Read Kok Borok 2 HABUGRA 1 Bible Online

2 HABUGRA 1 - Kok Borok bible

2 HABUGRA 1

¹Israilni bugra Ahab thwi kheno Moab Israil bai nang laina bacha kha.

²Tabuk Ahajaia Samaria-o bini mala kwnwi nokni achukthai thekani klai kha tei sak dukhu manẃi hamya klai kha; hakhe bo tẃitunrokno hai hwnwi saui rohor kha, “Tháng di Ekronni mwtai Baljebubno naitugwi di tei sẃngwi di ang ha de hamno ham glak kha.”

³Tamo khe Subraiyungni suari Tisbini Eliano hai hwnwi sa kha, “Bacha di, ‘Ha Israilo Kaitor kwrwini bagwi da norok Ekronni mwtai Baljebubno naitukna thángna nai lai?’

⁴Tabuk aboni bagwi’-no Subraiyung hai hwnwi sa-o, “Nwng nini thuyamni tei bacha glak, tamo khe nwng thwi sinai’-no.” Hakhe Elia tháng kha.

⁵Tẃitunrok habugrani thani kiphilwi phai lai kha, hakhe bo bórokno hai hwnwi sa kha, “Norok tamo wngwi kiphilwi phai lai lang?”

⁶Bórok bono hai hwnwi sa kha, “Aro borok khoroksa chwngno malaina phai kha; tei chwngno hai hwnwi sa kha, ‘Norokno rwui rohornai habugrani thani kiphilwi tháng di tei bono hai hwnwi saui di: Subraiyung ahai hwnwi sa-o: Ha Israilo Kaitor kwrwini bagwi da Ekronni mwtai Baljebubno naitukna rohor? Aboni bagwi’-no nwng nini a thuyamni tei bacha glak, tamo khe nwng thwi sinai’-no.’ ”

⁷Bo bórokno hai hwnwi sẃng kha, “Norokno phaiwi o kókrok sa phainaisa bubo tẃi borok?”

⁸Bórok bono hai hwnwi sa kha, “Buikhumu gwnang borok khoroksa bwchango bukurni khajaknai buduk khajak.” “Abo Tisbini Elia se bla,” hwnwi habugra saui khna rw kha.

⁹Habugra sengkrak khorok bachino bini thani rohor kha. Bórok Eliani thani tháng kha, Elia hatháini bokhorogo achugwi tongo, bo bono hai hwnwi sa kha, “O Kaitorni borok, habugra sa-o nwng, ‘Nongkhorwi phai di.’ ”

¹⁰Tamo khe Elia khorok bachini sengkrakrokni bokhorokno hai hwnwi sa kha, “Ang Kaitorni borok’-no hwn khe nokhani hór klaiwi nono tei nini khorok bachi sengkrakrokno sokomorwi pái thung.” Hakhe nokhani hór nongkhorwi phaiwi bono tei bini borok khorok bachino sokomorwi pái kha.

¹¹Habugra tei khorok bachi sengkrakni bokhorokno bini khorok bachi bororok bai rwui rohor phi kha. Hakhe bo hathái-o kasaui[1] bono hai hwnwi saui kha, “O Kaitorni borok, habugra hai hwnwi dagi-o dakti nongkhorwi phai di.”

¹²Elia hai hwnwi sa kha, “Ang Kaitorni borok’-no hwn khe, hakhe nokhani hór nongkhorwi phaiwi nono tei nini khorok bachi bororokno sokomorwi pái thung.”

¹³Tei uáisa, habugra tei khoroksa sengkrak bokhorokno bini khorok bachi sengkrakrok bai khe rohor phi u kha. Tei a kwtham jorani sengkrak bokhorok hathái saka-o kasaui tháng kha tei Eliani yakung yaphango klaiwi koiwi hai hwnwi sa kha, “Kaitorni borok, ang nono koi ja-o ano ta buthar ja di tei o khorok bachi selengrokno ta buthar ja di, chwngno naikhlai ja di.

¹⁴Nai di, swkangni khoroknwi khorok bachini sengkrak bokhorok bai khorok bachirokno nokhani hór phaiwi sokomorwi pái kha, tamo khe tabuk ano khairok ja di.”

¹⁵Hakhe Subraiyungni suari Eliano hai hwnwi sa kha, “Bo bai baksa tháng di; nwng bono ta kiri di.” Hakhe bo bachaui habugrani thani bo bai baksa nongkhorwi tháng kha,

¹⁶tei hai hwnwi sa kha, “Tamni hwn ba nwng ha Ekronni mwtai Baljebubni thani sẃngna bagwi borok rohor kha, abo ba tamo Israilo o kókno tẃi sẃngnai kwrwi hwnwi da? Aboni bagwi nwng nini thuma a thuyamni bacha glak tamo khe nwng thwi sinai’-no.”

¹⁷Hakhe bo Eliani khúk tẃi Subraiyungni kók sajakma tẃi’-no thwi kha. Bini yakchu-o bini takhuk Jehoram habugra chá kha, abo wng kha Jihosapatni bwsla Jehoram Judani habugra chámani nokha bisik nwini jora-o klai-o, tamni hwn ba Ahajaiani bwsa kwrwi.

¹⁸Habugra Ahajaia tang langmani bebak samungni kókrok Israilrokni bugrarokni bijabo tisajak ya diba?