Read Kok Borok 1 HABUGRA 22 Bible Online

1 HABUGRA 22 - Kok Borok bible

1 HABUGRA 22

¹Tabuk khe nokha bisik tham ká kha Israil bai Siriyarok choba nang lai ya khe tong lai kha.

²Aboni yagulo nokha bisik thamni jora-o Judani habugra Jihosapat Israilni bugrano malainani hwnwi tháng kha.

³Hakhe Israilni habugra bini tẃiphangrokno hai hwnwi sẃng kha, “Norok saui da man Ramot-Giliadni abo chini se? tamo khe chwng tamni Siriyani bugrani yakni kiphilwi nana bagwi mungsa phano se khlai laijak ya.” “Nwng sa khe ang tiyar’-no hwnwi Jihosapat sa kha, ‘Ani sengkrakrok tei korairokbo haino tiyar’-no.’ ”

⁴Hakhe bo Jihosapatno hai hwnwi sa kha, “Norok ang bai baksa Ramot-Giliado choba khlaina bagwi thángnai da?” Jihosapat Israilni habugrano hai hwnwi sa kha, “Ang bai nwng baksa’-no, ani bororokbo nini borok’-no, nini korairokbo ani korai haino.”

⁵Jihosapat Israilni habugrano hai hwnwi sa kha, “Subraiyung tamo sano swkang nai lai gra anw.”

⁶Hakhe Ahab diyarirokno ring kha bórok khorok brwi-ra ká twtwi wng anw tei bórokno hai hwnwi sẃng kha, “Ang Ramot-giliadno swpragwinai da swpragwi ya?” Hakhe bórok, “Swpragwi di, Subraiyung nono kwplai khlainai,” hwnwi sa kha.

⁷Tamo khe Jihosapat hai hwnwi sẃng kha, “Chwng sẃngna bagwi Subraiyungni tei khoroksa phano diyari kwrwi da?”

⁸Ahab hai hwnwi sa kha, “Tei khoroksa tong kho, Imlani bwsla Mikaia. Tamo khe ang bono naislero, tamni hwn ba bo uáisa phano ani bagwi mungsa kaham kók diyari sa ya kho; ani bagwi hamya máng se sa-o.” “Nwng omo hai samani cha ya!” Hwnwi Jihosapat sa kha.

⁹Hakhe Ahab khoroksa tẃiphangno ringwi sa kha tabukno thángwi Mikaiano tubu-ui phai di.

¹⁰Bugra khorok nwirokno bugrani kanmung chummung najak tei Samariani dugayungni phataro bórokni Achukthai-o achuk laijak tei bebak diyarirokno bórokni bwskango kók diyari sa lai yaui tong lai-o.

¹¹Bórokni bere khoroksa wng kha Chenanani bwsla Jedekia sorni bokorong snamwi hai hwnwi sa kha; “Subraiyung o kók sa-o; ‘Nwng omo bai choba khlaiwi Siriyano sokomor súk ya sak chubanai.’ ”

¹²Tei kubun diyarirokbo a kókno sa lai kha, “Ramot-Giliado tháng di; Subraiyung abono bugrani yago rwnai.”

¹³A jora-o Mikaiano naharna thángnai tẃiphang bono hai hwnwi sa kha, “Bebak diyarirok’-no bugrano páinai hwnwi sa kha ba nwngbo haino bwkha bacha rwui sa khe hamnai.”

¹⁴Tamo khe Mikaia hai hwnwi sa khe, “Subraiyung kwthangni mungwi ang sa-o Subraiyung sa di hwnmano se ang sanai.”

¹⁵Bo bugrani bwskango sógwi khe’-no bono hai hwnwi sẃng kha, “Mikaia chwng Ramot-Giliad bai choba nang lai nai de nang lai ya?” Hakhe bo bono hai hwnwi sa kha, “Tháng di nang lai di: Subraiyung nini yago habugrano chen rwnai.”

¹⁶Tamo khe Ahab hai hwnwi sa phi kha, “Nwng Subraiyungni mungwi’-no sa-o hwn khe ano kók kubuino simi se sa di hwnwi ang a kókno nono uái bwswk sanai ba?”

¹⁷Hakhe Mikaia hai hwnwi sa kha, “Ang Israilni sengkrakrokno mwrwknai kwrwini merarok hai khe hathái gwnangwi pisa-piring khe nugo. Tei Subraiyung sa-o, ‘O bororokni mwrwknai kwrwi, bórok kwchang kwchang khe sakni nogo tháng thung.’ ”

¹⁸Tei Israilni bugra Jihosapatno hai hwnwi sa kha, “Ang nono sa ya diba, bo uáisa phano ani bagwi kók diyari kaham sa ya kho, phiya hamya se sanai?”

¹⁹Hakhe Mikaia hai hwnwi sa kha; “Aboni bagwi tabuk khna di Subraiyung tamo hwnwi sa: Ang nuk kha, ‘Subraiyung bini achukthayungo achukjak tei bebak bini Suarirokno bini yaksi-o tei yagra-o khe bacha laijak.’

²⁰Hakhe Subraiyung sẃng kha, ‘Sabo thángwi Ahabno Ramot-Giliado thángwi butharjakna bagwi lon rwnai?’ Suarirokni bere baksa o kók tháisa sa kha tei baksa ba juda kók sa lai kha,

²¹hakhe phola kaisa swkangwi Subraiyungni bwskango bachaui hai hwnwi sa kha, ‘Ang bono lon rwnai.’

²²‘Bahai khe?’ Hwnwi Subraiyung sẃng kha. Phola sa phi kha, ‘Ang thángwi Ahabni diyarirokno tatal sa rwnai.’ Subraiyung sa-o, ‘Tháng di, bono bandiui di. Nini samung chanai.’

²³Hakhe nai di, Subraiyung o diyarirokni khugo tatal sa rwnai phola rw kha; Subraiyung nono komor thung hwnwi buj thum kha.”

²⁴Hakhe Jedekia diyari Mikaiani thani tháng kha, khangaro thapra rwui hai hwnwi sẃng kha, “Subraiyungni phola ano yakarwi nwng bai kók sa laina hwnwi bu lama tẃi ongkhorwi tháng?”

²⁵“Nwng kubui’-no khárwi uklokni nok khungsa-o ma tháng phuru khe nwng saui man anw!” Hwnwi Mikaia sa phi kha.

²⁶Hakhe Israilni habugra hai hwnwi dagi kha, “Mikaiano romwi kamiyungni Gobornor Amonni thani tei habugrani bwsla Joasni thani tlang di.

²⁷Bórokno bono alongo daui ton di hwnwi sa di, ‘Ang kaham khe kiphil ya sak bono mai hamya tei twi hamya rwui ton sók di.’ ”

²⁸Tamo khe Mikaia hai hwnwi sa kha, “Nwng kaham kwrwng khe kiphil khe Subraiyung ani bising tẃi kók sa ya kho!” tei bo hai hwnwi sa kha, “Bebakno kaham khe sajakma kókno kaichom di!”

²⁹Hakhe Israilni bugra tei Judairokni bugra Jihosapat Ramot-Giliado tháng lai kha.

³⁰Israilni bugra Jihosapatno hai hwnwi sa kha, “Ang choba-o tháng phuru sinijak ya tẃi khe tháng anw, tamo khe nwng le nini bugrani kanmungno kanwi him di.” Hakhe Israilni bugra choba-o sakno sinijak ya tẃi khe tháng kha.

³¹Siriyani bugra bini mak thamchinwi korai malkhungni bokhorokno hai hwnwi dagi kha, “Norok kotor eba ste khoroksa bai phano ta nang lai di Israilni bugrano simi se swprak di.”

³²Hakhe bórok bugra Jihosapatno nuk khe’-no bórok hai hwnwi uansuk kha, “Omono Israilni bugra!” hakhe bórok bono swprakna tháng lai kha. Hakhe Jihosapat chirik kha.

³³Tei korai malkhungni bokhorokrok bono Israilni bugra ya hwnwi siniui man kha. Hakhe bórok uphilwi tháng lai kha.

³⁴Tabuk khoroksa sengkrak achomsa makal kongsa tikhlaiwi Israilni bugrano kogwi rw kha, abo thángwi bini khaklap katijaknai bai bokhorokni katijaknaini kwcharo nangwi kha. “Ang rwjak laha; hwnwi bo chirigwi bini korai malkhung béngnaino sa kha, Kiphil di tei o chobani khár gra di.”

³⁵A salo choba belai khe tungphla kha; bugra Ahab bini korai malkhungo khe Siriyarokni bwskangono achuk rwui tonjak kha, sarigo khe bo thwi kha. Bini kwsani thẃi kochogwi malkhungni yaphang jora sógwi kha.

³⁶Hakhe sal hap twtwi-o kheno bebak Israilni sengkrak bokhorok hai hwnwi chirigwi sa kha; “Bebak bororokno o sakni ha-o tei sakni kamiyungo kiphilwi tháng bai si di!”

³⁷Hakhe bugra thwi kha tei mang kwthwino Samaria-o tlangjak kha tei phobjak kha.

³⁸Tei borok khoroksa korai malkhungno Samariani twisa-o sú kha; tei sẃirok aro bini thẃino swlak lai kha, aro’-no baliknairok tuku-o, Subraiyung wng anw hwnwi sama haino wng kha.

³⁹Bugra Ahab tangmani bebak samungrokni kók tei bo mayung buani noyung tangmani kókrok phiya bo tangma kamiyungrokni kókrokbo Israilrokni bugrarokni bosongni láibuma bijabo swijak kwrwi diba?

⁴⁰Ahab thwi kha tei bini buphasongni simalwngo phobjak kha. Bini yakchu-o bwsla Ahajaia bugra chá kha.

⁴¹Israilni bugra Ahab bugra chámani nokha bisik brwini jora-o, Asani bwsla Jihosapat Judani bugra chá-o.

⁴²Jihosapatni umor nokha bisik thamchiba phuru, bo nokha bisik nwichiba Jerusalemo bugra chá kha. Buma wng kha Silhini bwsajwk Ajuba.

⁴³Bo bini bupha Asa tongma hai khe’-no tong kha. Bo Subraiyung naima tẃi’-no phér yaui samung khlai kha. Phiya ba buini bororokni surithairok sokomorjak li ya tei bororokbo aro suri lai kho tei satrairok sógo phiya ratharmungrokbo yaphar lai kho.

⁴⁴Jihosapat Israilni bugra baibo kiching kha lai kha.

⁴⁵Jihosapat tangma samungrokni kók tei bo khá kotor wngma tei choba khlaima kókrok bebak’-no Judani bugrarokni bosongni láibuma bijabo swijak wng ya diba?

⁴⁶Buphani Asani jorani simi tongnai bebak chwla uaijanai tei bwrwi baliknairokno rwkhlai rwui rohor bai kha.

⁴⁷Ha Idomni habugra kwrwi wngwi tongmani Abo Judani bugra bai chongjak khoroksa tẃiphang bai se naijago.

⁴⁸Bugra Jihosapat twijlango chogwi Ophirni rangchak naharna bagwi rungtor snam kha; tamo khe abo uáisabo chokjak yaui’-no Esiongebero báiwi tháng kha.

⁴⁹Hakhe Ahabni bwsla Ahajaia Jihosapatno hai hwnwi sa kha, “Nini bororok bai baksa khe ani bororokno rungtoro khe tẃi di.” Tamo khe Jihosapat soi li ya.

⁵⁰Jihosapat thwi kha hakhe Daudni kamiyungo bugrarokni simalwngo phobjak kha. Bini yakchu-o khe bwsla Jehoram bugra chá kha.

⁵¹Judani bugra Jihosapat bugra chámani nokha bisi chisni phuru Ahabni bwsla Ahajaia Samaria-o tongwi Israilni bugra chá kha tei bo nokha bisik nwi Israilni bugra chá kha.

⁵²Bo Subraiyungni thani sumsok khlai kha, bo bupha Ahabni hamya tongmung tẃi’-no tong kha, buma Jesebel hai khe tong kha tei Israilrokno sumsogo khiklainai, Nebatni bwsla Jeroboamni tongmungno rwkthar kha.

⁵³Bo Bal mwtaino mon kha tei khulum kha tei bupha khlai langma hai’-no samung khlaiwi bo Subraiyung Israilni Kaitorno joli rw kha.