Read Kok Borok 2 HABUGRA 18 Bible Online

2 HABUGRA 18 - Kok Borok bible

2 HABUGRA 18

¹Elani bwsla Hosea Israilni habugra chámani nokha bisik tham phuru-o, Ahasni bwsla Hejekia ha Judani habugra chá-o.

²Bo habugra chá phuru-o bini umor nokha bisik nwichiba wng kha tei bo Jerusalemo nokha bisik nwichichuku jora habugra chá lang kha. Bini bumani mung wng kha Abi, bo Sakariani bwsajwk.

³Bo Subraiyungni mokolo chajakma haino bo búchu Daud samung khlaima haino khlai lang kha.

⁴Bo kubun mwtairokni thongla háyárokno nor bai kha tei takjak mwtairokno swbai kha, thonglarokno swbai bai kha, Asera mwtaini mangtangno tanwi pái kha. Bo Musi snammani pitolni chibuknobo swbai kha, a jora-obo Israilrok aro satrai sók lai kho, abono Nehustan hwnjago.

⁵Bo Israilni Subraiyung Kaitorno poito klai kha; ha Juda-o khoroksa phano bo hai habugra kwrwi, bini slái swkangobo kwrwi tei ulobo kwrwi.

⁶Subraini kókno kaham khe narwgo tei uáisa phano bo kók khna ya wng ya; Subraiyung Musino dagimung rwmarokno kaham khe tẃi lang kha.

⁷Tei Subraiyung bo bai baksa tongo; hakhe bo thángma’-ono bebak samungrok cha kha. Bo Asiriyani habugra bai choba nang lai kha tei bo bono mon li ya.

⁸Bo Philistiasarokno mechen kha, aro Gaja jora tei kami steni simi chengwi kamiyung kotor kuk jora bebak amchoirokno segwi na bai kha.

⁹Tabuk Hejekia habugra chámani bisik brwi phuru-o tei Elani bwsla Hosea Israilni habugra chámani bisi snini jora-o Asiriyani habugra Salmaneser Israilo hap phaiwi Samariano kebengwi bacha kha tei gerebwi ton kha.

¹⁰Nokha bisik thamni ulo khe Asiriyarok abono na kha. Hakhe Hejekia habugra chámani bisi dokni jora tei Hosea habugra chámani khe bisi chuku ká kha.

¹¹Asiriyani habugra Israilrokno khaui Asiriya-o tlang tháng kha; tei baksano khe Hala-o tonwi kha tei baksano Gojan amchoini twima Habor gana-o tei baksano khe Medesni kamiyungrogo tonwi kha.

¹²Omo wngmani khe bórok Subraiyung Kaitorni kók khna li yani bagwi se, tamo khe Subraiyung bini seleng Musino dagimani tei swmairokno swbai kha; dagimarokno bórok khwbo khna li ya; twbo tẃi li ya.

¹³Hejekia habugra cháui tongmani nokha bisi chibrwi phuru Asiriyani habugra Senacherib ha Judani bebak kamiyungrokno swprak kha tei mechenwi segwi na bai kha.

¹⁴Judani habugra Hejekia Asiriyani habugrano Lakhiso tong phuru hai hwnwi sa hor kha, “Ang cha ya khlai kha; tei ta hap phai si di, nwng sanmani hai’-no ang rw sinai.” Asiriyani habugra Hejekiano rukphai 10,000 kilo tei rangchak 1,000 kilo bono rw di hwnwi sa kha.

¹⁵Hakhe Hejekia bebak Subraiyungni nogo manmani rukphai bai habugrani nokni rangkhógo manmanirokno rohor kha.

¹⁶O jora-o habugra Hejekia tei bo Subraiyungni nokni duglamo tongmani rangchakno na kha; bo duglamo thongla-o narwkmani rangchakno bo bebakno Asiriyani habugrano rohor bai kha.

¹⁷Asiriyani habugra Lakhisni sengkrak bokhorok khorokthamrok bai khe bodol kwbángma Jerusalemo Hejekia bai choba nang lainani rohor kha; bórok Jerusalemo sók phai khe kuchuk saka pukhirini twi phaima lama rí súnairokni khola-o bathak lai kha.

¹⁸Hakhe bórok habugra Hejekiano narohor khe bini khoroktham tẃiphangrok bórok bai malaina tháng kha, Hilkiani bwsla Eliakim; bo noyungni barja; Sebna khe tangphang; tei Asapni bwsla Joa khe swiwi narwknani barja.

¹⁹Asiriyani tẃiphang khoroksa hai hwnwi sa kha, “Hejekiano thángwi hai hwnwi saui di, ‘Bahai khe bo ba kiri ya khe, khá beraui man kha? abo habugra kotor sinani nai-o.

²⁰Nwng ahai’-no kókrok simi saui uansuktang chapmano da chobani bagwi phan hwnwi chong? Sabono bwkha berauiba nwng ano kebengwi bacha?

²¹Tabuk nwng ba Ijipno se chubanai hwnwi bwkha beraui tongo, abo le pekhokjak himjaknai latha tẃimani hai se, abono sungnairokni khe yak se kwsa chanai. Ijipni habugra Pharaono bwkha beranairok abo hai’-no wngnai.

²²Tamo khe norok ano, “Chwng Subraiyung chini Kaitorni thani simi se khá bera-o,” hwnwi sa khe, omo ba Hejekia háyá bai kuchukrokni khulumthairokno swbaiwi ha Juda tei Jerusalemni bororokno norok, “Jerusalemo o háyá-o khulum di hwnwi samani ya diba”?

²³Phai di, nwng tabuk ani bugra Asiriyani habugrani thani sa phai di; tumungno nwng korai kanairokno rwui man khe ang nono korai mak nwisai rwnai.

²⁴Nwng korai malkhung tei korai kanai sengkrakni bagwi Ijipno bwkha beraui tong khe, norok bahai khe ani bugrani sengkrak kotoi khoroksano lachi rwui mannai?

²⁵Subraiyungni chubamano karwi da ang oro choba khlaiwi sokomor phai-o hwnwi tong? Subraiyung baithangno ano thángwi bebak sokomorwi di hwnwi sa-o.’ ”

²⁶Ulo Hilkiani bwsla Eliakim, Sebna tei Joa Rabsakeno hai hwnwi sa kha; “Arami kók bai se nini selengrokno sa di; chwng abono se buchi-o; chwngno Hibru kók bai ta sa di; deualo tongnai bebak bororok abo khna bai-o.”

²⁷Tamo khe Rabsake bórokno hai hwnwi sa kha; “Ani bugra ba a kókrokno nini bugrano tei nono sanani bagwi da rohor lang tei norok bai baksa swraimung nangjak a deualo achuk laijakrok norok bai baksa sak sakni khi chánani tei sẃtwi nungnani bagwi achugwi tongnairokni thanibo rohor ya diba?”

²⁸Hakhe Rabsake bachaui Hibru kók bai chirigwi hai hwnwi sa kha; “Asiriyani habugra kotor norokno samani kókno khna di!

²⁹Habugra hai hwnwi sa-o; ‘Hejekia bai norok ta bandijak di, tamni hwn khe bo norokno ani yakni phiyógwi man glak;

³⁰eba Hejekia bai Subraiyung chwngno kubui’-no phiyóknai; tei o kamiyungrokno Asiriyani habugrani yago yapharjak glak hwnwi sama bai Subraiyungni thani khá ta bera rwjak di.’

³¹Hejekiani kók ta khna di; tamni hwn khe Asiriyani habugra hai hwnwi sa-o: ‘Ang bai kók khaui tong kwchang tong di tei kamiyungni nongkhorwi phai di; hakhe norok bebak sak sakni angur, khwichang tei sakni twikhorni twi nungwi mannai.

³²Ang sak baithang phaiwi norokno norokni sak sakni ha hai-o aro chámung bai nungmung kupulung, olib bai piya bwtwi kupulung norok aro tongwinai tei aro thwi phlai glak. Tamo khe Hejekiani kók ta khna di; Subraiyung chwngno phiyóknai hwnwi saui norokno lama koró rwnai.

³³Asiriya habugrani yakni kaisa swk dopharokni mwtai bórokni hano phiyógwi da man kha ba?

³⁴Hamat bai Arpadni mwtairok buko buro wng bai kha? Sepharbaim, Hena tei Ibauni mwtairok le tabuk buro wng kha? Bórok ani yakni Samariano phiyógwi da man kha?

³⁵Aswk mwtairokni bisingo saboni mwtai ba bórokni hano ani yakni phiyógwi man kha; hakhe bahai khe Subraiyung ani yakni Jerusalemno phiyókthai klai?’ ”

³⁶Hakhe bororok siring siring tong lai kha; habugra dagimani tẃi’-no bórok mungsa kók pung lai li ya.

³⁷Hakhe noyungni barja manjak Hilkiani bwsla Eliakim tangnokni bokhorok Sebna tei swinaisa Asapni bwsla Joa khá khamwi bórokni rírok sichik lai kha; tei Rabsakeni samani kókno bono sa lai kha.