Read Kok Borok 2 HABUGRA 10 Bible Online

2 HABUGRA 10 - Kok Borok bible

2 HABUGRA 10

¹Tabuk Ahabni bwsla khorok snichi Samaria kamiyungo tongo. Hakhe Jehu Samariani bisingni kamiyungni[4] tẃiphangrokni thani, okrarokni thani tei Ahabni bwslasongrokni chakrarokni thani kóktun swihorwi hai hwnwi sa hor kha,

²“Nini bugrani bwslasongrok nini yago’-no tei korai malkhungrok, korairok, phan gwnang kamiyung, da-seng, nini thani tongo, abo baino o kóktun nini thani sógwi khe’-no,

³nini bugrani bwslasongrokni bisingo kaham kuk tei chúkjak kukno saiwi na di, hakhe bono bugrani achukthayungo achuk rw di tei nini bugrani bosongni bagwi choba nang di.”

⁴Samariani tẃiphangrok belai khe’-no kirijak laiwi hai hwnwi sa lai kha, “Nai di, habugra Joram bai Ahajaia khoroknwirok suda bini bwskango bachaui man ya, hakhe bahai khe chwng bachaui mannai?”

⁵Hakhe noyungni barja tei kamiyungni barja tei okrarok bai, chakrarok Jehuno hai hwnwi sa hor kha, “Chwng bebak nini seleng máng se, nwng tholma hai’-no chwng khlainai, chwng khoroksano phano habugra chá rw glak, nwng chajakmani hai’-no khlai di.”

⁶Hakhe Jehu bórokno tei uáisa kóktun swihorwi hai hwnwi sa kha, “Tumungno norok ani bwkhak tong khe tei ang bai kók khanani tiyar tong khe, norokni bokhorokni bwslasongrokni bokhorokrokno khwna o jora’-ono Jejrilo ani thani tubu-ui phai di.” Tabuk habugra Ahabni khoroksnichi bwslasongrok Samariani kamiyungni barja tongnairok bai bórokno tubu di.

⁷Bórok Jehuni kóktun man khe’-no Ahabni bwsla khoroksnichirokno buthar bai kha tei bórokni bokhorokrokno ura-o khe Jejrilo Jehuni thani rohor kha.

⁸Tẃitun phaiwi Jehuno hai hwnwi sa phai kha, “Bórok Ahabni bwslasongni bokhorokrokno tubu kha.” Hakhe Jehu, “A bokhorokrokno kamiyungo hapma duglamo rúngnwi khe phung jora rúngwi ton di,” hwnwi sa kha.

⁹Teini phungo Jehu nongkhorwi thángwi bororokni bwskango bachaui hai hwnwi sa kha, “Norok le borok kaham, ang’-no bugra Joramno hamya khlainani chabwi buthar kha, tamo khe omorokno sabo buthar bai lang?

¹⁰Norok si di, Subraiyungni kók tháisa phano ha-o klai glak. Ahabni bosongno tẃiwi bini seleng Eliani khúk tẃi kók sama hai’-no Subraiyung khlai kha.”

¹¹Hakhe Jehu Jejrilo tong rwknai Ahabni bosongrokno, bebak kolok kotorrokno tei bini kháni kichingsongrokno, bini ochairokno khoroksa kwrwi tẃi khe buthar bai kha, khoroksano phano kwthang narwk li ya.

¹²Ulo Jehu Jejrilni Samaria-o tháng kha, lama kwrẃngsa-o mera mwrwknairok Bet-Ekedo sók phai khe,

¹³Judani habugra Ahajaiani sandai-masakrokno malai khe, “Norok sabo?” hwnwi sẃng kha, bórok hai hwnwi sa kha, “Chwng habugra Ahajaiani sandairok se,” Chwng Jejrilo thángwi Isiri Jesebelni bwsarokno tei aroni kolok kotorrokno hambai rwnani phai lai-o.

¹⁴Jehu, “Bórokno kwthang’-no rom di,” hwnwi dagi kha. Hakhe bórok bórokno kwthang’-no romwi tlangwi Bet-Ekedni twikhor gana-o tanwi buthar bai kha, bórok khorok brwichinwini bisingo khoroksano phano kwthang narwk li ya.

¹⁵Jehu aroni lam rw phi kha, lama-o bo bai malaina phainai Rekabni bwsajla Jehonadab bai malai khe, hambai rw sogwi hai hwnwi sẃng kha, “Ang nwng bai bwkha baksa wngma hai nwngbo ang bai baksa bwkha baksa da tong?” Jehu hai hwnwi sa kha, “Abo hai wng khe nini yak phologwi rw di.” Hakhe bini yak phologwi rw kha, Jehu bini korai malkhung saka-o bono kasa rw kha.

¹⁶Jehu hai hwnwi sa kha, “Ang bai baksa phaiwi ang bwswk Subraino hamjak nai phai di.” Hakhe bórok korai malkhungo kasa laiwi Samaria bwkhak tháng lai kha.

¹⁷Bórok Samaria-o sók phai khe aro tongnai Ahabni jaitirokno Eliani khúk tẃi Subraiyung sama hai’-no butharwi pái kha.

¹⁸Hakhe Jehu Samariani bebak bororokno ringwi hai hwnwi sa kha, “Ahab le Bal mwtaino kisicha se mon lang si-o, ang le bini slái teibo kwbáng kuk se monnai.

¹⁹Tabuk bebak Bal mwtaini diyarirokno, bebak bono khulumnairokno tei bini ochairoknobo rohor bai si di. Khoroksa phano ta karjak thung, tamni hwn ba ang Bal mwtaini thani yaphar mung kotor yapharna tongo, oro manjak phai ya khe butharjaknai.” Tamo khe omo Jehu Bal mwtaino khulumnairokno sol khlaiwi butharna lama khlaimani se.

²⁰Hakhe Jehu hai hwnwi dagi kha, “Bal mwtaino khulumnani sal sakhlai si di.” Hakhe sakhlaiwi rohor lai kha.

²¹Aphuru Jehu Israil gwnangwi sakhlaiwi rohor kha, bebak Bal mwtai khulumnairok phai bai kha, khoroksa phano aro sók phai ya kwrwi kha. Bórok bebak Bal mwtaini nok bisingo hap lai kha tei Bal mwtaini nok yaphangni simi páichuk jora kupulung wng kha.

²²Jehu ochairokni ríni barjano, “Bal mwtai khulumnairokni bebak rírok tubu-ui phai si di,” hwnwi dagi kha. Hakhe bo bórokni bagwi rírok tubu-ui phai kha.

²³Aboni ulo Jehu Rekabni bwsla Jehonadab bai Bal mwtaini nok bisingo habwi aroni bororokno hai hwnwi sa kha, “Nai bai gra di Bal mwtai khulumnairokno karwi oro Subraiyungni bororok kwrwina bla?”

²⁴Hakhe Jehu bai Jehonadab yapharmung yapharnani tei satrai sóknani bisingo hap lai kha, tabuk Jehu phataro khe khorok charchirokno tiyar khe hai hwnwi saui ton kha, “Ang norokno yapharmani bororokni bisingo khoroksa swk phano yógwi tháng khe, a yók rwnai borok bo se bini sak slái-o butharjaknai!”

²⁵Jehu sógwi yapharmani pái khe’-no mwrwknai tẃiphangrokno hai hwnwi sa kha, “Bisingo habwi bórokno tanwi pái bai si di, khoroksano phano ta phiyók di.” Bórok seng bai bórokno buthar bai kha, mwrwknairok tei tẃiphangrok bórokno phataro khiklaiwi rohor bai kha tei Bal mwtaini nok bisingni khotolo habwi kha.

²⁶Bórok aro Bal mwtaini nok bisingni thonglano phataro tubu-ui sógwi pái lai kha.

²⁷Bórok Bal mwtaini thonglano tei mwtai nokno sokomorwi pái kha tei abono khithai nok snamjakmani tini jorabo tong kho.

²⁸Abo tẃi khe Jehu Israilni Bal mwtaino sokomorwi pái súk kha.

²⁹Tamo khe Jehubo Nebatni bwsla Jeroboam sumsok khlaima hai yakar li ya, abo tẃi khe bo Israilrokno Bethel bai Danno rangchakni musuk tagwi khulum rwui sumsogo khiklai kha.

³⁰Subraiyung Jehuno hai hwnwi sa kha, “Ani mokolo chajakmani tẃi nwng khlaimani bai tei Ahabni bosongno bo ani bwkha-o tongma hai’-no khlai kha, bini bagwi nini bosong songbrwi jora Israilni achukthayungo ma achuknai.”

³¹Hai phano Jehu khe bebak Israilni Subraiyung Kaitorni kerongno bwkha bai khir khir khe tẃi súk ya, bo Jeroboam sumsokrok khlaimani abo hai lamani kiphil li ya, abo baino Israilrokno bo sumsogo khiklai kha.

³²A jora-o Subraiyung Israilni hano khochor khlai rwrwk kha Siriyani habugra Hajael Israilni bebak amchoirokno segwi na bai kha.

³³Abo Jordanni salka hani bebak ha Giliad, Arnonni harungni gana Aroerni simi, Gad, Ruben tei Manasesongni ha, phiya Giliad bai ha Basan jora.

³⁴Jehu aswk khlai langma, samungrokni kók, bini phanni kókrok, Israilrokni bugra bosong láibuma-o swijak tongo.

³⁵Jehu thwi khe Samaria-o phobjak kha, bini bwsla Jehoahas bini yakchu-o habugra chá kha.

³⁶Jehu Samaria o Israilni habugra chámani nokha bisik nwichichar wng kha.