Read Kok Borok 1 HABUGRA 6 Bible Online

1 HABUGRA 6 - Kok Borok bible

1 HABUGRA 6

¹Israilrok ha Ijipni thángmani bisik brwira-charchini ulo Solomon Israil hani habugra wngwi nokha bisik brwini talnwini tal eba Jibni talo, Solomon Subraiyungni nokthar tangnani samungno cheng kha.

²Habugra Solomon Subraiyungni bagwi nok tangmani abo lokmani khe muk dokchi, uarmani muk nwichi tei chukma khe muk thamchi.

³Nokthar nokni puilani khotolni bwskangni nuka khe abo nok uarma swk, abo khe muk nwichi kuar tei lokma khe mukchi.

⁴Noktharni deualni bwlam narwkjak, phiya bisingni bwlamni slái phatarni bwlam kesep kugo.

⁵Khotolni tei kwthar kuk khotolni deualno thepaui bo kaisa malaktham nokbo tisa kha, aro kwbángma khotolrok tongo.

⁶Khámani khotol uarmani khe mukba, aboni sakani khotol uarmani khe muk dok tei aboni sakani khotol khe muksni uaro; noktharni deualni phatar tẃi khe hatina kaisa kwnwi narwgwi snamjakni bagwi o malaktham nok tang thani phaklai nang li ya.

⁷Nokthar tangjakma holongthairok haino tiyar khlaijak aboni bagwino a nokthar tangjak phuru, atura, rua tei kubun mungsa sorrokni khorang khna li ya.

⁸Hapmani a tolani[6] khotol wng kha noktharni salgrabai bwkhak klai-o, abo theka theka khe kuchukni kwnwini khotolo sógwi-o.

⁹Hakhe Bugra Solomon nokthar tang bai kha. Bo sidar buphangni tokta bai khe uyar snam kha.

¹⁰Khotol kwthamni khotol khe mitar 2.2 kuchuk, abo noktharni deual bai swrabwi tangjak tei abo sidarni thongla bai kwrwngjak.

¹¹Subraiyung Solomonno hai hwnwi sa kha,

¹²“Nwng ani bebak kerongrokno tei dagimarokno narwk khe, ang nwpha Daudni thani kók rwmarokno nini bagwi khlai bainai.

¹³Ang nwng tangmani o noktharo ani borok Israilrokni bisingo tongnai tei ang bórokno yakar glak.”

¹⁴Hakhe Solomon nokthar tang bai kha.

¹⁵Bo noksingni deualno sidar buphang bwlap bai khop kha; nok thongarni simi uyar jora bisingno buphang bwlap bai khop kha; tei nok thongarno saiprasni buphang bwlap bai máng khop kha.

¹⁶Bo mitar kaichuku jora nokni uklok sederwi sidar buphangni bwlap bai khe thongarni simi uyar[7] jora khop kha tei bo abo tangma khe bisingni háyáni bagwi se, khotol kwtharni bagwi se.

¹⁷Hakhe a nok bisingni háyáni bwskang tabuk mitar kai chichar kolok wng kha.

¹⁸Nok bisingni sidar buphang bwklap bwtháirok tei khum barjakrok khe swiwi naithok rwjak; bebakno sidar máng, holong tháisabo nukjak li ya.

¹⁹Bisingo, bisingni khotol snam kha, bo aro Subraiyungni swmaini bokhokno tonna bagwi se.

²⁰[8] Bisingni a khotol mitar chuku kolok, mitar chuku kuar tei mitar chuku kuchuk, abono bo rangchak kaham bai khop kha. Bo sidar buphang bai háyá snam kha.

²¹Hakhe Solomon nok rangchak kaham bai khop kha tei aro rangchakni dwkhwi ton kha, bisingni khotolni bwskangnobo rangchak bai khop kha.

²²Nok gwnangwi’-no bo rangchak bai khop kha, khotol thwgwino abo hai khlai kha tei bisingni a háyá tongma khotolnobo bebak’-no rangchak bai khobwi rw kha.

²³Bisingni háyá-obo tháistwi buphangni cherub maknwi snam kha, masa abo mitar 4.4 kuchuk.

²⁴Cherub masani bwkrang lokma khe 2.2 mitar kolok tei kangsa bwkrang khe mitar 4.4 logo; bwkrang kangsa bai tei kangsani buchuk mitar 4.4 ká-o.

²⁵Hakhe masa cherubbo mitar 4.4 wngo; cherub maknwino torma baksano tei kobo kosol.

²⁶Cherub masa mitar 4.4 kuchuk tei masabo aswkno chugo.

²⁷A khotolni bisingo khe a cherubno ton kha, a cherubni bwkrangrok masani deual kaisa nangwi kha tei masani tei deual kaisa nangwi kha; tei kangsa bwkrang khe nok kwcharo nangwi kha.

²⁸Cherubnobo rangchak bai khop kha.

²⁹A cherubni mangtang bai tei khajuri buphangni kosol mangtang tei khum barjak khe buphangni bwlabo tanwi bising bai phatarno naithok rw kha.

³⁰Phatar bai bisingni thongarnobo rangchak bai khop kha.

³¹Bisingni háyáni dugarroknobo tháistwi buphangni bwlap bai snam kha; duglamni kebengni buphang bai kosongni buphang bokma abo bakba phér lai-o.

³²A olib buphangni dugar lapnwi-o cherub, khajuri buphang tei khum barjak khe snamjak tei abórokno rangchak bai khop kha tei cherub bai khajuri buphangbo rangchak rw kha.

³³Hakhe sói nok bisingo hapma duglam khe tháistwi buphangni bwlap bai khakbrwi khe tanjak.

³⁴Aro dugar kwnwi khe pain buphangni bwlap bai thebwi tonjaknai khe snamjak.

³⁵Bwkrang gwnangrokni mangtang tankhurwi swiwi naithok rwjak tei khajuri buphang, phiya khumrok swiwi naithok rwjak tei rangchakbo khopjak.

³⁶Bo bisingni khotol khe holong tháitham bai sidar buphangni thongla bai tonjak.

³⁷Noktharni thongla káijakma khe tal nwini tal Jibni talo, Solomon bugra chámani bisi brwini jora.

³⁸Talcharni tal Balni talo, Solomon bugra chámani nokha bisi chisa phuru a nokthar tangna hwnwi chapma tẃi’-no tangwi páisugo; Solomon abono tangmani bisisni nang kha.