Read Kok Borok 1 HABUGRA 5 Bible Online

1 HABUGRA 5 - Kok Borok bible

1 HABUGRA 5

¹Turni bugra Hiram Daudni kichingni halok narwgwi tono, Daudni sajla Solomonno buphani yakchu-o bugra chá kha hwnwi khna khe’-no bo bini thani kóktunrok rohor kha.

²Solomon Hiramni thani kók kwchárwi rohor phi kha;

³“Nwng saui mano ani apha Daud bini hano kitingjak bini arirok bai choba nang lai máng ma tháng kha, aboni bagwi bo bini Kaitor Subraiyungno khulumna bagwi nokthar tangwi man lang li ya, Subraiyung bono bini bebak arirokno mechen bai ya sak bo abo khlaiwi man li ya.

⁴Tamo khe, tabuk le Subraiyung ani Kaitor ani bebak arino kwchang wng rw kha, ano tabuk kebengnairok kwrwi tei choba bachanabo kirina kwrwi.

⁵Ani apha Daudno Subraiyung hai hwnwi kók rw kha, ‘Nini yagulo ang nini nwslano nini achukthayungo achuk rw phuru khe bo ani nokthar tangnai.’

⁶Aboni bagwi nwng nini bororokno Lebanono ani bagwi sidar buphang tan rw hor di, ani samung tangnai bororok bórok bai baksa samung tangnai, nwng chong tẃi’-no ang bórokni manthai rwui rw anw, nwng kaham kheno saui mano ani bororok tei nini bororok Sidonsarok hai buphang tanna rwng ya gwja.”

⁷Hiram, Solomon bai kók kwchárjakmano khnaui belai khe’-no khá srangjak kha tei hai hwnwi sa kha, “Tini Subraiyungno lobo, tamni hwn ba bo Daudno abo hai sinai bwsano bini yakchu-o abo hai dopha kotorni bugra wngna rw kha.”

⁸Hakhe Hiram Solomonno omo hai hwnwi kók kwchár hor kha, “Ang nini kók kwchármano man kha, nwng dagima tẃi’-no khlaina bagwi ang tiyar tongo. Ang sidar tei pain buphang rwnai.

⁹Ani bororok abono Lebanonni tubu-ui phainai; tei ang abono khachobwi bur snamwi abo bai khe nwng samani aro thángnai. Hakhe ang abono aro nwng naui manna tẃi khe swkaknai. Hakhe nwng ano ani núkhungni nangmani chámungno ma rwnai.”

¹⁰Hakhe Hiram, Solomonno bini nangma swkno sidar tei pain buphang rohor kha,

¹¹tei Solomonbo bisi brúmno Hiramno nwichisai metrik ton gom tei nwichi litar olib bwtwini thok kaham bini bororokno chá rwna bagwi rohoro.

¹²Subraiyung bini swmaino narwk kha tei Solomonno simung rw kha, Hiram bai Solomon kwchang kwchang khe tong lai-o tei bórok khoroknwi’-no kók kha laijak.

¹³Hakhe bugra Solomon Israil gwnangwini thumwi khorok 30,000 bororokno samung tangna bagwi bumung tisa kha,

¹⁴tei Adoniramno abórokni bokhorok chong kha. Bo bórokno 10,000 khe gut kha kha tei gut mareui talsa khe Lebanono tei talnwi khe nogo tong phai-o.

¹⁵Solomonni khorok 80,000 bororok hatháini holongthai bokhoknai khorok 70,000 bororok abono rwkanai,

¹⁶tei khorok 3,300 bororokno bórokni samung naikini khlaina bagwi chongjak.

¹⁷Bugra Solomon dagima bai bórok holong kotor kahamrok nokthar lunani bagwi nai kha.

¹⁸Solomon tei Hiramni bororok tei Gebalisarok holongrok tiyar khlai kha tei buphangrokbo nokthar tangna bagwi tiyar khlai kha.