Read Kok Borok 2 HABUGRA 12 Bible Online

2 HABUGRA 12 - Kok Borok bible

2 HABUGRA 12

¹Israilni habugra Jehu habugra chámani nokha bisi snini jora-o, Jehoas ha Judani habugra chána cheng kha. Tei bo Jerusalemo nokha bisik brwichi jora habugra chá lang kha. Bini bumani mung wng kha Sibia, bini kami wng kha Birseba.

²Ochai Jehoiada bono dagimani bagwi Jehoas Subraiyungni mokolo chajakma tẃi máng khlai lang kha.

³Hai phano bo buini mwtaini háyárokno sokomor li ya, abo bai bororok aroni háyá-o ratharwi satrai sógwi’-no tong lai kho.

⁴Jehoas ochairokno hai hwnwi sa kha, “Noktharo ratharmung bai baksa rangrok rwjakmano khati di, sal brúm ratharmung bai rwjakma a rangrok tei bwkha muchungwi rwmani rangrokno khati di.

⁵Khoroksa khoroksa ochai bebakno a rangno ma tubunai, abo bai samung nang phuru-o nokthar tang thani ma swbainai.”

⁶Hai phano Jehoas habugra chámani nokha bisik nwichitham káuibo ochairok noktharno snam phi li ya.

⁷Aboni bagwi Jehoas Jehoiada bai tei ochairokno ring baiwi hai hwnwi sẃng kha, “Tamo wngwi norok nokthar snam phi li ya wng lang? Tabuk norok tei rangrokno narwgwi tonwi man glak, nokthar snam phinani bagwi ma yaphar bai sinai.”

⁸Ochairok bórok tei bororokni thani rang yachak glak tei noktharno snam glak hwnwi gosi lai kha.

⁹Hakhe Jehoiada kaisa bokhok naui aboni kisicha bwlam khlaiwi Subraiyungni nok bising hapmani duglamni yagra bwkhago ton kha, aro mwrwknai ochai Subraiyungno yapharwi khulum phai baimani a rangno aro swndwk bisingo’-no ton kha.

¹⁰Habugrani tangphang tei ochai bokhorok Subraiyungni nogo tubujakmani rangno kwbángma nuk khe, abono lekhaui kholjang bisingo daui ton kha.

¹¹Bórok rwnani bagwi chongjak a rangno Subraiyungni noktharo naikini khlainani bagwi barja manjakni thani yaphar kha. A rangno Subraiyungni noktharni bagwi samung khlainairokno, buphangni samung tangnairokno tei snamnairokno rw kha,

¹²tei holong tannairokno itni samung tangnairokno rw kha, buphang painani, snam thani holong nangmarok painani tei kubun samungrokni bagwi nangma-obo rang rw kha.

¹³Tamo khe o rangrokno Subraiyungni bagwi rukphaini dangairok, totrorok tei chatirok, naithok rwna bagwi eba tei mungsa rukphai eba rangchakni manwi Subraiyungni nogo tubujakmarokno snam thani swbaijak ya.

¹⁴Abo bebak samung tangnairok bai snam thani, nangmani manwi pai thani simi se swbaijago.

¹⁵Samung tang rwna bagwi barja berjak bororok belai borok kaham gwja, aboni bagwi bahai khe buro bwswk swbai kha sẃngna nang ya.

¹⁶Samung cha yani bagwi tei sumsokni bagwi yapharjakmani a rangno khe Subraiyungni nokni rangkhógo tongjak ya; tamni hwn khe abo ochairokni banta.

¹⁷A jora-o Siriyani habugra Hajael Gat bai choba nang lai kha tei abono segwi na kha; tei Hajael Jerusalemno sek phinani bagwi khá chong kha.

¹⁸Judani habugra Jehoas bini slái swkang habugrarok tongnai Jihosapat, Jehoram tei Ahajaia bórok Subraiyungno yaphar langmarokno tei bini sak yapharmarokno phiya tei nokthar tei noyungni rangkhógo tongma rangchakrokno Siriyani habugra Hajaelno rohor kha. Hakhe Hajael bini sengkrakrokno Jerusalemni tlangwi tháng kha.

¹⁹Tabuk Joas aswk khlai langmani kókrok bebak bo tangmarokni kókrok Judani habugrarokni bosong bijabo swijak tongo.

²⁰Bini selengrok a kók chap laiwi bacha lai kha tei Joasno Sila-o thángmani lama Miloni nogo buthar lai kha.

²¹Bono butharnairok wng kha Simeatni bwsla Josakar bai Somerni bwsla Jehosabad bini seleng khoroknwirok bono swprak khe bo thwi kha, hakhe bórok bini buphasong bai baksa Daudni kamiyungo phobjak kha; hakhe bini yakchu-o bini bwsla Amajia habugra chá kha.