Read Kok Borok 1 HABUGRA 3 Bible Online

1 HABUGRA 3 - Kok Borok bible

1 HABUGRA 3

¹Solomon Ijipni bugrani bwsajwkno káijakmani bising tẃi, Ijipni bugra bai kiching kha lai kha. Bo bini noyung, nokthar tei Jerusalemni chokdeual tang bai ya sak bono Daudni kamiyungo tonnani tubu kha.

²Aphuru bo Subraiyungni mungwi nokthar tangjak ya kho, aboni bagwi bororok kuchuk jagarogo ratharmung yaphar laiwi tong kho.

³Solomon Subraiyungno hamjago tei bupha Daud khlaiwi thángma hai’-no khlai-o, phiya bo kuchuk jagarogo ratharwi yapharo tei satrai sógo.

⁴Salsa habugra Gibeono ratharwi yapharna bagwi tháng kha tei Solomon a háyá-o sai-sai sógwi yapharmung yaphar kha.

⁵A horo Subraiyung bono imango nukjagwi, “Nwng ani thani tamo nai?” Hwnwi sẃng kha.

⁶Solomon hai hwnwi sa kha, “Nwng ani apha nini seleng Daudno belai khe hamjagwi tongo, phiya bo’-bo nwng bai kaham kók khnaui, bujsói tẃiwi, bwkha srai-srai khe’-no tong lang kha. Tei nwng bai hamjak máng tongmano phunukna bagwi bono sajla khoroksano rwui tabuk bini achukthayungo achuk rw kha.

⁷Tabuk, o Subraiyung ani Kaitor nwng ani apha Daudni yagulo ano bugra chá rw kha. Tamo khe ang belai chwrai bahai khe hano tẃinai si ya.

⁸Nini o seleng nwng chongmani o borok kwbángmarokni bisingo lekhana phano lekha bai yarokni bisingo nwng ano oro nini borok wngna bagwi chong kha.

⁹Aboni bagwi nwng ano simung rw di, ang nini bororokno bujsói khlaina bagwi tei bubo kaham bubo hamya sinani bagwi simung rw di. Wng ya khe ang bahai khe nini o luku kwbángmano tẃitherwi mannai?”

¹⁰Omo haino sanmani bai Subraiyung Solomonno chajak kha.

¹¹Hakhe bo bono hai hwnwi sa kha, “Tamni hwn ba nwng sakni umor kolok san yaui, hamchanano san yaui eba nini arirokno thwi thung hwnwibo san yaui nwng bujsói khe tẃina bagwi tei simungni bagwi simi se san si-o,

¹²nai di, ang nwng samani haino khlai kha; nai di ang nono teibo simung tei rwngmung rw kha, tamo khe nini slái swkang khoroksa phano nwng hai kwrwi tei nini slái ulobo wng glak.

¹³Tei nwng san yanobo ang nono rw kha, nwng gwnang wngnai tei bórom mannai, aboni bagwi nini a jora-o bugrarokni bisingo khoroksa phano nwng hai tong glak.

¹⁴Phiya nwng nwpha Daud hai ani kók khna khe ani kerongrokno tei dagimarokno tẃi khe ang nono umor kolok rwnai.”

¹⁵Hakhe Solomon sicha kha tei saui man kha abo imang se nugo. Hakhe bo Jerusalemo thángwi Subraiyungni swmaini bokhok bwskango bachaui kha. Tei sógwi yapharma bai khakchangma yapharmung yaphar kha. Aboni ulo khe bo bini bebak tangphangrokni bagwi chámungni panda rw kha.

¹⁶Hakhe salsa khoroknwi bwrwi baliknairok bugra Solomonni thani phai lai kha.

¹⁷Tei bórokni bere bwrwi khoroksa hai hwnwi sa kha, “O ani bugra o bwrwi bai ang nok khungsa’-ono tong lai-o; ang bwsa chwla khoroksa bá kha, a nogo bo’-bo aphuru tongo.

¹⁸Ang bwsa bámani salnwini ulo khe bo’-bo chwla bwsa khoroksa bá kha. A nogo chwng khoroknwi susuk’-no tongo, aro tei khoroksabo kwrwi.

¹⁹Hakhe horsa hwn khe bo deraui bini bwsani saka-o thusinjak khe a bwsa thwiwi pái kha.

²⁰Ang thu-ui tong phuru’-no bo horo bachaui ani bwsano ani khúrini tlang kha tei bini bwsa kwthwino khe ani khúri-o mokholwi rw phai kha.

²¹Teini phung aiwi ang bachaui bwsano abuk chá rwna nai khe nuk kha abo kwthwi se. Ang aphuru kaham khe naisigwi nai ba abo ani bwsa ya.”

²²Tamo khe tei khoroksa bwrwi hai hwnwi sa kha, “I’nhi, o kwthang bwsa se ani tei o kwthwi khe nini bwsa!” Hakhe swkangni a bwrwi hai hwnwi sa phi kha, “I’nhi o kwthwi bwsa nini se tei o kwthang khe ani.” Hakhe bórok habugrani bwskango kók báng laiwi kutuk lai kha.

²³Hakhe bugra Solomon hai hwnwi sa kha, “Norok khoroknwi’-no hwn lai-o a kwthang bwsa khe ani phiya a kwthwi bwsa khe nini.”

²⁴Hakhe bugra hai hwnwi sa kha, “Ano seng kongsa rw phai gra di.” Hakhe bórok bugrano seng tubu-ui rw phai kha.

²⁵Hakhe bo hai hwnwi dagi kha, “A kwthang tongnai bwsano ratharwi khaknwi khe khak di tei khoroksano khaksa tei khoroksano tei khaksa rwui rw di.”

²⁶A bwsa kwthangni sói buma bini bwsano khairokjak kha, hakhe bugrano hai hwnwi sa kha, “O bugra a chwraino ta buthar ja di; bono’-no rwui rw di!” Tamo khe tei khoroksa bwrwi khe hai hwnwi sa kha, “Chwng khoroknwino’-no ta rw di, khaknwi khe ra se ra di.”

²⁷Aphuru Solomon hai hwnwi sa kha, “A chwraino ta buthar di a swkangni bwrwimano a chwraino rwui rw di bo se buma sói.”

²⁸Israilni bororok Solomonni a buj sachumano khnaui bebak bororok bono khá-o bórom wng lai kha, tamni hwn ba bórok saui man kha Kaitor bono bujsói khe sachu-ui rwna bagwi simung rw kha.