Read Kok Borok 2 HABUGRA 16 Bible Online

2 HABUGRA 16 - Kok Borok bible

2 HABUGRA 16

¹Remaliani bwsla Peka Israilo habugra chámani nokha bisi chisni phuru-o, Jothamni bwsla Ahas ha Juda-o habugra chá kha.

²Ahas nokha bisi nwichi phuru habugra chánani chengwi Jerusalemo nokha bisi chidok jora habugra chá lang kha. Bini chuchu Daud khlaimani hai bo Subraiyungni mokolo chajakmani samungrok khlai lang li ya.

³Tamo khe bo Israilni habugrarokni tongmani tẃi’-no tong kha. Bo bini sajlano suda buini dopharok selengmasingcha tongmung tongwi Israilrokni slái swkang Subraiyung rwkhlai rohorma dopharok tong tẃi’-no bo bini sajlano suda hóro sógwi yaphar kha.[8]

⁴Bo hachukni háyárogo, hatháirogo tei bebak buphang yaphangrogo, ratharmung tei yapharmungrok yaphar kha.

⁵Hakhe Siriyani habugra Rejin tei Remaliani bwsla Peka Israilni habugra Jerusalemno choba nang laina bagwi phai kha; bórok Ahasno gerebwi ton kha, hai phano bono mechenwi man li ya.

⁶A jora-o [9] Idomni habugra:[10] Elatno Edomni bagwi man phi kha tei ha Judairokno Elatni[11] rwkhlaiwi rohor kha. Hakhe Idomsarok Elato phai kha tei tabukbo bórok arono tong kho.

⁷Hakhe Ahas Asiriyani habugra Tiglat-Pilesarni thani borok rohorwi, “Ang nini seleng tei nini bwsa ja se! Ano kebengwi bachanai Siriyani habugrani yakni tei Israilni habugrani yakni phiyók phai gra di,” hwnwi sa hor kha.

⁸Tei Ahas Subraiyungni nok kwtharni rangchak, rukphairok tei habugra nokni rangkhókni rang-rírok naui Asiriyani habugrani thani hili rohor kha.

⁹Asiriyani habugra bini kókno khna kha; Asiriyani habugra Damaskos bai nang lainani tháng kha tei segwi na kha, aroni bororokno romwi ha Kiro tlangwi tháng kha; hakhe bo Rejinno buthar kha.

¹⁰Habugra Ahas Damaskoso Asiriyani habugra Tiglat-Pilesar bai malainani tháng khe, bo Damaskoso tongmani a háyáno nuk kha. Hakhe habugra Ahas a háyá bahai khe snamjak kha bebak srai-srai khe swiwi ochai Uriani thani rohor kha.

¹¹Ochai Uria háyáno snam kha; habugra Ahas Damaskoso tong twtwi sa horma hai khe’-no snam kha. Habugra Damaskosni kiphilwi phainani swkangno ochai Uria a háyáno snam kha.

¹²Habugra Damaskosni kiphilwi phai khe aro háyáno nuk phai kha. Hakhe habugra háyá gana-o tháng kha tei aro yapharmung yaphar kha.

¹³Tei bo aro bini sógwi yapharmung yaphar kha, bwthái bwchlwi yapharmung yaphar kha, nungmungni yapharmung lukhlaiwi rw kha tei khakchangni yapharmungni thẃi háyá saka-o sarcha kha.

¹⁴Bo Subraiyungni bwskango tongnai pitolni háyáno, noktharni bwskangni tei bini háyá bai Subraiyungni háyá kwcharni norwi kwtal háyáni salgrabai phaising ton kha.

¹⁵Hakhe habugra Ahas ochai Uriano hai hwnwi sa kha, “Háyá kwtal kotor kuk saka-o phungni sógwi yapharmung tei sarikni bwthái bwchlwi yapharmung, habugrani sógwi yapharmung bai bwthái bwchlwi yapharmung tei hani bebak bororokni sógwi yapharmung bai bórokni bwthái bwchlwi yapharmung tei bórokni nungmung, yapharmung yaphar di; tei bini saka-o bebak yapharmani thẃirokno aro sar di. Hai phano pitolni háyá khe ani bagwi Subraiyungno sẃngnani bagwi narwk di.”

¹⁶Ochai Uria habugra Ahas dagimani tẃi’-no bebak khlai kha.

¹⁷Ulo habugra Ahas dangai achuk rwmani yakungrokno tansu-ui páiwi dangaino aroni nor kha; bo pitolni chinwi musuk saka-o achuk rwjak dangainobo norwi abono holongdap saka-o achuk rw kha.

¹⁸[12] Tei Asiriyani habugrano khá ham rwna bagwi noyungni bisingo snamjak lama tei Subraiyungni nogo habugra hapmani lamano muthupjak kha.[13]

¹⁹Ahas aswk samung khlai langmarok ha Judani habugrarokni bosong bijabo swijak kha.

²⁰Ahas thwi khe Daudni kamiyungni habugrarokni simalwngo phobjak kha tei bwsla Hejekia bini yagulo habugra chá kha.