Read Kok Borok 2 HABUGRA 17 Bible Online

2 HABUGRA 17 - Kok Borok bible

2 HABUGRA 17

¹Ha Judani habugra Ahas nokha bisi chinwi jora-o habugra cháui tong phuru-o, Elani bwsla Hosea Israilo habugra chánani chengwi Samaria-o nokha bisi chuku jora habugra chá lang kha.

²Bo Subraiyungni mokolo chajak ya samung máng khlai kha, hai phano bini slái swkang Israilni habugrarok hai le wng ya.

³Asiriyani habugra Salmaneser phaiwi bo bai nang laina phai kha; Hosea Salmaneserni yago kechen gosiui bisi brúm brúm rang ma rw kha.

⁴Tamo khe Asiriyani habugra Hoseano’-no hamya chapmano saui man kha; aboni bagwi bo Ijipni habugra Suni thani tẃitun rwui rohor kha, hai phano bisi brúm brúm rang rwmani hai mungsa hili tubu li ya. Aboni bagwi Asiriyani habugra bono khaui tlangwi chobwi ton kha.

⁵Hakhe Asiriyani habugra Israilni bebak hano segwi na kha tei Samaria jora sók phai kha; nokha bisik tham bini yapha-o chobwi ton kha.

⁶Asiriyani habugra Hosea Samariano segwi namani nokha bisi chuku phuru-o bo Israilrokno Asiriya-o tlangwi tháng kha. Bo bórokno Hala-o, Gojan twima rukungni Haboro tei Medesni kamiyungrogo ton kha.

⁷O kirimasingcha phaima khe Israilni bororok Subraiyung Kaitorno kebengwi sumsok khlai kha, bo se bórokno Ijipni habugra Pharaoni yakni phiyógwi tubu-o. Bórok kubun mwtairokno khulum kha,

⁸tei Subraiyung Israilrokni slái swkang béng khlaiwi rohorjaknai dopharokni tongmung chámungno tẃi lai kha tei Israilni habugra tongmung chámung rwmano rwksa lai kha.

⁹Tei Israilni bororok Subraiyung bórokni Kaitorni thani khogwi samung hamya khlai kha. Bórok bebak kamiyungrogo tei kami steni simi kami kotor jora bebago’-no khulumna bagwi kubun dopharokni mwtairokni háyárok snam lai kha.

¹⁰Bórok bebak hatháirogo tei buphang yaphangrogo holongni thonglarok tei Asera mwtaini mangtangrok snam kha.

¹¹Subraiyung bai swkango béng khlaiwi rohorjaknai bororok khlaimani hai bórokbo buini mwtaini háyárogo satrai sók lai kha; bórok bebak samung hamya khlaimani bai Subraiyungno joli rw lai kha.

¹²Subraiyung takjak mwtairokno ta khulum di hwnwi dagimani kókno khna li ya.

¹³Subraiyung Israil bai ha Judano bini tẃitunrokno tei diyarirokno rohorwi khoraiwi hus khe rwui hai hwnwi sa kha, “Lama hamyarok yakar di, ang nini chuchusongno rwmani kerongrok tei ani seleng diyarirokni yak tẃi norokno rwmani kerongni kóktháirokno tẃi si di.”

¹⁴Hai phano bórokni chuchusong Subraiyung bórokni Kaitorno poito chá li ya wngmani haino bórokbo bwkha kwrak wngwi bini kók khna li ya gwja.

¹⁵Bórok bini phrwngmarokno nor lai kha tei bórokni chuchusong bai swmai tangmani tei bórokno khoraimani kókrokno narwk lai li ya. Bórok tatal mwtairokno khulum lai kha tei tatal wng bai kha; bórokno kitingwi tongnai dopharokni tongmung tẃi ta tong lai di hwnwi samani tẃi’-no bórok tong lai kha.

¹⁶Subraiyung bórokni Kaitorni bebak dagimarokno khibiui bórok sak sakni bagwi musuk bwsa tak lai kha tei bórok Asera mwtaijwkni mangtang tak laiwi bebak nokhani mwtairokno tei Bal mwtaino khulum lai kha.

¹⁷Tei bórok bórokni sajwk sajlarokno ratharwi hóro sógwi yaphar lai kha, swkal wng lai kha, beduarok srwng lai kha tei sak sakno samung hamya khlainani bagwi phal baiwi Subraiyungno joli rw kha.

¹⁸Aboni bagwi Subraiyung Israilrokno jolijagwi bini mokol bwskangni nor kha; Juda bosongno karwi tei kaisabo tong rwk li ya.

¹⁹Phiya Judani bororokbo abo hai’-no bórokni Subraiyung Kaitor dagimano narwk li ya, tamo khe Israilrok songchamani raidarokno se tẃi lai si-o.

²⁰Hakhe Subraiyung Israilni bebak bosongno khibi kha; bo bórokno majra rw kha tei bini mokol bwskangni komor yasakni bagwi tanthar-súthar khlainairokni yago yapharwi rw kha.

²¹Tamni hwn khe Subraiyung Israilno Daudni núkhungni swkak kha tei bórok Nebatni bwsla Jeroboamno habugra snam kha. Hakhe Jeroboam Israilrokno Subraino yakar rw bai kha tei sumsok kotorma khlai rw kha.

²²Israilni bororok Jeroboam bebak sumsok khlaimani lama tẃi him lai kha.

²³Subraiyung bini seleng diyarirokni khúk tẃi sama haino Israilrokno bini mokol bwskangni sokomor bai yasak’-no abo hai khlai kha. Hakhe Israilrok bórokni sak sakni hani Asiriya ha-o khaui tlangjagwi tini jorabo chopjagwi ma tong kho.

²⁴Asiriyani habugra Babilon, Kutha, Aba, Hamat tei Sepharbaimni bebak bororokno Israilni sak slái-o bórokno tubu-ui Samariani kamiyungrogo achuk rw bai kha. Bórok bebak Samaria hano naui aroni kamiyungrogo tong lai kha.

²⁵Bórok aro tong phai gra phuru-o Subraiyungno khulum ya gwja; aboni bagwi Subraiyung bórokni thani singhorokno rohor kha tei bórokni bere baksano khe uáthar bai kha.

²⁶Hakhe Asiriyani habugra hai hwnwi sajak kha, “Nwng Samariani kamiyungo achuk rwmani bororok a hani mwtaini kerongno saui man ya, aboni bagwino o mwtai bórokni thani singhorokno rohorwi rw kha. Bórok bórokno uáthar bai kha, tamni hwn khe bórok a hani mwtaini kerongno si ya gwja.”

²⁷Hakhe Asiriyani habugra hai hwnwi dagi kha, “Norok romwi tubumani aroni ochairokni bisingo khoroksano rohor gra di, bo’-no[14] aro thángwi tongwi si thung tei a hani mwtaini kerongno phrwngwi thung.”

²⁸Hakhe Samariani romwi tlangjaknairokni bere khoroksa Bethelo phaiwi tong phai kha; tei bahai khe Subraiyungno khulumna nang abono phrwng kha.

²⁹Hai phano joto dopharok tabukbo sak sakni mwtaino tak laiwi Samariarok snam langmani háyárokno ton lai kha, dopharok jotono bórok tong laima kamiyungrogo abo hai khlai lai kha.

³⁰Babilonni bororok bórokni mwtai Sukot-benot, Kutni bororok khe Nergal; Hamatni bororok khe Asimani mangtangno tak lai kha;

³¹tei Abitni bororok khe Nibas tei Tartakni mangtang tak kha; tei Sepharbaimni bororok khe bórokni bwsarokno mwtai Adramelek bai Anamelekni thani sógwi yaphar lai kha.

³²O bororok Subraiyungnobo khulum lai kha tei bórokni bisingni tongma bebak bodolni bororokno ochaini samung khlaina bagwi tei bórokni bagwi háyá-o ratharwi barokna bagwi saiwi na lai kha.

³³Hakhe bórok Subraiyungno khulum lai kha tei bórok romwi tubujagwi ma phaimani hani dopharokni mwtairoknobo bórokni tongmung tẃi khe khulum lai kha.

³⁴Tabuk jorabo bórokni tongmung kwchamno tẃi lai tong lai tong kho. Bo Israil hwnwi mung pharmani Jakobni bosongno rwmani kerongrok tei dagimarokno twbo tẃi li ya tei Subraiyungnobo khulum li ya.

³⁵Subraiyung bórok bai swmai tangwi bórokno hai hwnwi dagi kha, “Norok tei kubun mwtairokno ta khulum di, bórokni thani khorok ta bom di tei bórokno ta mon di, ratharwibo ta yaphar di,

³⁶tamo khe norok ani kók se khna di, Subraiyung se norokno ha Ijipni yak phologwi phan bai khe phiyógwi tubu-o, norok bono simi ratharmung yapharwi khulum di.

³⁷Norokni bagwi swiwi rwjakmani kerongrok, raidarok, kókbitirok tei dagimarokno rwjakmarokno khir khir khe tẃi di. Norok tei kubun mwtairokno ta khulum di,

³⁸ang norok bai swmai tangmano ta pok di tei kubun mwtairokno ta khulum di.

³⁹Norokni Subraiyung Kaitorno simi se khulum di. Bo se norokno bebak arirokni yakni phiyóknai.”

⁴⁰Hai phano a bororok kók khna li ya, bórok swkango tong tẃi khe’-no tongmung kwchamo tong lai kha.

⁴¹Hakhe a dopharok Subraiyungno khulum lai-o tei bórokni takjak mwtairoknobo khulum lai-o; abo haino bórokni bosongrok kusung kusung tabuk jorabo bórokni khlaima hai’-no khlaiwi tong lai-o.