Read Kok Borok 1 HABUGRA 8 Bible Online

1 HABUGRA 8 - Kok Borok bible

1 HABUGRA 8

¹Bugra Solomon bebak Israilni okrarokno tei bosongni tẃiphangrokno, Daudni kamiyungni Subraiyungni swmaini bokhokno nokthar kwtalo tlangna bagwi Jerusalemo bini thani phai bai di hwnwi kuthum rwui dagi kha.

²Bebak Israilni bororok bugra Solomonni aro Ethanim talni tero kuthum lai kha, abo wng kha nokha talsnini tal.

³Bebak Israilni tẃiphangrok kuthum khe ochairok a swmaini bokhokno tisa kha.

⁴Hakhe abono noktharo tlang kha. Lebirok tei ochairok Subraiyungni bwskangni ríni noknobo tlang lai kha tei arono bebak manwiroknobo tlang lai kha.

⁵Bugra Solomon tei bebak Israilni bororok swmai bokhokni bwskango kuthum lai kha tei kwbángma merarok tei musukrok rathar kha abo lekhaui se lekha bai ya.

⁶Hakhe ochairok a swmai bokhokno noktharo tlangwi kwthar kuk khotolo tonwi kha, abo cherubni bwkrangni yaphango khe ton kha.

⁷Cherubni pheheljak bwkrangrok swmai bokhokno kholobwi tono tei balphungroknobo kholobwi tono.

⁸A balphungrok aswkno logo buchukno kwthar kuk khotolo tongwi’-no nuhuro, tamo khe abo phataro tong twtwi abórokno nuhur ya, a balphungrok tabukbo aro tong kho.

⁹A swmai bokhogo mungsa kwrwi, Sinai hathái-o Musi tonmani a holongthai kwnwi simi se, bórok Ijip hani nongkhor phai phuru Subraiyung Israilni bororok bai swmai tang phuruni a holongthai se.

¹⁰Ochairok noktharni nongkhor khe’-no achomsa chumui phaiwi kobol phai kha.

¹¹Subraiyungni chẃngsacha pohor chẃngma bai ochairok bisingo samung tangwi tongwi man li ya.

¹²Hakhe Solomon hai hwnwi suri kha, “Subraiyung nwng nokha-o salno ton kha, hai phano nwng chumui bisingo tei mwnago tongna chong kha.

¹³Tabuk ang nini bagwi nokthar tang kha. Mol brúm nwng tong phlaina bagwi tongthai.”

¹⁴Lukurok aro bacha phai khe habugra Solomon bórokni bwkhak uphil kha tei Kaitorni thani bórokni bagwi hamari san kha.

¹⁵Bo hai hwnwi sa kha, Israilni Subraiyung Kaitorno hambai rw-o: Bo ani apha Daudni thani swmai tangmano narwk kha, bo hai hwnwi sa phuru khe,

¹⁶ang ani bororokno Ijip hani tubu phuruni simi ang, Israil hani bisingo kamiyung kaisa tei bosong kaisa phano ani nokthar tangna bagwi tei ani mung bórom khlaijakna bagwi chong ya. Tamo khe Daudno ang chongma le ani bororokno tẃina bagwi se chongo.

¹⁷Hakhe Solomon khá-o chongmano khúk thak yaui hai hwnwi sa-o, “Ani apha Daud Israilni Subraiyung Kaitorno Surina nokthar tangna bagwi chongma le sói’-no,

¹⁸tamo khe Subraiyung bono sa kha, nwng tang langwi man glak,

¹⁹nini nwsla se tangnai, sói nini nwsla se, ani bagwi nokthar tangnai.”

²⁰“Tabuk Subraiyung bini kókno narwk kha. Ang ani aphani yakchu-o Israilni bugra wng kha tei Israilni Subraiyung Kaitorno surina bagwi ang nokthar tang kha.

²¹Hakhe ang chini chuchusongno Ijip hani tikhlaiwi tubu phuru Subraiyungni swmaini a holongthairok dajak a swmaini bokhokno tonna bagwi bo noktharo tonjaknai khotol snam kha.”

²²Hakhe lukurokni bwskangono Solomon háyáni bwskango thángwi bacha kha, bo bini yak kongnwi tisaui

²³hai hwnwi suri kha, “Israilni Subraiyung Kaitor nokha bai ha saka-o tei nwng hai Kaitor kwrwi: nwng nini bororok bai nini swmaino narwgo tei bórok khá rw súgwi nini kók khnaui tong khe nwng bórokno nini hamjakmano phunugo.

²⁴Nwng ani apha Daudno kók rwmano narwk kha; tini bebak kókno nang bai kha.

²⁵Tabuk o Israilni Subraiyung Kaitor tei ani aphano kók rwmarokbo nang si thung, nwng bono sa kha bini bosongni’-no khoroksa Israilni bugra wngnai tei bo samung khlai tẃino nwng bórokno rw kha.

²⁶Aboni bagwi tabuk o Israilni Kaitor, nwng nini seleng ani apha Daudni thani kók rwmarok bebakno nang rw si di.”

²⁷“Tamo khe o Kaitor, nwng sói o ha-o tongwi da manno? Bebak nokha se nono tonna bagwi chak rwui man ya, aboni bagwi ang tangmani o nokthar ba bwswk tornai ba?

²⁸Subraiyung o ani Kaitor, ang nini seleng. Ani surimano khna ja di, ang nono tini koiwi samano rw ja di.

²⁹Hor bai sal bai o noktharno naiwi ton ja di, oro’-no nwng surijakna hwnwi chongo, ang o nokthar bwkhak naharwi suri phuru ani surimano khna ja di.

³⁰Ani surimarokno khna ja di, bórok nini o nokthar bwkhak naharwi surimanobo khna ja di. Nini tongthai chuknoha-o tong twtwi chini kók khna ja di tei chwngno nakar ja di”.

³¹“Khoroksa swk borok tei khoroksani cha ya khlai-o hwnwi majra berjak phuru tei nini háyá-o nini noktharni háyá-o majra kwrwi hwnwi swmai tangna bagwi tubujak khe,

³²o Subraiyung nwng chuknoha-o tong twtwi khna ja di tei nini selengrokno rwtaui nai di. Majra gwnango bini nangma tẃi majra rw di tei majra kwrwino khe phiyógwi rw ja di.”

³³“Nini borok Israilrok nini thani sumsok khlaima bai bórokni arirok bai mechenjak phuru khe tei bórok nini thani kiphilwi o noktharo phai khe, phiya koiwi nini thani nakar san khe,

³⁴chuknoha-o tong twtwi bórok koimano khna ja di tei bórokno nwng bórokni chuchusongno rwmani a ha-o kiphilwi tubu phi ja di.”

³⁵“Nini thani nini bororok sumsok khlaima bai nwng uatwi ua rw yaui ton khe phiya bórok khá kiphilwi o nokthar phaising naharwi koiwi nini thani suri khe,

³⁶hakhe chuknoha-o tong twtwi bórokni surimano khna ja di. Nini selengrokni sumsokrokno tei Israilni bororokni sumsokrokno nakar ja di. Sói samung khlainano bórokno phrwng ja di, hakhe o Subraiyung, nwng o nini ha-o uatwi rohor ja di, abono nwng nini bororokno mol brúmni bagwi rwmani bórokni manthai.”

³⁷“Ha-o asari nang phuru khe, bok nang phuru khe eba mai-khulrok nokbar bai phérwi klangjak phuru khe eba kúkthora bai cháui páijak khe eba nini bororok arirok bai swprakjak phai phuru khe, eba hamya-cha ya wng khe eba bórokni bisingo bemukrok wng khe,

³⁸bórokni surimarokno khna ja di. Israilni bororokni bisingo khoroksa swk khá-o nangjagwi, o nokthar bwkhak bórokni yak phologwi suri khe,

³⁹bórokni surimano chuknoha-o tongwi khna ja di, bórokno nakar ja di tei chuba ja di. Nwng simi se bororok khá-o uansukmano saui mano, borok thwgwino bórokni manna nangma tẃi rw di,

⁴⁰omo hai khe’-no nini bororok bebakno nini kók khnaui sal brúmno chini chuchusongno nwng rwma ha-o tongwi manna tẃi khe khlai ja di.”

⁴¹“Abo hai kheno Israilsa ya, nini borok ya, phatarsa hakchalma hani nini mungni jarwi phainai,

⁴²tei phatarsa nini nogo khulumna phai phuru nini mung kotorno, nini phan gwnang yakni kókno khnanai,

⁴³ha gwnangwini borok nono siniui manna tẃi tei nini borok Israilsarok nono kirimani bai khe o ani snamjak nok nini’-no nok hwnwi siniui manna tẃi khe phatarsarok suri sanmano nwng nini chuknoha-o tongwi khna-o.

⁴⁴“Nwng nini bororokno bórokni arirok bai choba nangwi di hwnwi dagi khe tei kwrẃngsa swgo tongwibo nwng chongmani o kamiyung tei ang nini bagwi tangmani nokthar bwkhak naharwi suri khe,

⁴⁵bórokni surimarokno khna ja di. Chuknoha-o tongwi khna ja di tei bórokno pái rw ja di.”

⁴⁶“Nini bororok nini thani sumsok khlai khe khoroksa phano sumsok khlai ya borok kwrwi kha hwn khe tei nwng joliui bórokno arirokni yago mechen rwui tei bórok kubun ha-o romwi khajagwi tlangjak khe, a tlangjakma ha belai chal phano;

⁴⁷nini bororokni surimarokno khna ja di. Bórok a ha-o tong twtwi khá kiphilwi nini thani suri khe bórok bwswk sumsok khlai kha tei borok hamya wng kha hwnwi gosi khe, o Subraiyung bórokni surimarokno khna ja di.

⁴⁸Bórok a ha-o tong phuru kubui khe khá nangwi khá kiphil khe tei bórok nwng chini chuchusongno rwmani a ha-o tei nwng chongma kamiyungno tei ang nini bagwi tangmani nokthar bwkhak naharwi suri khe,

⁴⁹bororokni surimarokno khna ja di. Nini tongthai chuknoha-o tongwi bórokni surima khna ja di tei bórok sumsok khlaimano khairogwi nakar ja di.

⁵⁰Bórokni bebak sumsokrok tei nini ari wngwi bachamano nakar ja di tei bórokni arirok bórokno khairogwi tong thung.

⁵¹Bórok nwng bai a hórjlai hai, Ijip hani tikhlaiwi tubujaknai nini yakni bororok se.”

⁵²“Kwplaisa Subraiyung, nwng nini borok Israilrokno tei bórokni bugrano khásuk ja di tei bórok nini thani chubachu sanwi suri phuru khe khna ja di.

⁵³Aswk bororokni bisingo se nwng bórokno nini borok wngna bagwi khá chong kha, nwng nini seleng Musino chini chuchusongno Ijip hani tikhlaiwi tubu phuru o kókno sa kha.”

⁵⁴Solomon Subraiyungni thani suriui pái khe háyáni bwskango bacha kha, aro’-no bo yáskú sungwi yak tisaui tongmani.

⁵⁵Bo sotonwi chirigwi Kaitorni thani kuthum laijak bebak bororokni bagwi hamari san kha. Bo sa kha,

⁵⁶“Bo rwna hwnma tẃi’-no bini bororokno khakchang rwnai, Subraiyungno lob di. Bo bini seleng Musini tẃi kaham kaham kók rwma bebak narwk kha.

⁵⁷Chini Subraiyung Kaitor, chini chuchusong bai tongma tẃi’-no chwng baibo tong thung; bo chwngno khibi glak eba yabo yakar glak;

⁵⁸hakhe bo chwngno bini kók khnaui naikhlai thung, hakhe bo chwngno tong di hwnwi hwnma tẃi’-no chwng tongnai tei chini chuchusongno kerong tei dagima rwma tẃi’-no tongnai,

⁵⁹chini Subraiyung Kaitorni thani ang surimano tei o koimarokno muitu tong thung. Bo Israilni bororokno khairok máng tong thung tei bórokni bugrano sal brúmni nangmarokno rw ja di.

⁶⁰Hakhe o hayungo bebak dopharok saui man anw Subraiyung simi se Kaitor tei khoroksabo kwrwi.

⁶¹Hakhe bini bororok sal brúmno Subraiyung Kaitorni thani kubui khe tong di tei bini bebak kerongrokno tei dagimarokno tini tẃima tẃi’-no tẃi máng tong phlai di.”

⁶²Hakhe habugra Solomon tei bebak bororok aro Subraiyungni thani ratharmung yaphar kha.

⁶³Bo mak 22,000 musukni bokhorok rw kha tei mak 120,000 merano thansa khlaimani yapharmung rw kha. Hakhe bugra tei bororok noktharno yaphar kha.

⁶⁴A salo’-no bo kwcharni a khotolnobo yaphar kha, abo wng kha noktharni bwskangni khotol, bo aro ratharwi sógwi yapharmung rw kha. Maichlam yapharmung tei mal-matani bupham kwtha mungni yapharmung rw kha. Bo abo khlaima khe a pitolni háyá aswk manwirok chak li yani bagwi se.

⁶⁵A noktharo Solomon tei Israilni bororok nokha salsni[11] ter khlai kha. Aro borok kwbángma kuthum kha, salsibai hakchal Hamatni tei salgrabaini Ijipni gananibo pai kha.

⁶⁶Salcharni salo Solomon bororokno nogo rwui rohor bai kha. Bórok bebakno khá tongthokma bai bono lobwi tháng lai kha, tamni hwn ba Subraiyung bini seleng Daud tei bini Israilni borokno a bebak hamarirok rwma bai se tongthokma bai lobwi tháng lai-o.