Read Kok Borok 2 HABUGRA 23 Bible Online

2 HABUGRA 23 - Kok Borok bible

2 HABUGRA 23

¹Habugra Josia bebak Juda bai Jerusalemni okrarokno ringwi bini thani phaiwi kuthumna bagwi dagiui rw kha.

²Hakhe habugra, Subraiyungni noktharo tháng kha tei bo bai baksa bebak Judani tei Jerusalemni bororok, ochairok, diyarirok, bebak bororok, chwrairok tei okrarokbo tháng bai kha; Subraiyungni nok bisingo manmani a swmai bijabo tongmarokno bórokno poriui khna rw kha.

³Habugra thongla gana-o bachaui kha tei Subraiyungni bwskango bijabo swijak tongmani tẃi’-no bini kók khnanani, bini kerongno tei dagimarokno khá bai khúk bai khe tẃinani tei abono samungo phnang nanai hwnwi kwtal khe swmai tang kha, bebak bororokbo bo bai baksa khe swmai tang lai kha.

⁴Hakhe habugra ochaiyung Hilkiano tei bono chubanai ochairokno tei noktharni duglam mwrwknairokno bebak Subraiyungni noktharo tongma Bal mwtaino, Aserano tei athukirino khulummani manwi-khwnwirokno phataro tikhlaiwi tubu-ui phai di hwnwi dagi kha; bo Jerusalemni phataro Kidron harungrogo abórokno tlangwi sók kha tei thaplarokno Bethelo tlangwi tháng kha.

⁵Judani kamiyungrogo tei Jerusalemni bebak haphar kuchukrogo, takjak mwtairokni thani satrai sóknani bagwi chongjakrokno tikhlaiwi rohor bai kha; tei Balni thani sal, tal, athukiri kotor tei athukirirokni thani satrai sóknairokno bebak tikhlaiwi rohor bai kha.

⁶Bo takjak Asera mwtaijwkno Subraiyungni noktharni tubu-ui Jerusalemni phataro tlangwi Kidron twisa-o tlangwi sók kha tei a thapla sukhrubwi kwsap khlaiwi abono borok bánglarokni mangkhoro sarwi rwui kha.

⁷Tei bo Subraiyungni noktharo tongnai chwla sak phalnairokno tei Asera mwtaini bagwi rírok taknai sak phalnaijwkrokni tongma nokrok swbaiwi pái kha.

⁸Josia Judani bebak kamiyungrokni ochairokno tubu kha tei Gebani simi Birseba jora bebak kuchuk háyárogo ochairok satrai sógwi yaphar laimano sukhrubwi rw kha. kamiyungni tẃiphang Josuani aro hapmani kamiyungni duglamni yaksi bwkhakni duglamo tongma háyá kuchukroknobo swbai bai kha.

⁹Kuchuk háyáni ochairok Jerusalemni Subraiyungni háyá bwskango mon ya phano, bórokni ochai palrok baksa khe auan bángla chá lai kha.

¹⁰Molek mwtaini thani khoroksa phano bwsla tei bwsajwkno sógwi yapharwi man yana tẃi khe Hinom harungni mwtai Tophetno khulumma háyáno habugra Josia sukhrubwi rw kha.

¹¹Bo Judani habugra sal mwtaino khulumui yapharmani korairoknobo nor bai kha, abórok tẃiphang Nathan-melek tongmani khotol gana-o tonjago; bo sal mwtaino yapharjak korai malkhungrokno sógwi pái kha.

¹²Judani habugra snammani habugra Ahasni nokni núkhúngo tongma háyáno tei habugra Manase Subraiyungni nokni khotol kwnwi-o snammani háyároknobo habugra Josia swbai kha tei háyárokno sukhrubwi[16] Kidron twisa-o khibiui rw kha.

¹³Habugra Solomon snam langmani Jerusalemni salka phaising tei olib hachukni salgrabai phaisingo Sidonni mwtaijwk Astarte, Moabni mwtai Kemos, Ammonsongni mwtai Molekno habugra Josia sukhrubwi rw kha.

¹⁴Tei Josia holongni thonglaroknobo phindrik phandrak khe swbai kha, Asera mwtaijwkni thani yapharjak mangtangnobo tansu kha tei bórok tongma-o bororokni bekrengrok bai khe bólwi rw kha.

¹⁵Phiya Israilrokno sumsogo khiklainai Nebatni bwsla habugra Jeroboam Bethelo kubun mwtaino khulummani háyároknobo Josia swbai bai kha. Josia háyárokno sók laiwi aboni holongrokno[17] phondrik-phandrak khe swbai kha tei bo Asera mwtaijwkni mangtangno sógwi khibi kha.

¹⁶Josia kiphilwi nai ba aro hachugo simalwngrok nuk kha; hakhe borok rohorwi a simalwngrokni bekrengrokno tikhlaiwi abórokno diyarini khúk tẃi swkang’-no Subraiyung sama hai khe háyá saka-o beraui sógwi hamya khlaiwi pái kha.

¹⁷Habugra, “Abo saboni simalwng?” hwnwi sẃng kha. Bethelni bororok hai hwnwi sa kha, “Omo wng kha Judani a diyari, bono nwng Bethelni háyáno kebengwi omo hai khlainai hwnwi swkango saui thángnaisa.”

¹⁸Josia, “Omo hai khe’-no tong thung, khoroksa phano bini bekrengrokno ta nor thung,” hwnwi sa kha. Hakhe bini bekrengbo norjak li ya tei Samariani phainai a diyarini bekrengbo norjak li ya.

¹⁹Aboni bere se Israilni habugrarok Samariani kamiyung gwnangwi mwtaini háyárok snamwi Subraiyungno joli rwmani a háyárokno Josia nor bai kha; Bethelo khlaimani hai’-no bo bóroknobo khlai kha.

²⁰Bo háyá-o mwtaini samung tangnai bebak ochairokno tanthar kha tei bórokni saka-o bororokni bekrengrokno sók kha. Hakhe bo Jerusalemo kiphilwi tháng kha.

²¹Habugra bebak bororokno hai hwnwi dagiui rw kha, “Kerong bijabo swijak tongma tẃi’-no Subraiyung Kaitorni bagwi yókma ter panda ma khlai bainai.”

²²Tamo khe Buj thumnairok hano tẃither phuruni simi uáisa phano Israil bai Judani habugrarokni jora’-obo omo hai yókma ter khlaijak ya kho’-no;

²³tamo khe tabuk páithago, Josia habugra chámani nokha bisi chicharo Jerusalemo Subraiyungni mungwi yókma ter panda khlaijak kha.

²⁴Ochaiyung Hilkia Subraiyungni noktharo manmani kerong bijapno songcha phinani bagwi habugra Josia bebak Judani hai Jerusalemo tongma mwtai hamya tẃinairokno, swkalrokno, yapha nainairokno, takjak mwtairokno tei kubun mwtairokno khulummani manwi-khwnwirokno khibiui rohor bai kha.

²⁵Bini slái swkang tei khoroksa habugra phano khá bai, khúk bai, phan bai, khe Subraiyungni thani kiphilwi Musini kerongrokno kaham khe tẃi langnai kwrwi kho; tei bini slái ulobo khoroksa phano bo hai bacha li ya.

²⁶Tamo khe habugra Manase samung hamya khlaiwi Subraiyungno Judani saka-o belai joli rwmani abo tabuk jorabo hamya kho.

²⁷Subraiyung hai hwnwi sa kha, “Israilno ang khlaima hai’-no Judanobo abo hai khe ani bwskangni nornai, ang chongmani kamiyung Jerusalemno tei ang samani a nogo’-no ani mung tongnai hwnmanobo ang nornai.”

²⁸Habugra Josia aswk samung khlai langmani kókrok abo Judani habugrarokni bosongni bijabo swijak kha.

²⁹Josia habugra cháui tong phuru Ijipni habugra Pharao Neko Asiriyani habugrano chubanani bagwi bini sengkrakrokno tlangwi Uphratis twima jora tháng kha. Josia Ijipni sengkrakrokno Megido-o kasuna tháng khe bo aro Neko bai butharjak kha.

³⁰Bini selengrok bono korai malkhungo khe Megidoni Jerusalemo tubu-ui phai kha tei bini mangkhoro’-no bono phob kha. Judani bororok Josiani bwsla Jehoahasno thok phulwi bini buphani yakchu-o habugra chá rw lai kha.

³¹Jehoahas nokha bisi nwichitham phuru habugra chána cheng kha; Jerusalemo nokha taltham habugra chá kha, bini bumani mung wng kha Hamutal, Libna-o tongnai Jirimiani bwsajwk.

³²Bini chuchusong hamya khlai langma hai’-no bo’-bo Subraiyungni mokolo cha ya samungrok máng khlai kha.

³³Ijipni habugra Pharao Neko ha Hamatni Ribla-o khaui chobwi tonjak kha tei Judano 3,400 kilo rukphai tei rangchak budul kaisa rwnani lon rw kha.

³⁴Hakhe Pharao Neko Josiani bwsla Eliakimno buphani yakchu-o Judani habugra chá rw kha tei bini mungno philwi Jehoiakim hwnwi phar kha. Tei Pharao Jehoahasno tlangwi ha Ijibo tlangwi thángjak kha tei aro’-no thwi kha.

³⁵Hakhe Jehoiakim rukphai tei rangchak Pharaono rw kha; tamo khe bo Pharao dagima hai khe rang rw di hwnwi dagi kha. Bo lukurokni aroni chúkmani tẃi khe’-no bini hani bororokni thani Pharaono rwna bagwi rang khang kha.

³⁶Jehoiakim nokha bisi nwichiba phuruni simi habugra chánani chengwi Jerusalemo nokha bisi chisa jora habugra chá kha. Bini buma wng kha Jebida, Ruma kami kotoro tongnai Pedaiani bwsajwk.

³⁷Bini chuchusong khlai langma hai’-no Subraiyungni mokolo cha ya samung khlai kha.