Read Kok Borok 2 HABUGRA 21 Bible Online

2 HABUGRA 21 - Kok Borok bible

2 HABUGRA 21

¹Manase nokha bisi chinwi ká phuru-o habugra chánani cheng kha; bo Jerusalemo nokha bisi bachiba jora habugra chá lang kha, bini bumani mung wng kha Hepsiba.

²Bo Subraiyungni mokolo chajak ya samungno máng khlai kha, kubun dopharok Israilni bororokni bwskango selengmasingcha samung khlainairokno Subraiyung hani rwkhlaiwi rohormani bororok khlaima hai’-no bórokbo khlai kha.

³Bo bini bupha Hejekia swbai klangmani kubun mwtairokno khulummani háyárokno tei uáisa snam phi kha, bo Bal mwtaino khulummani háyárokno bo tei uáisa snam phi kha, habugra Ahab khlaimani hai, Asera mwtaijwkni mangtang snamwi Manase athukiriroknobo khulum kha.

⁴Bo Subraiyungni nogo mwtaini háyárok snam kha, Subraiyung o kókno se samani, “Ang Jerusalemo ani mungno tonnai.”

⁵Subraiyungni noktharni babainwnwi’-ono bo nokhani athukirirokni háyárok snam kha.

⁶Bo bwslano suda hóro sógwi yapharmung yaphar kha tei ochai kóktháirok, danda-bajirok, yapha nainairok, phola hamyarokno tẃi-o. Bono kwbáng kuk samung hamya tangwi Subraiyungno joli rw kha.

⁷Tei bo mwtaijwk Aserani mangtangno snamwi noktharo ton kha, omono tẃiwi Subraiyung Daud bai bwsla Solomonno sa langmani, ang o Jerusalemni noktharo se ani mungno tonnai, aboni bagwi se ang bebak Israil dopharokni bisingo omono chong kha tei ang ani mungno mol brúm brúmni bagwi tonnai.

⁸Phiya Israil bororok ani bebak dagima kókrokno tei ani seleng Musini yak tẃi bórokno rwmani bebak kerongno tẃi khe ang bórokni chuchusongno rwmani hani bórokno nor glak.

⁹Hai phano bórok Subraiyungni kókno khna li ya; Israilni bororokni bwskango Subraiyung sokomormani dopharok khlaimani sláibo Manase teibo kwbáng sumsok khlai rw kha.

¹⁰Tei Subraiyung bini seleng diyarirokni khúk tẃi hai hwnwi sa kha,

¹¹“Tamni hwn khe ha Judani habugra Manase selengmasingcha samung khlaimani bai tei bórokni bwskango tongnai Kananni bororokni slái hamya kuk samung khlaimani tei bini mwtairok bai khe Judano sumsogo khiklai kha.

¹²Aboni bagwi Israilni Subraiyung Kaitor hai hwnwi sa-o, ‘Ang Jerusalem bai Judani saka-o aswk hamya khlainai abo khnanai bororokni khunju thorsa khe ma kwlwinai.

¹³Ang Samariano khlaimani hai Jerusalemno sátoknai, Israilni habugra Ahab tei bini bosongrokno khlaimani hai khlainai. Mairangno bolop mwthal khlaiwi hu tẃi khe ang Jerusalemno hu-ui khibinai.

¹⁴Tei ang yógwi tong rwknairokno khibiui rwnai tei bórokni arirokni yago yapharwi rwnai, bórok bai tanthar-súthar khlaijagwi segwi najak bainai.’

¹⁵Tamoni hwn ba bórok ani mokolo sumsok khlai bai kha tei bórokni chuchusong ha Ijipni yógwi phai phuruni simi tini jora ano belai khe joli rw bai kha.”

¹⁶Manase Jerusalemni khaksani simi tei khaksa jora thẃi bai kupulung wng ya sak bebak borok kahamrokno buthar kha tei aswk bai se pái ya, Judanobo sumsogo khiklaiwi Subraiyungni mokolo chajak ya samung máng khlai rw kha.

¹⁷Manaseni aswk samung khlai langmani tei bini sumsok khlaimarok Judani habugrarokni bosong bijabo swijak kha.

¹⁸Manase thwi khe Ujani noyung tháiblwngo phobjak kha tei bini yakchu-o bwsla Amon habugra chá kha.

¹⁹Amon Judani habugra chá phuru bo nokha bisi nwichinwini borok, hakhe bo Jerusalemo nokha bisik nwi jora habugra chá lang kha. Bini buma wng kha Mesulemet, Jotba-o tongnai Harujni bwsajwk.

²⁰Bo bini bupha Manase khlai langmani hai’-no Subraiyungni mokolo chajak ya samung khlai lang kha.

²¹Bini bupha him langmani bebak lama’-ono him kha tei kubun takjak mwtairokno mon kha tei khulum kha.

²²Bo Subraiyung bini chuchusongni Kaitorno yakar kha tei Subraiyungni lama tẃi him li ya.

²³Amonni selengrok bono kebengwi bacha kha tei habugrano bini noyung bisingo’-no buthar kha.

²⁴Tamo khe hani bororok habugra Amonno kebengnairokno butharwi pái kha tei hani bororok bini bwsla Josiano habugra chá rw lai kha.

²⁵Amon aswk samung khlai langmani bebak kókrok Judani habugrarokni bosong bijabo swijak kha.

²⁶Amon Ujani tháiblwngni simalwngo phobjak kha tei bini bwsla Josia bini yakchu-o habugra chá kha.