Read Kok Borok 1 HABUGRA 7 Bible Online

1 HABUGRA 7 - Kok Borok bible

1 HABUGRA 7

¹Solomon bini sakni bagwibo nok tang kha, a nok tangwi páinani nokha bisi chitham nang kha.

²Bo a nok Lebanonni bolongo[9] tango; a nok mitar 44 kolok tei mitar 22 kuar tei mitar 13.5 kuchuk.

³A nokni bwtang kwtham sidar buphangni thongla káijak, bwtang mareui chiba khe thongla tongo, sidarni thongla’-ono nok bachajak, uyarbo sidarni’-no manwi tonma nok jora sógwi-o, abórok thongla bai sungchajak.

⁴Aro bwtang kwthamo tailam narwkjak tei aboni tei yasa bwkhakbo bwtang kaibrwi’-no tailam tango.

⁵Bebak dugar tei tailamno khakbrwi khe snamjak, tailamrok[10] bwtang kwthamo tei babaisabo abo haino bwtang kwthamono khlaijak.

⁶Bo nok kotorno thonglarok bai khe tang kha; abo mitar 22 kolok tei mitar 13.5 kuar. Thongla mareuini bwskango nuka tongo tei abórokni bwskango khe kholopjak.

⁷Hakhe bo Achukthayungni nok kotorbo tang kha, aro’-no bo bujni kók sakhlai-o tei buj sachuma nokbo tang kha; abo sidarni buphang bai thongar brúm snamjak.

⁸Bini tangma nok khe a buj thumna nok kotorni uklogo tei kubun nokrok hai khe’-no abobo tangjak. Solomon a nok hai kheno phiya bo nok khungsa tang kha, abo wng kha bini bihik Ijipni bugrani bwsajwkni bagwi.

⁹Abórok bebak’-no holong kaham bai máng snamjak kha, nangma swk kheno rajak, bwskang bai uklok korat bai rajak, thonglani simi saka páithak jora’-no abo hai. Abo hai khe’-no a bujni nok kotorni simi Subraiyungni nok jora tangjak,

¹⁰thongla káima wng kha, holong kotor tei morokni holong se. Aboni bere baksa khe mitar kwtham kwchar kolok.

¹¹Sakani holongrok tei morok kuk, milik khe rajak tei Sidonni thonglarokbo haino.

¹²A nok kotorni kitingwi’-no polaktham rajak holong gwnang tei polasa sidarni thongla bai chorsa kitingjak; bisingni Subraiyungni noktharbo abo haino tei hap grama a nokbo abo haino.

¹³Bugra Solomon Turni Hiram hwnwi borok khoroksano na rw hor kha,

¹⁴bo wng kha Naptalini bosongni randijwk khoroksani bwsla, bupha khe Turni pitolni manwi takna kwrwng tei samung kwrwng; bo sinai borok, pitolni bebak samungno rwngo. Bo bugra Solomonni thani phaiwi bini bebak samungrokno tang kha.

¹⁵Bo pitolni thongla kongnwi snam kha, abo kongsa mitar kai 8 kolok tei mitar 5.3 bokobom; thongla kongsa bai tei kongsa tormani baksa.

¹⁶Bo pitol bai snamjak gele rwui takjaknai bokhok bai khe a thongla saka-o berana bagwi phaklai kongnwi snam kha; a phaklai kongsa kongsa mitar 7.5 kuchuk.

¹⁷Thongla saka babai-o khe sikol tángnwi naithok khe thonglano kitingjak; thongla kongnwnwi’-ono abo hai khe mwchang rwjak.

¹⁸Abo tẃi khe bwtang tángnwino pitolni dalimtháirok snam kha; abo sakani phaklai berama thongla kongnwi-o kitingwi khonjak.

¹⁹A sakani phaklai-o khe lili khum hai khe snamjak mitar, abo mukbrwi kuchuk.

²⁰Thongla sakani a kiting bokobomo babaibrwi sikol khachijak, a thonglani bokhorogo khe bwtang bwtang khe pitolni tháinwira dalimthái khachijak.

²¹Hiram a pitolni thongla kongnwinono noktharo hapma duglamo kái kha; kongsano salgrabai-o ton kha, aboni mung phar kha Jakhin tei kongsano khe salsibai-o ton kha, aboni mung phar kha Boas.

²²A thongla kongnwini saka-o pitolni lili khum hai khe snamwi khachijak. Hakhe a thonglarok snammani samung pái súk kha.

²³Hakhe Hiram pitolni twi tonjaknai manwi snam kha, abo mitar 2.2 kuthuk, mitar 4.4 kebeng bai kosongo tei mitar 13.2 kitingnai.

²⁴A twi tonjaknaini búkhúkni tola-o muksa muksa khe kitingwi bwtang tángnwi kwswngwi tháinai pitol bai bwtháino kosol khe snamjak bwthái khachijak tongo. A twi tonjaknaino tagwi snammani takjaknai bokhogo a bwtháini mari tongma bagwi bebakni dokno thansa wng kha.

²⁵A twi tonjaknai pitolni mak chiknwi musuk chwlani phikungo boksajak, abórokni bere maktham khe salsibai bwkhak tei maktham khe saltháng tei maktham khe salgrabai tei maktham khe salka bwkhak naharjak; phiya abórokni uklok khe bisingo máng.

²⁶A twi tonjaknai rwjamani khe yasi tháibrwi; bini búkhúk khe khuri búkhúk hai tei phatar bwkhak lilini bubak hai khe khuajak. Aro brwichi rwja twi chago.

²⁷Hiram pitolni malkhung khungchibo snam kha; abo khungsa khungsa mitar 1.8 kolok, mitar 1.8 kuar tei mitar 1.3 kuchuk.

²⁸Omo tẃi khe a malkhungrokno snam kha, abórokni buphang bwlap lahan thepajak, a bwlap khe bokongo thepajak,

²⁹a bokongo singhorok, musukrok tei cherubrok gwnang. A bokongrogo singho bai musukni saka drobo tei yaphango khe kitingwi snamjak.

³⁰Malkhung thwgwi’-no pitolni gorgori tongo tei gorgorirokni bagwibo pitolnino gorgori thepajaknai bokongbo tongo. Busup subrwi-ono pitolni snamjak, mairang berajaknai tongo; a berajaknai naithok khe kitingnai rwui snamjak.

³¹A dangaini saka-o kitingwi bokhong snamjak. Abo malkhungni saka jora sentimitar 45 tei yaphango sentimitar 18 abono kitingwi khum saijak.

³²Busup brwi bokhokni tola babai buchugo khe gorgori tháibrwi tongo. Gorgori bai gorgorino manju rwnai kwcharni dang khe bokhogo phnangjak. Gorgorirok muksa khaksa chugo.

³³Malkhungni gorgorirok koraini malkhungno kosol; bórokni gorgori thepajaknai buphang tei bokhong tei sorkongrok tei kwcharni a kitingnairok bebak pitolni máng snamjak.

³⁴Malkhung thwgwi’-no busu kaibrwi-o kwcha rwnai tongo; kwcha rwnairok khaksa a malkhung bai’-no thepajak.

³⁵Aro sentimitar 22 malkhung hai swrapjak.

³⁶A kwcharni tei a buphang bwklabo cherubni mangtang tei singhorok, khajuri buphangrok tankhurwi swiwi naithok rwjak tei abono kitingwi’-no kitingnai swijak.

³⁷Abo hai kheno a malkhungrok snamjak kha; bebakno kosol khe torma, lokmabo baksa kheno snamjak.

³⁸Huram pitolni dangai tháisni snam kha; tháisa tháisa dangai mitar 1.8 kuar, aro litar 800 ká twtwi chago.

³⁹Bo malkhung khungbano noktharni salsibai-o tei khungbano salgrabai-o ton kha; a twi tonjaknairok khe salkabai bai salgrabaini busu bwkhago khe ton kha.

⁴⁰Hiram twkrok, tharukrok tei khurirok snam kha. Abo hai khe bo bugra Solomonni bagwi Subraini nokthar nokni samungno tangwi pái kha;

⁴¹Thongla kongnwi, thonglani buchugo khe twk kotorno kosol khe snamjak tei aboni saka-o kaisa bai tei kaisa khonwi naithok khe tonjak.

⁴²Tháibrwira dalim bwthái sikolo bwtang khe khachiui thongla buchukno naithok khe mwchang rwna bagwi ton kha;

⁴³kaichi thongla tei kaichi sujaknai khurirok tongo;

⁴⁴mak chinwi musuk saka-o kaisa kotorma dangai.

⁴⁵Twkrok, tharukrok tei sarchajaknai dagaitrok. Omorok Hiram bugra Solomonni bagwi Subraiyungni noktharni bagwi snam kha, bebakno pitol kaham bai máng snamjak kha.

⁴⁶Habugra Jordanni Sukot bai Sarethanni kwcharo kwrẃngsa-o abórokno harpek hani takjaknai manwi-o rwui tak kha.

⁴⁷Solomon bebak manwino rwta yaui’-no ton kha, tamni hwn ba abórok belai kwbángma, a pitol bwswk hilik saui man ya.

⁴⁸Hakhe Solomon Subraiyungni nokni bebak manwirok snam kha; rangchakni háyá, abo auan beranani bagwi rangchakni songphang,

⁴⁹tei rangchak kahamni thopna, kaiba salgrabai-o tei kaiba salsibai-o, bisingni a kwthar háyáni bwskango; tei rangchakni khum, chati tei yakhep.

⁵⁰Rangchak kahamni khurirok, chati dosi sochajaknai yakheprok, dangairok, mairangrok, hórtwkrok, noktharni kwthar kuk khotolo hapjaknai duglamni bwskangno khe rangchak kaham bai khe ból kha.

⁵¹Abo hai khe’-no habugra Solomon Subraiyungni nokni samungrokno khlaiwi pái kha. Yagulo khe bo bupha Daud Subraiyungno yapharna bagwi khagwi tonma manwirokno aro tubu bai kha. Abórok wng kha rangchakrok, rukphairok tei mairangrok, bo abórokno noktharni rangkhógo khe ton kha.