Read Kok Borok 2 HABUGRA 2 Bible Online

2 HABUGRA 2 - Kok Borok bible

2 HABUGRA 2

¹Subraiyung Eliano nokbar kotor bai chuknoha-o tisaui tlangna nai phuru Elia bai Elisa Gilgalni tháng laiwi tongmani.

²Elia Elisano hai hwnwi sa kha, “Oro tongsok gra di; tamni hwn ba Subraiyung ano Bethelo tháng di hwnwi rohor kha.” Tamo khe hai hwnwi Elisa sa kha, “Subraiyung kwthangba nwngbo kwthang tongnai.” Hakhe bórok Bethelo lam rwui tháng lai kha.

³Bethelo tongnai diyari bodolrok Elisani thani thángwi ahai hwnwi sa lai kha, “Tini’-no Subraiyung nini bugrano tlangwi thángnani naima nwng saui man ya de?” Hakhe bo hai hwnwi sa kha, “I’n ang si-o siring siring tong di.”

⁴Elia bono hai hwnwi sa kha, “Elisa oro tongsok gra di; tamni hwn ba Subraiyung ano Jeriko-o tháng di hwnwi rohor kha.” Tamo khe Elisa hai hwnwi sa kha, “Subraiyung kwthangba nwngbo kwthang tongnai, ang nono yakar glak.” Hakhe bórok Jeriko-o lam rwui tháng lai kha.

⁵Jeriko-o tongnai diyari bodolrok Elisani thani tháng laiwi bono hai hwnwi sa kha, “Tini’-no Subraiyung nini bugrano tlangwi thángnani naimani nwng saui man ya de?” Hakhe bo “I’n ang saui mano; siringcha khe tong di” hwnwi sa kha.

⁶Hakhe Elia bono hai hwnwi sa kha, “Oro tongsok gra di, tamni hwn ba Subraiyung ano Jordan twima-o tháng di hwnwi rohor kha,” Tamo khe Elisa hai hwnwi sa kha, “Ang Subraiyung kwthangni thani tei nini thani koiwi swmai tango, ang nono yakar glak.” Hakhe bórok tháng lai kha.

⁷Tei diyari bodol khorok bachirokbo Jordan jora tháng lai kha. Elia bai Elisa twima rukungo bathak lai kha tei diyarirok bórok bai kisa hakchal khe bacha lai kha.

⁸Hakhe Elia bini kamchwlwi lolangno khugwi khachop kha tei bo abo bai twino swprak kha, twi khakjagwi tháng kha tei Elia bai Elisa ayang narni hakungo tháng lai kha.

⁹Aro Elia Elisano hai hwnwi sa kha, “Ano sa di, ang tlangwi thángjakna swkang nini bagwi tamo khlaiwi man?” Elisa hai hwnwi sa kha, “Ang koi ja-o, nini slái teibo bantasa kwbáng kuk suar rw ja di.”

¹⁰Elia hai hwnwi sa phi kha, “Nwng belai kutuk manwino san kha, hai phano nini oroni tlangwi thángjak phuru nwng ano nuk rwk khe abono nwng mannai tamo khe nwng ano nuk rwk ya khe le abo wng glak.”

¹¹Bórok him lai twtwi kók sa laiwi tong lai-o, aphuru achomsa hórni malkhung bai hórni korairok phaiwi bórok khoroknwino swkak kha tei Elia bangkundri bai chuknoha-o tisaui tlangjak kha.

¹²Elisa abono nuk kha tei hai hwnwi chirik kha, “Ani apha, ani apha Israilni korai malkhung tei korai kasanaisa!” tamo khe bo Eliano tei nu se nuk phi li ya. Hakhe bo khá khamjagwi bini sakni ríno khaknwi khe sichik kha.

¹³Hakhe bo Eliani kamchwlwi lolang klaiwi tong rwkmano khochaui na kha tei kiphilwi thángwi Jordan rukungo bachaui tongwi kha.

¹⁴Bo Eliani kamchwlwi lolang bai twino swpragwi hai hwnwi sa kha, “Eliani Subraiyung Kaitor buro tong?” Hakhe bo haino hai twino swprak kha tei abo khakjagwi tháng kha, Elisa ayang naro tháng kha.

¹⁵Jerikoni diyari bodol khorok bachirok bono nugwi hai hwnwi sa kha, “Eliani phan Elisani thani sók phai kha.” Bórok bo bai malaina phai lai kha tei yáskú sungwi khulum lai kha.

¹⁶Tei bórok bono hai hwnwi sa lai kha, “Oro chwng phan gwnang khorok bachi nini seleng tongo; nini bugrano naituknani bórokno rohor ja di; Subraiyungni phola se bono ba tisaui tlangwi hathái-o eba harungrogo khiklai rwui khna.” Hakhe bo, “I’nhi, bórokno ta rohor di,” hwnwi sa kha.

¹⁷Tamo khe bórok tháng di hwnjak yasak’-no sẃng lai máng tong lai kha. Hakhe a khorok bachirok thángwi kuchuk hache nokha saltham jora Eliano naituk lai kha hai phano bono naitugwi man lai li ya.

¹⁸Hakhe bórok Jeriko-o Elisa naisingwi tong thani kiphilwi phai lai kha tei bo bórokno hai hwnwi sa kha, “Ang ba norokno ta tháng di hwn ya diba?”

¹⁹Jerikoni borok Elisani thani thángwi hai hwnwi sa kha, “Nai di omo belai naithokma kamiyung, tamo khe oroni twi se ham li ya tei bwthái bumukrokbo thái ya.”

²⁰Hakhe bo hai hwnwi sa kha, “Kwtal dangai kaisa ani thani tubu di tei aro sóm kisa rw di,” bórok abono bini thani tubu kha.

²¹Hakhe bo twimuk gana-o thángwi, twi-o sóm sarwi hai hwnwi sa kha, Subraiyung hai hwnwi sa-o, ang o twino kaham snam kha tei tabukni simi o twino ham rw kha, bubo buthar glak, hamyabo wng rw glak.

²²Phiya a twi Elisa kók sa phuruni simi tabuk jorabo kahamno tong kho.

²³Elisa aroni Bethelo tháng kha tei bo thángwi tong phuru-o kamiyungni kisa chwrairok phaiwi bono thesra sa laiwi, “Bokhorok pilanda oroni nongkhor lang di, pilanda nongkhor lang di,” hwnwi chirik lai kha.

²⁴Elisa uphilwi bórokno nuk khe Subraiyungni mung bai bórokno swrai kha, hakhe gong buma maknwi bolongni nongkhorwi phaiwi chwrai khorok brwichinwirokno uásigwi phondrik-phandrak khlai kha.

²⁵Elisa aroni Karmel hachugo tháng kha, ulo Samaria-o kiphilwi tháng kha.