Read Kok Borok 2 HABUGRA 24 Bible Online

2 HABUGRA 24 - Kok Borok bible

2 HABUGRA 24

¹Bini jora-o Babilonni habugra Nebukadnejar Juda-o hap phai khe Jehoiakim nokha bisik tham jora bini seleng wngwi ma tong kha, ulo khe bo bono kebengwi bacha kha.

²Subraiyung Babilonni, Siriyani, Moabni tei Ammonsongni sengkrakrokno Judano sokomornani bagwi Jehoiakimni thani rohor kha, Subraiyung bini seleng diyarirokni khúk tẃi sama hai’-no khlai kha.

³O sokomorma Judani thani phaima khe Subraiyung sama tẃi’-no wng kha. Manase aswk kwbángma sumsok khlaimani bagwi Judani bororokno bini bwskangni nornani khá chap kha.

⁴Tei bebak borok kahamroknobo buthar kha; bo Jerusalemo borok kahamni thẃino supung kha tei Subraiyung Manaseno nakarwi man li ya.

⁵Jehoiakim aswk samung khlai langmani kók Judani habugrarokni bosong bijabo swijak tongo.

⁶Hakhe Jehoiakim thwi kha tei bini bwsla Jehoiachin bini yakchu-o habugra chá kha.

⁷Ijipni habugra bini sengkrakrok bai tei bini hani nongkhor li ya, tamo khe Babilonni habugra ha Ijipno suda bini yapha-o na bai kha, abo Ijipni twisani simi Uphratis twima jora.

⁸Jehoiachin nokha bisi chichar phuruni simi Juda-o habugra chánani cheng kha; bo Jerusalemo taltham jora habugra chá lang kha, bini bumani mung wng kha Nehusta, Jerusalemo tongnai Elnathanni bwsajwk.

⁹Bo Subraiyungni mokolo chajak ya samungrok khlai kha, bo bupha samung khlaimani hai’-no khlai kha.

¹⁰A jora’-ono Babilonni habugra Nebukadnejarni selengrok Jerusalemo hap phaiwi kamiyungno segwi na kha.

¹¹Bini selengrok sek lai phuru-o Nebukadnejar bo sakbo Jerusalemo phai kha.

¹²Judani habugra Jehoiachin, bini buma, bini selengrok, bini tẃiphangrok tei noyungni tẃiphangrok bai khe Babilonni habugrani thani ma lon lai kha. Nebukadnejarni habugra chámani nokha bisi char phuru bono khaui alongo tlang kha.

¹³Bo Subraiyungni noktharni bebak rangchak-ríchakno tei bugrani noyungni rangchak-ríchak manwi-khwnwirokno tlang bai kha, abo Subraiyungni sama tẃi’-no bo noktharni bebak rangchakni mairang lotarokno phindrik phandrak khe tansu bai kha. Abo bugra Solomon noktharni bagwi snammarok.

¹⁴Nebukadnejar Jerusalemni bebak bororokno, tẃiphangrokno tei phan gwnang bebagwi khorok chisai bororokno khaui chobwi tonnani bagwi tlang bai kha. Tei samung tang kwrwngrokno, sorni manwi taknairokno tlangwi tháng kha, hani bigrakukrokno simi se karwi klang si-o.

¹⁵Nebukadnejar Jehoiachinnobo Babilono khaui tlang tháng kha, bini buma, bihiksongno, bini tẃiphangrokno tei Judani phan gwnangroknobo romwi tlang kha.

¹⁶Nebukadnejar bebak samung nangnai bororokno bebagwi khorok 7,000-ni bisingo khorok 1,000 tang kwrwngrokno tei sorni samung tangnairokno romwi tlang kha. Bórok bebak choba-o bachaui mannai máng’-no.

¹⁷Nebukadnejar Jehoiachinni bukhra Mataniano Judani habugra chá rw kha tei bini mung sláiwi Jedekia hwnwi phar kha.

¹⁸Jedekia nokha bisi nwichisa phuru-o bo Judani habugra chá kha, bo Jerusalemo nokha bisi chisa jora habugra chá kha, bini bumani mung wng kha Hamutal, Libna-o tongnai Jirimiani bwsajwk.

¹⁹Bo Jehoiakim khlai langma hai’-no Subraiyungni mokolo chajak ya samungrok tang kha.

²⁰Subraiyung Jerusalem bai Judano jolijagwi bini bwskangni sokomor bai kha. Jedekia Babilonni habugrano kebengwi bacha kha.