhlaiwi rw kha tei bebak bororokni bwskango Nabotno bóromni achukthai-o achuk rw lai kha.

¹³Borok hamya khoroknwirok phaiwi bini bwskango achuk phai lai kha; tei borok hamyarok bono majra berwi sa kha, lukurokni bwskango Nabotno hamya ber laiwi hai hwnwi sa kha, “Nabot Kaitorno tei habugrano hamya hwnwi sa kha!” hakhe bórok bono kamiyungni phataro tlangwi holong bai khitar lai kha, hakhe bo thwi kha.

¹⁴“Nabot butharjak kha,” hwnwi bórok Jesebelni thani kók rohor kha.

¹⁵Aboni ulo khe Jesebel, Nabot holong khitarjagwi thwi kha hwnwi khna khe’-no bo Ahabno hai hwnwi sa kha, “Bacha di, Jejrilni Nabot nono phalna soi ya wngmani angur bwlwngno na si di; tamni hwn khe Nabot kwthang kwrwi kha, butharjak kha.”

¹⁶Ahab Nabot thwi kha hwnwi khna kheno logi logi’-no Ahab bachaui thángwi Jejrilni Nabotni angur bwlwngno nanani tháng kha.

¹⁷Hakhe Subraiyungni kók Tisbini Eliani thani sók phai kha,

¹⁸“Bacha di Samaria-o tongnai Israilni bugra Ahab bai malai di. Bo aro Nabotni angur bwlwngo, bo abono nana bagwi tháng kha.

¹⁹Hakhe nwng bono hai hwnwi sa di, ‘Subraiyung sa-o, “Nwng borok khoroksano butharwi bini manwirokno na ya da?” ’ Tei nwng bono hai hwnwi sa di, ‘Subraiyung hai hwnwi sa-o, “Sẃirok Nabotni thẃi swlak thani’-no nini thẃinobo swlaknai!” ’ ”

²⁰Hakhe Ahab Eliano hai hwnwi sa kha, “Nwng ano nuda nuk kha, o ani ari?” Hakhe bo uphilwi hai hwnwi sa kha, “Ang nono nuk kha, tamni hwn khe samung hamya tangnani bagwi nwng Subraiyungni mokol bwskango phaljak kha.

²¹Nai di, Ang nini saka-o hamya tubunai. Ang nono kwma rwnai tei nini núkhungni chwrai tei okra bebak Israilni chwlarokno seleng eba seleng yanobo nornai.

²²Nini núkhungno bugra Jeroboamni bwsla Nebat hai tei Ahiani bwsla Basani núkhung hai wngnai, tamni hwn ba nwng ano joli rw kha tei Israilno sumsogo khiklai kha.

²³Subraiyung, Jesebelni bagwi hai hwnwi sa kha, ‘Jejril kamiyungni bisingo’-no sẃirok bini mang kwthwino chá anw.’

²⁴Tei Ahabni sandai-masakrok kamiyungo thwi khe sẃirok bai chájaknai; tei haphar pháng-phángo thwinairok khe toksa toktẃirok bai chájaknai.”

²⁵Khoroksa phano Ahab hai Subraiyungni thani samung hamya tangna bagwi sakno yaphar suknai kwrwi, tamni hwn khe bo bihik Jesebel dagima tẃi’-no khlai kha.

²⁶Tei bo Amorsarok hai takjak mwtairokno suriui selengmasingcha kuk sumsok khlai kha, abono Subraiyung Israilni bwskangni tei hani rwkhlai kha.

²⁷Ahab o kókno khna khe’-no, Ahab bini rírokno chir kha tei rí soroino kan kha. Bo chána soi li ya tei rí kichigono thu kha tei mwkhang somwi khá báijagwi tong kha.

²⁸Subraiyung Tisbisa diyari Eliano hai hwnwi sa kha;

²⁹“Nwng nuda nuk kha Ahab ani thani bahai khe koinene wng kha? ‘Bo omo hai wng kha ba bo kwthang tong sak ang bini saka-o hamya khiklai li ya.’ Bwslani thangsungo se ang Ahabni núkhungo hamya tubu sinai.”