Read Kok Borok 2 HABUGRA 20 Bible Online

2 HABUGRA 20 - Kok Borok bible

2 HABUGRA 20

¹Aphuru-o Hejekia hamya klaiwi thwi twtwi wng kha. Amojni bwsla diyari Jisaia bono naina thángwi, “Subraiyung hai hwnwi sa-o: Nini núkhungno naithok khe tong di, nwng thwi sinai, nwng tei ham glak kha,” hwnwi sa kha.

²Hakhe Hejekia deual phaising naharwi Subraiyungni thani hai hwnwi suri kha:

³“Muitu khlai di, Subraiyung, ang nini bwskango khir khir tei sói khe tei nini mokolo chajakma tẃi’-no khlai kha.” Hejekia muisubuk chaui kap kha.

⁴Jisaia habugrani aroni kutulwi tháng kha tei noyungni nok kwcharni khotol lai ya sini’-no Subraiyung bono hai hwnwi sa kha,

⁵“Subraiyungni bororokno mwrwknai Hejekiani thani kiphilwi thángwi saui di, Ang Subraiyung, nini bosong Daudni Kaitor; ang nini surimano khna kha tei nini muktwi nuk kha, nai di, ang nini hamya ham rwnai, salthamni salo’-no nwng Subraiyungni noktharo tháng di.

⁶Ang nini langma-o tei nokha bisi chiba umor boksinwi rwnai, ang nono tei Asiriya habugrani yakni Jerusalem kamiyungno phiyóknai tei ang ani mungni bagwi tei ani seleng Daudni bagwi kamiyungno kati rwnai.”

⁷Hakhe Jisaia habugrani monnairokno, “Khwichangno hului bini kula-o theui rw di, hakhe bo hamnai,” hwnwi sa kha.

⁸Hakhe Hejekia Jisaiano hai hwnwi sa kha, “Kaitor ano ham rwnai hwnmani tei ang salthamni salo Subraiyungni noktharo thángwi mannai hwnmani aboni mari tamo?”

⁹Jisaia hai hwnwi sa phi kha, “Subraiyungni aroni omo’-no mari wngnai, Subraiyung khlaina hwnwi kók rwmano khlaima, nwngba o sampilino yapri kaichi bwskang tei yapri kaichi uklogo de tháng di hwn?”

¹⁰Hejekia, “Sampili yapri kaichi uklogo thángma slái, bwskang yapri kaichi thángma se lai kugo,” hwnwi sa kha.

¹¹Diyari Jisaia Subraiyungni thani suri khe; sampilino yapri kaichi uslu rw kha, abo bono Ahasni sal[15] naijaknaini uklogo tubu kha.

¹²A jora-o Babilonni habugra Baladanni bwsla Merodak Baladan Hejekiano hamya hwnwi khnaui tẃitunni yak tẃi khe kóktun swiwi hili rohor kha.

¹³Hejekia tẃitunrokno yachak sogwi bini bebak rangkhókni tei rangchak, rukphai moslarok tei thok motomrok, bini seng phuirok phunuk kha tei bini nok bai bini ha-o tongma mungsa manwino phano phunuk ya wng li ya.

¹⁴Hakhe diyari Jisaia Hejekiani thani thángwi, “A bororok buroni phai tei nono tamo sa phai?” hwnwi sẃng kha. Hejekia, “Bórok hakchal ha Babilonni phaima se,” hwnwi sa kha.

¹⁵“Nini nogo bórok tamo nuk kha sla?” hwnwi bo sẃng kha, hakhe Hejekia hai hwnwi sa kha, “Bórok bebak nuk bai kha, ani nogo tongma mungsano phano phunuk ya wng li ya.”

¹⁶Aphuru Jisaia Hejekiano hai hwnwi sa phi kha, “Subraiyungni kókno khna di:

¹⁷Omo hai sal sók phaiwi’-no tong kha, nini nogo tongmani bebak manwi tei nini bosongrok aswk thum langmani bebak tlangjak bainai; mungsa phano tong rwk glak, hwnwi Subraiyung sa-o.

¹⁸Nini bwsarokni bisingo baksa romwi tlangjak baiwi Babilonni habugrani noyungo samung khlainani bagwi mála ma karjak bainai.”

¹⁹Hakhe Hejekia Jisaiano, “Nwng Subraiyungni kók samani abo kahamno, tamo khe bo uansugo, tamni hwn ba bini jora-o le kiri-kóró kwrwi tei tong kwchang wngnai?” hwnwi sa kha.

²⁰Bebak Hejekia khlai langmani kók tei bini phanni kók, pukhiri tan langmani kók, twisa khurwi kamiyungo twi tubumani kókrok ha Judani habugrarokni bosong bijabo swijak ya diba?

²¹Hejekia thwi khe bini bwsla Manase bini yakchu-o habugra chá kha.