Read Kok Borok 2 HABUGRA 15 Bible Online

2 HABUGRA 15 - Kok Borok bible

2 HABUGRA 15

¹Israilni habugra Jeroboamni nokha bisik nwichisni habugra chámani jora-o, Juda-o Amajiani bwsla Ajaria habugra chánani cheng kha.

²Bo habugra chá phuru, bo nokha bisi chidokni borok. Bo Jerusalemo nokha bisi bachinwi habugra chá lang kha. Bini bumani mung wng kha Jekolia, Jerusalemni bwrwi.

³Bo Subraiyungni mokolo chajakma haino bupha Amajia khlaima haino khlai kha.

⁴Hai phano buini bororok khulummani háyárok khe swbaijak ya, hakhe bororok aro ratharmung yapharwi satrai sók laiwi tong kha.

⁵Subraiyung Ujiano biyadi bemuk bai thwi yasakno manjak rw kha, bo bui bai kisa hakchalni nogo khe ma tong kha tei bini bwsla Jotham núkhungni bugra wngwi bini lukurokno naikini ma khlai kha.

⁶Ujia aswk samung khlai langmani Judani habugrarokni bosong bijabo swijak tong ya diba?

⁷Hakhe Ujia thwi khe Daudni kamiyungni buphasong bai baksa simalwngo phobjak kha tei bini bwsla Jotham bini yakchu-o habugra chá kha.

⁸Judani habugra Ujia habugra chámani nokha bisi thamchichar phuru, Jeroboamni bwsla Sakaria Israil hani Samaria-o nokha taldok jora habugra chá lang kha.

⁹Bo Subraiyungni mokolo bupha khlai tẃi chajak ya samung máng khlai lang kha. Nebatni bwsla Jeroboam Israilrokno sumsogo khiklaimani a sumsokno bo yakar li ya.

¹⁰Jabesni bwsla Salum bono kebengsa kha tei Ibliamo[5] kosonwi swpragwi buthar kha tei bini yakchu-o habugra chá kha.

¹¹Sakaria aswk khlai langmani samungrokni kókno Israilrokni habugrarokni bosong bijabo swijak tongo.

¹²Omo Subraiyung habugra Jehuno hai hwnwi swmai tangwi rwmani, “Nini bosong kaibrwi jora Israilni habugra chánai abo nang phai kha.”

¹³Ha Judani habugra Ujia habugra chámani nokha bisik thamchi chuku phuru Jabesni bwsla Salum Israilo habugra chá kha teibo Samaria-o nokha talsa jora habugra chá lang kha.

¹⁴Gadini bwsla Menahem Tirjani Samaria-o phaiwi Jabesni bwsla Salumno buthar kha tei bini yakchu-o habugra wng kha.

¹⁵Salum aswk khlai langmani samungrok tei bini hamya chapmanirok Israilni habugrarokni bosong bijabo swijak tong kha.

¹⁶Menahem Tirja-o kiphil phuru bo Tapuani[6] kamiyungo tongnairokno amchoi gwnangwi sokomor súgwi pái kha, tamni hwn ba a kamiyung bini thani lon li ya. Bo bebak bwrwi sak kupulungrokno bohok raphru-ui buthar bai kha.

¹⁷Habugra Ajaria Juda-o habugra chámani nokha bisi thamchichuku phuru-o Gadini bwsla Menahem Israilni Samaria-o nokha bisi chi jora habugra chá lang kha.

¹⁸Bo Subraiyungni mokolo chajak ya samungno tang kha tei Nebatni bwsla Jeroboam Israilrokno sumsogo khiklaimani a sumsokno kwthang tong lang sak yakar li ya.

¹⁹Asiriyani habugra Pul hano choprokna phai phuru khe Menahem bini hano dera-o klai ya khe tonwi chubana bagwi Pulno kilo thamchibrwi rukphai rw kha.

²⁰Menahem bebak Israilni rang gwnangrokni thani borok thwgwi’-no rukphai budul bachi khe khangwi Asiriyani habugrano rw kha. Hakhe Tiglat-Pilesar arono bini ha-o kiphilwi tháng kha.

²¹Menahem aswk samung khlai langmani Israilni habugrarokni bosong bijabo swijak kha.

²²Bo thwi khe phobjak kha, bini bwsla Pekahia bini yakchu-o habugra chá kha.

²³Ha Juda-o Ujia bisi bachi habugra cháui tong phuru Menahemni bwsla Pekahia Israilni Samaria-o nokha bisik nwi habugra chá kha.

²⁴Bo Subraiyungni mokolo chajak ya samung khlai kha, bo Nebatni bwsla Jeroboam Israilrokno sumsogo khiklaimani a sumsokno yakar li ya.

²⁵Pekahia sengkrak bokhorok khoroksa Remaliani bwsla Peka Giliadni borok khorok bachino tẃiwi kók chabwi Samaria noyungni[7] nok bisingono buthar kha, ulo Peka bini yakchu-o habugra chá kha.

²⁶Peka aswk khlai langmani Israilni habugrarokni bosong bijabo swijak kha.

²⁷Ujia Juda-o habugra chámani nokha bisi bachinwi phuru Remaliani bwsla Peka Israilni Samaria-o nokha bisi nwichinwi jora habugra chá kha.

²⁸Bo Subraiyungni mokolo chajak ya samung máng khlai lang kha, bo Nebatni bwsla Jeroboam sumsok khlaiwi Israilrokno sumsogo khiklaimani hai a sumsokno yakar li ya.

²⁹Israilo Peka habugra cháui tongmani jora-o Asiriyani habugra Tiglat-Pilesar, Ijon, Abel-bet-maka, Janoa, Kades, Hajor, Giliad kamiyungrokno tei Galili, Naptalini bebak hani bororokno bo segwi naui aroni bororokno khaui Asiriya-o tlangwi tháng kha.

³⁰Ha Juda-o Ujiani bwsla Jotham habugra chámani nokha bisik nwichi phuru Elani bwsla Hosea, Remaliani bwsla Pekano butharnani chap kha tei bono butharwi bini yakchu-o habugra chá kha.

³¹Peka aswk samung khlai langmani bebak Israilrokni habugrarokni bosong bijabo swijak kha.

³²Remaliani bwsla Peka Israil ha-o habugra chámani nokha bisik nwi phuru-o Ujiani bwsla Jotham ha Judani habugra chá kha.

³³Nokha bisi nwichiba phuru habugra chánani chengwi Jerusalemo nokha bisi chidok habugra chá kha. Bini buma wng kha Sadokni bwsajwk Jerusa.

³⁴Bo Subraiyungni mokolo bupha Ujia khlai langmani hai chajakma tẃi’-no khlai lang kha.

³⁵Hai phano buini mwtaini háyárokno sokomor lang li ya, bororok aro ratharmung yapharwi satrai sók lai kha. Jotham Subraiyungni noktharni sakani duglamno snam lang kha.

³⁶Jotham aswk samung khlai langma Judani habugrarokni bosong bijabo swijak kha,

³⁷bo habugra cháui tongmani jora-o Subraiyung Siriyani habugra Rejin bai Israilni habugra Pekano Judano seknani rohor kha.

³⁸Jotham thwi khe Daudni kamiyungni simalwngo phobjak kha tei bwsla Ahas bini yakchu-o habugra chá kha.