Read Kok Borok 2 HABUGRA 13 Bible Online

2 HABUGRA 13 - Kok Borok bible

2 HABUGRA 13

¹Judani habugra Ahajaiani bwsla Joas habugra chámani nokha bisik nwichitham phuru Israilni Samaria-o Jehuni bwsla Jehoahas habugra chá kha tei bo nokha bisi chisni jora habugra chá lang kha.

²Nebatni bwsla Jeroboam Israilrokno sumsogo khiklaima hai, Jehoahasbo abo hai’-no Subraiyungni thani samung hamya khlai kha; bo kaisa samung hamyabo yakar li ya.

³Hakhe Subraiyung Israilrokno jolijak kha, aboni bagwi bo bórokno Siriyani habugra Hajaelni yago yaphar máng tong kha. Ulo khe Hajaelni bwsla Benhadadni yago yaphar kha.

⁴Hakhe Jehoahas Subraiyungni thani chubachuni bagwi suri kha tei Subraiyung bini surimano khna kha, tamni hwn ba Subraiyung Siriyani habugra Hajael Israilrokno sátokmano nuk kha.

⁵Aboni bagwi Subraiyung Israilrokno phiyókna bagwi tẃiphang khoroksa rohor kha, bo bórokno Siriyarokni yakni phiyók kha, hakhe Israilrok swkang phuruni hai kwchang kwchang khe tongwi man kha.

⁶Hai phano bórok habugra Jeroboam Israilrokno sumsogo khiklaimani a sumsokrokno yakar li ya khe abórokno tẃiwi’-no tong lai kha tei mwtaijwk Aserani mangtangbo Samaria-o narwkjak tong kha.

⁷Jehoahasni thani sengkrakrokni bisingo khorokbachi korai kanai sengkrak, khungchi korai malkhung tei khorok chisai yakung bai himwi choba nangnai sengkrakrokno karwi tei kwrwi kha, tamni hwn ba teirokno khe Aramni habugra hadlwino kádul tẃi khe bórokno sokomor bai kha.

⁸Jehoahas aswk khlai langma tei bebak bini phanni samungrokni kók Israilni habugrarokni bosong bijabo swijak kha.

⁹Jehoahas thwi khe Samaria-o phobjak kha tei bini yagulo bini bwsla Joas habugra chá kha.

¹⁰Joas ha Judani habugra chámani nokha bisi thamchisni phuru Jehoahasni bwsla Jehoas Israilni Samaria-o habugra chánani cheng kha tei bo nokha bisichidok jora habugra chá lang kha.

¹¹Bo’-bo Subraiyungni mokolo sumsok khlai kha; Nebatni bwsla Jeroboam Israilrokno sumsogo khiklaimani sumsokrokno yakar li ya, abo hai kheno samungrok khlai kha.

¹²Tabuk Joas khlai langmani samungrokni kók tei Judani habugra Amajia bai choba khlaima kókrok Israilni habugrarokni bosong bijabo swijak tongo.

¹³Hakhe Joas thwi khe Samariani habugrarokni simalwngo phobjak kha tei bini bwsla Jeroboam habugra chá kha. Tei Joas Israilni habugrarok bai baksa Samaria-o phobjak kha.

¹⁴Tabuk Elisa hamya klai kha, hakhe bo abo bai’-no thwi kha, Israilni habugra Joas bono naina thángwi bini bwskango, “O ani apha, O ani apha! Korai malkhungrok tei Israilni korai kanairok!” hwnwi kap kha.

¹⁵Tei Elisa bono, “Kaisa badukhung bai chakhlarok na di,” hwnwi sa kha; hakhe bo badukhung bai chakhlarok na kha.

¹⁶Hakhe bo Israilni habugrano hai hwnwi sa kha, “Badukhung thon si di;” hakhe habugra abo hai khlai kha tei Elisa bini yakno habugrani yago rom kha.

¹⁷Hakhe bo hai hwnwi sa kha, “Salka phaisingni tailamno phiyok di;” hakhe bo phiyok kha. Hakhe Elisa sa phi kha, “Kok si di,” hakhe bo kok kha. Hakhe bo, “Subraiyungni kwplai chakhla Aramno páimani chakhla! Tamni hwn khe, nwng Aphego Aramiasarokno sokomor súk bai ya sak choba khlainai,” hwnwi sa kha.

¹⁸Elisa habugrano tei uáisa chakhla naui ha-o kok di hwnwi sa kha, hakhe habugra ha-o uáitham kogwi bathak kha.

¹⁹Abo bai diyari Elisa belai jolijagwi, “Nwng uáiba eba uáidok swk koknani tongmani, hakhe nwng Siriyarokno sokomor súgwi man kha mun, tabuk khe nwng uáitham se mechenwi man sinai,” hwnwi sa kha.

²⁰Elisa thwi khe bórok bono phob lai kha. Bisi brúm brúm sachlangni jora-o Moabni bodol Israil ha-o phaiwi hap lai phai-o.

²¹Salsa Israilrok kwthwi khoroksano phob laiwi tong lai phuru achomsa a sek phainai Moabni bodolrokno nuk khe’-no bórok a kwthwino Elisani mangkhoro khiklaiwi rw lai kha, hakhe Elisani bekreng nang khe’-no a borok thangchaui bacha kha.

²²Siriyani habugra Hajael Jehoahas habugra chá lang sakno Israilrokno sátok lang kha.

²³Tamo khe Subraiyung bórokno khábo khairok kha, khábo lok kha tei nabo naikhlai kha. Tamni hwn ba, Subraiyung Abraham, Isak tei Jakob bai swmai tangjak tei bórokno sokomor glak, tabuk jorabo Subraiyung bini bwskangni nor ya kho.

²⁴Siriyani habugra Hajael thwi khe bini bwsla Benhadad bini yakchu-o habugra chá kha.

²⁵Hakhe Jehoahasni bwsla Jehoas Hajaelni bwsla Benhadadno mechenwi bupha Jehoahas choba-o segwi najakmani kamiyungrokno kiphilwi segwi na phi kha. Joas bono uáitham mechenwi Israilni kamiyungrokno kiphilwi na phi kha.