Read Kok Borok 2 HABUGRA 11 Bible Online

2 HABUGRA 11 - Kok Borok bible

2 HABUGRA 11

¹Tabuk Ahajaiani buma Athalia bwsano butharjakmani nuk khe, bo dagiui habugrani núkhungni bororokno buthar bai kha.

²Tamo khe habugra Jehoramni bwsajwk, Ahajaiani bukhuk Jehoseba, Ahajaiani bwsla Joasno tei habugrani bwsarokni bisingo butharjaknani naiwi tong phuru-o bono khogwi tlangwi tei bini naikini khlainaini bini thuyam nogo huiwi tonwi kha, abo hai khe bo bono Athalia bai nukjak ya khe hui ton kha, omo hai khe Joas butharjak li ya wng kha.

³Athalia Isirijwk cháui tong phuru Jehoseba Joasno nokha bisi dok jora Subraiyungni nok kwtharo khe huiwi ton kha.

⁴Ulo nokha bisi sni phuru Jehoiada sa horwi mwrwknai tẃiphangrokno Subraiyungni nok bisingo tubu-ui bórokno kók khaui swmai tang rw kha tei habugrani bwslanobo bórokno phunuk kha.

⁵Hakhe bo bórokno hai hwnwi dagi kha, “Norok Sabat salo samungo phai khe dolthamni dolsa khe noyung ma mwrwknai,

⁶tei dolsa khe Sur duglamo tongnai tei dolsa khe a mwrwknairokni uklokni duglamo ma tongnai.

⁷Tei dolnwirok khe Sabat salo mwrwkna phainairok habugrani bagwi nokthar ma mwrwknai.

⁸Norok habugrano kitingwi tong lai di, sakni sengno tiyar khe yago ma ton bainai. Khoroksa swk phano norokni gana-o phai khe butharwi pái di, habugra tháng thani’-no bini gana-o tong di.”

⁹Sengkrak bokhorok, ochai Jehoiada dagima hai’-no Sabatni salo samung tangnani phainairokno tei samung páiwi thángnai bini bororokno bini thani tubu-ui phai kha.

¹⁰Hakhe ochai Jehoiada Subraiyungni nogo tonmani habugra Daudni olongarok tei phuirokno sengkrak bokhorokrokno yapharwi rw kha.

¹¹Mwrwknairok sak sakni da-seng yago tẃiwi háyá gana-o habugrano kiting laiwi baksa khe nok kwtharni salsibaini simi salgrabai jora mwrwk lai kha.

¹²Ulo Jehoiada habugrani bwsla Joasno tikhlaiwi tubu-ui bini bokhorogo motok thubui rw kha. Bo Joasno Kaitorni swmai bijap rw kha tei bono habugra hwnwi sakhlaiwi rw kha. Bórok bono thok phulwi rw kha, hakhe bororok yapha khorobwi, “Bugra sal kwbángma thangwi tong thung,” hwnwi chirik lai kha.

¹³Isiri Athalia mwrwknairok tei bororok chirik laimani khorang khna hor khe Subraiyungni nok kwtharo bororokni thani tháng kha;

¹⁴aro bo habugra kwtalno raida-o tongma hai khe’-no thongla gana-o bachajak nuk kha; tei bokhorokrok bai totro kotor supnairok bono kiting laijak tei bebak hani bororok tongthok laiwi, totrorok sup laijak nugwi kha. Hakhe Athalia omono nuk khe’-no bwkha hamya wngjagwi bini rírok sichigwi chirigwi hai hwnwi sa kha, “Kók rwma narwk yaui bandinaisa, bandinaisa.”

¹⁵Ochai Jehoiada nai ya Athalia noktharni amchoi-o butharjak thung, hakhe bo khorok sara sengkrakrokni bokhorokno, “Bono mwrwgwi phataro kariui tlangwi tháng di tei bono rwktharnairoknobo seng bai butharwi pái di,” hwnwi dagi kha.

¹⁶Hakhe bórok bono sók laiwi habugrani noyungo hapma lama-o korai duglamo buthar lai kha.

¹⁷Ochai Jehoiada habugra Joas tei bororokno Subraiyungni borok wngwi manna bagwi Subraiyung bai kaisa kwtal khe swmai tang rw kha tei habugra bai bororokni bisingo bo swmai tangjak kha.

¹⁸Hakhe hani bebak bororok Bal mwtaini nogo habwi aroni háyá bai takjak mwtairokno phindrik phandrak khe swbai rw kha tei háyá bwskango Bal mwtaini ochai Matanno tantharwi pái lai kha. Ochai Jehoiada Subraiyungni nok mwrwknani bagwi aro mwrwknairokno ton kha.

¹⁹Hakhe bo sengkrak, habugrano mwrwknairok noyung mwrwknairok tei bebak bororok bai khe habugrano dul laiwi Subraiyungni nok bisingni nongkhorwi noyungo mwrwknairokni duglam tẃi bodol khe tubu lai kha tei bo habugrani achukthayungo achugwi kha.

²⁰Hakhe bebak bororokno tongthokjak bai kha. Athalia habugrani nogo butharjakmani bai bebak kamiyungrok siring siring wng bai kha.

²¹Bo habugra chána cheng phuru Jehoasni umor nokha bisi sni.