Read Kok Borok 2 HABUGRA 22 Bible Online

2 HABUGRA 22 - Kok Borok bible

2 HABUGRA 22

¹Josia habugra chána cheng phuru bo nokha bisi charni borok, hakhe bo Jerusalemo nokha bisik thamchisa jora habugra chá lang kha, bini buma wng kha Jedida, Bojkato tongnai Adaiani bwsajwk.

²Josia Subraiyungni mokolo chajakmani tẃi máng samung khlai kha, bini bosong habugra Daud himmani lama-o him lang kha, bo aboni yagra, yaksi wng li ya.

³Josia habugra chámani nokha bisi chichar phuru Ajaliani bwsla tei Mesulamni khe busuk Saphan, Subraiyungni nokni swinani samung khlainaino hai hwnwi saui rohor kha,

⁴“Nwng ochai okra Hilkiani aro thángwi Subraiyungni nogo tubu baimani rangrokno duglam mwrwknairok thummani a rangno bwswk wng kha lekha di hwnwi saui di.

⁵Hakhe abono Subraiyungni noktharo samung tang rwnani barja rwjaknai bororokno abono rw di; tei Subraiyungni nokthar snam phirnairokno rw thung.

⁶Buphangni samung tangnairokno, nok tangnairokno, itni samung tangnairokno rw di. Buphang painani tei snam phir thani nangma holong painani bagwi rw di.

⁷Tamo khe bórokni thani aswk rang rwjakmani abo tei uáisa buro bwswk swbaijak kha, ta sẃng di, tamni hwn ba bórok sói khe’-no samung khlai-o.”

⁸Ochai okra Hilkia swinani samung tangnai Saphanno hai hwnwi sa kha, “Ang Subraiyungni nok bisingo kerong bijap man kha.” Hilkia Saphanno a bijapno yapharwi rw kha, hakhe bo pori kha.

⁹Aboni ulo bo habugrani thani kiphilwi thángwi, “Nini seleng oro nogo bebak rang manmano naui Subraiyungni nok tang rwnani barja chongjaknairokni yago rw kha,” hwnwi sa kha.

¹⁰Hakhe swinani samung khlainai Saphan habugrano hai hwnwi sa kha, “Ochai Hilkia ano bijap kangsa rw kha,” Saphan abono habugrani bwskango khorang khe pori kha.

¹¹Habugra kerong bijapni kókrok khna khe bini ríno sichik kha.

¹²Hakhe habugra ochai Hilkiano, Saphanni bwsla Ahikamno, Mikaiani bwsla Akborno, swimungni samung khlainai Saphanno tei habugrani seleng Asaiano hai hwnwi dagi kha,

¹³“Tháng di, ani bagwi tei Judani bebak bororokni bagwi kerong bijap manmano tẃiwi Subraiyungno sẃngwi di; Subraiyung chwngno belai khe jolijak kha, tamni hwn ba chini chuchusong o bijabo khlai di hwnmani tẃi khlai li ya gwja.”

¹⁴Hakhe ochai Hilkia, Ahikam, Akbor, Saphan tei Asaia diyarijwk Huldani thani tháng lai kha, a bwrwi wng kha Tikbani bwslani bihik, búchu wng kha Harhas, bo wng kha noktharni rí mwrwknai barja (a bwrwima tabuk Jerusalemni kubun amchoi-o tongo) bórok bo bai kók sa lai kha.

¹⁵A bwrwima bórokno hai hwnwi sa kha, “Israilni Subraiyung Kaitor hai hwnwi sa-o, ani thani rohornai a borokno thángwi saui di,

¹⁶Subraiyung hai hwnwi sa-o, Judani habugra kerong bijap porimani a kók hai khe’-no ang o Jerusalem tei oro tongnai bororokni saka-o sátokma tubunai.

¹⁷Tamni hwn ba bórok ano yakar kha tei kubun mwtaini thani ratharwi satrai sók lai kha, bórokni bebak samung bai khe ano joli rw kha, aboni bagwi ang Jerusalemno belai joli kha tei ani jolima thak man li ya.

¹⁸Phiya habugrani bagwi khe, Subraiyung Kaitorno sẃngwi di hwnwi rohornaino hai hwnwi saui di, Subraiyung Israilni Kaitor hai hwnwi sa-o; bijabo swijak tongmani kókrokno nwng khna kha,

¹⁹tamni hwn khe nwng ani bwskango bwkha kiphilwi Subraiyungni thani koinene wng kha tei ang o ha bai oro tongnairok digi-sigi wngwi swraimung nangnai hwnwi nwng khnaui nini rí sichigwi ani thani kapmano ang khna kha hwnwi Subraiyung sa-o.

²⁰Aboni bagwi nwng kwchang kwchang khe ma thwinai tei nwng thwi ya sak Jerusalemni saka-o abo hai digi-sigi wng phlai glak, nini mokol bai abono nuk lang glak.” Hakhe bórok a kókno habugrani thani tubu-ui phai kha.