Read Kok Borok 2 HABUGRA 14 Bible Online

2 HABUGRA 14 - Kok Borok bible

2 HABUGRA 14

¹Israilni habugra Jehoahasni bwsla Joas habugra chámani nokha bisik nwi phuru khe Joasni bwsla Amajia Juda-o habugra chána cheng kha.

²Bini umor nokha bisik nwichiba ká phuru bo habugra chá kha tei Jerusalemo bo nokha bisik nwichichuku jora habugra chá lang kha. Bini bumani mung wng kha Jehoadin, bo wng kha Jerusalemni bwrwi.

³Bo Subraiyungni mokolo chajakmani tẃi máng khlai kha, hai phano bini bosong Daud hai wng yaui bo bebak samung’-no bupha Joas hai khe tang lang kha.

⁴Bo kubun mwtai khulumnairokni háyáno swbai li ya, abo baino bororok aro ratharmungrok yapharwi satrairok sógwi tong lai kha.

⁵Amajiani thani habugrani phan sók phai kheno bo buphano butharnai tẃiphangrokno buthar kha.

⁶Hai phano bo a butharnairokni bwsa-bẃtẃirokno khe buthar li ya khe Musini kerongo tongma tẃi’-no khlai kha, aro Subraiyung hai hwnwi dagi kha, “Bwsarokni samung hamyani bagwi bupha butharjak glak, eba ma-phani samung hamyani bagwi bo bwsarok butharjak glak, tamo khe sak sakni samung hamyani bagwi sak’-no ma thwithai.”

⁷Amajia khorok chisai ha Idomni bororokno sóm harungo buthar kha tei bo choba khlaiwi Sela kamiyungno na kha tei abono Jokthiel hwnwi mung phar kha, tabuk jorabo o bumungno tong kho.

⁸Hakhe Amajia Israilni Jehoahasni bwsla habugra Jehoasni thani tẃitun rohorwi choba nang lainani sa hor kha.

⁹Hakhe Israilni habugra Jehoas Judani habugra Amajiani thani hai hwnwi kóktun rohor kha, “Salsa Lebanon hachukni busu bwlwng Sidar buphangno hai hwnwi sa hor kha, norokni sajwksongno ani sajlani hik wngna rw di; tamo khe Lebanonni bolongni yabrwi masa busulwngno kádulwi tháng kha.

¹⁰Tabuk Amajia, nwng ha Idomno mechenwi man kha hwnwi belai kung chuk kha tei sakno belai torjak kha, abo bai’-no khá kochomwi nogo achugwi tong si di; Nwng tamoni bagwi nini sak baithang tei nini bororokni bagwi urumuru tubuna muchungjak ba?”

¹¹Hai phano Amajia kók se khna li ya, hakhe Israilni habugra Jehoas bai Judani habugra Amajia choba nang lainani thángwi ha Judani Betsemeso dadak-didik malai laiwi choba nang lai kha.

¹²Hakhe Juda Israil bai mechenjak kha tei bebak bororok nogo khárwi tháng bai kha.

¹³Tei Israilni habugra Jehoas Ahajiani busuk tei Jehoasni bwsla Amajiano Betsemesni romwi Jerusalemo tubu-ui phai kha tei Iphraimni Duglamni simi busupni duglam jora Jerusalemni muk brwira chok deualno swbaiwi khibi kha.

¹⁴Hakhe bo bebak rangchak, rukphai tei Subraini nogo tongma bebak mairang-lotarok tei habugrani rangkhókni rangrok tei bororokno tlangwi Samaria-o kiphilwi tháng kha.

¹⁵Jehoahas aswk samung khlai langmani bini phanrokni kók tei kirima kwrwi khe Judani habugra Amajia bai choba nang laima kókrok Israilni habugrarokni bosong bijabo swijak tongo.

¹⁶Jehoas thwi khe Samariani habugrarokni simalwngo phobjak kha tei bwsla Jeroboam bini yakchu-o habugra chá kha.

¹⁷Judani habugra Joasni bwsla Amajia, Jehoahasni bwsla tei Israilni habugra Jehoas thwimani yagulo nokha bisi chiba kwthang tong lang kha.

¹⁸Bebak Amajia samung tang langmani kókrok ha Judani habugrarokni bosong bijabo swijak tongo.

¹⁹Bórok a jora-o Jerusalemo Amajiano butharnani chap lai kha, hakhe bo Lakhiso khárwi tháng kha, hai phano bini arirok riphrigwi thángwi bono buthar kha.

²⁰Bórok bono Jerusalemo korai saka-o boksaui tubu-ui phai kha, hakhe Daudni kamiyungo’-no buphasongni simalwngo phob kha.

²¹Hakhe ha Judani bebak bororok buphani yakchu-o nokha bisi chidok kádrop bwsla Ujiano habugra chá rw lai kha.

²²Ujia bupha thwimani ulo Elatno segwi naui tisa phi kha.

²³Nokha bisi chiba-o Joasni bwsla Amajia Judani habugra wng kha, Joasni bwsla habugra Jeroboam Israil tei Samaria-o habugra chá kha.

²⁴Tei bo Subraiyungni mokolo chajak ya samungrok máng tang kha, bo Nebatni bwsla Jeroboam Israilrokno sumsogo khiklaimani a sumsokrokno yakar li ya.

²⁵Bo Gat-hepherni Amitaini bwsla Jonani khúk tẃi khe Israilni Subraiyung Kaitor sama tẃi’-no Israilni ha ari Lebohamatni simi hakchalni Araba twijlang jora segwi yago na phi kha.

²⁶Tamni hwn ba Subraiyung Israilrokno belai tekto manẃi tongmano nuk kha, aro khoroksa phano bórokno chubanai kwrwi kha.

²⁷Tamni hwn ba Subraiyung Israilrokno o ha sakani sokomor suknai hwnwi sa ya ba bo Joasni bwsla Jeroboamni yak tẃi mwthang kha.

²⁸Jeroboam aswk samung khlai langmarokni kók tei bini phanni kók tei ha Judani Hamat bai Damaskosno ha Israilni bagwi segwi namano Israilrokni habugrarokni bosong bijabo swijak ya diba?

²⁹Jeroboam thwi khe Israilrokni simalwngo phobjak kha, tei bwsla Sakaria bini yakchu-o habugra chá kha.