Read Kok Borok 2 HABUGRA 19 Bible Online

2 HABUGRA 19 - Kok Borok bible

2 HABUGRA 19

¹Habugra Hejekia o kókno khna khe’-no bini rírok sichik kha, rí soroi kanwi Subraiyungni nok bisingo tháng kha.

²Bo habugrani noyung naikolnai Eliakim, swinaisa Sebna tei ochai okrarokno rí soroi kan rwui Amosni bwsla Jisaia diyarini thani rohor kha.

³Bórok bono hai hwnwi sa kha, “Hejekia hai hwnwi sa-o, tinini sal le tektoni sal; kuljakmani sal tei lachimungni sal; bwsa bána phuru phan kwrwini sanchwgwi man ya hai se.

⁴Omo hai wng khna Asiriyani habugra bini borok Rabsakeno rohorwi Kaitor kwthangno mwkhang sókna rohor kha; tei Subraiyung nini Kaitor abo tẃi mwkhang sókmarokno khna thung tei abo sanairokno sátok thung. Abo baino nwng karwi klangjak bororokni bagwi suri di.”

⁵Habugra Hejekiani selengrok Jisaiani thani phai lai khe,

⁶Jisaia bórokno hai hwnwi sa kha; “Norokni bugrano sa di; Subraiyung hai hwnwi sa-o; ‘Asiriyani selengrok Subraiyung nono mwthangwi man ya hwnwi samano nwng ta kiri di;

⁷Nai di ang bono kaisa phola bai kobol rwnai, hakhe bo kók tatal khnaui sakni ha-o kiphilwi ma thángnai; tei bini sakni ha-o seng bai thwi rwnai.’ ”

⁸Hakhe Rabsake kiphilwi tháng kha tei nuk kha Asiriyani habugra Libna bai choba nang laiwi tong lai kha; tamni hwn khe bo habugrano Lakhis yakarwi tháng kha hwnwi khna kha.

⁹Hakhe habugra khna kha Ithiopiani Tirhaka nwng bai choba nang lainani phai kha, bo Hejekiani thani tei uáisa tẃitun rohorwi hai hwnwi sa hor kha,

¹⁰“Nwng ha Judani habugra Hejekiano sa di: Asiriyani habugrani yago Jerusalemno yapharwi rwjak glak hwnwi saui nwng poito chámani Kaitor nono ta bandi thung.

¹¹Nai di, nwng Asiriyani habugrarok bebak hano aswk khe sokomorma kókno khna kha; hakhe nwng yógwi mannai hwnwi da chong?

¹²Ani chuchusong sokomor langmani dopharok Gojan, Haran, Rejep tei Telasaro tongnai Bethedenni bororokni mwtairok bórokno phiyógwi da man kha?

¹³Hamat, Arpad, Sepharbaim, Hena tei Ibauni habugrarok biyango tháng bai kha?”

¹⁴Habugra Hejekia tẃitunni yakni kóktun manẃi pori kha, Hejekia Subraiyungni nokthar bisingo habwi abono Subraiyungni bwskango a kóktunno phehel kha.

¹⁵Hakhe Hejekia Subraiyungni thani suriui hai hwnwi sa kha, “O Subraiyung, Israilrokni Kaitor, bwkrang gwnang mangrokni saka-o achuknaisa, nwng simi se Kaitor, bebak hano nini yapha-o se tono, nwngno nokha bai hano snamo.

¹⁶O Subraiyung tabuk nwng khunju kaiwi khna ja di; o Subraiyung nini mokol phiyogwi nai di; Senacherib kwthang Kaitorno mung hamya khe samano khna di.

¹⁷O Subraiyung chwng kubui’-no saui mano, Asiriyani habugrarok kwbángma dopharokno sokomor kha tei bórokni hano bukcha khlai kha,

¹⁸tei bórokni mwtairokno hóro khiklaiwi sógwi pái kha; tamni hwn khe bórok mwtairok wng ya, borokni yak bai buphangni tei holongni snammani se, aboni bagwi bebak’-no sokomorjak bai kha.

¹⁹Tabuk Subraiyung chini Kaitor, ang nono koi ja-o, chwngno bini yakni phiyók ja di, hakhe o ha sakani bebak dopharok, ‘Nwng simi se Subraiyung Kaitor hwnwi saui man anw.’ ”

²⁰Hakhe Amojni bwsla Jisaia Hejekiani thani tẃitun rohorwi hai hwnwi sa hor kha, “Omo Israilni Kaitor hai hwnwi sa-o, Asiriyani habugra Senacheribno tẃiwi surimano ang khna kha.

²¹Omo se Subraiyung bini bagwi kók samani; bo nono nor kha, bwrwi sikla Jerusalem nono hamya hwnwi hwn kha,

²²nwng sabono thesra khlai tei kebeng? Saboni bagwi nwng aswk khorang kotor khlai tei sak nang ya khe mokol kotor kotor khe naisik? Abo le Israilni Kwtharsano kebengsaui se!”

²³Nwng nini tẃitunno ani thani rohorwi Subraiyungno thesra kariui; nini kwbángma korai malkhungrok bai hachukrogo, hakchalma Lebanonni hachukrogo kasa kha; tei nwng aroni kuchuk kuk Sidar buphangrokno tei Pain buphangrokno tamphai kha phiya aroni bolong kuthugo hap kha.

²⁴Nwng buini ha-o twikhor khurwi aroni twi kaham nung kha tei nini yakurai bai khe ha Ijipni twimani twisarokno ransa rw kha hwnwi sa kha.

²⁵Ang swkang’-no khá chong kha tei chap kha, nwng abo saui man ya da? Ang nono kamiyung kwrakrokno swbaiwi rúng rwnai.

²⁶Aro tongnai bororokni phan kisa’-no tongo; bórok khá báijak tei kirima cháui sundru bai kha; bórok hapharni jabra hai wng bai kha tei núkhúng sakani jabra satung phai ya sini’-no hoichanai hai wng bai kha.

²⁷Tamo khe Ang nini bebakno saui mano, nini khlaima tei nini thángma, phaima tei nwng ano jolimanobo saui mano.

²⁸Nwng ano jolima tei kung chukma ani khunju-o klai kha, tabuk ang nini bukungo biching bai khepnai tei nwng phaimani lama tẃi’-no nono kiphil rwui rohor phinai.

²⁹Hakhe Jisaia, habugra Hejekiano hai hwnwi sa kha, “Omo wng kha tamo wngno aboni mari. Taklai bai khali bolongni bwthái-bumukrok simi se norok ma chánai, phiya teini bisi-o khe norok maichwlwi sarwi raui mannai tei angur káiwi bwthái cháui mannai.

³⁰Judani ha-o yógwi tong rwknairok yarwng kuthugo súr phirwi buphang hamchaui bwthái kwbángma thái phinai.

³¹Hakhe Jerusalemo tei Siyon hachugo baksa yógwi tong rwk bainai. Subraiyungni se omo hai khlaina chongjak.

³²“Aboni bagwi Subraiyung Asiriyani habugrano tẃiwi samani, ‘Bo o kamiyungo hap phaiwi chakhla kongsabo kok phai man glak, khoroksa sengkrak phano phui tẃiwi hap phai glak tei jangal kuchukbo lu phai glak.

³³Bo phaimani a lama tẃi’-no kiphilwi ma thángnai hwnwi Subraiyung sa-o.’

³⁴Tamni hwn khe ang ani baithangni bagwi tei ani seleng Daudni bagwi o kamiyungno mwthangna bagwi kati rwui tonnai.”

³⁵A horo Subraiyungni suari Asiriyani bathamo thángwi khorok 185,000 sengkrakrokno buthar kha; teini phung aisirisiri bacha khe’-no nuk kha aro bebak mang kwthwi máng.

³⁶Hakhe Asiriyani habugra Senacherib nogo kiphilwi thángwi Ninobi-o tongwi kha.

³⁷Salsa bo bini mwtai Nisrokno khulumui tong phuru bini bwsla khoroknwi Adramelek tei Sarejer bono seng bai tanwi buthar kha, hakhe Ararat ha-o khárwi tháng lai kha. Bini yakchu-o bwsla Esarhadon habugra chá kha.