Read Kok Borok 2 HABUGRA 25 Bible Online

2 HABUGRA 25 - Kok Borok bible

2 HABUGRA 25

¹Nebukadnejar habugra chámani nokha bisi chukuni tal chini, salchi-o bebak bini sengkrakrokno tẃiwi Jerusalemo phai kha, hakhe abono kitingwi gerepsa phai kha.

²Jedekia habugra chámani nokha bisi chisa jora abono gerebwi tong lai kha.

³Nokha tal brwini sal chuku-o Jerusalemni bisingo belai khe chacharara nang kha, hani bororokni bagwi aro mungsa chámung kwrwi kha.

⁴Hakhe kamiyungni chokdeual swbai lai kha, habugra bini sengkrakrokno tẃiwi horni bisingo’-no bini khumulwng ganani kwnwi kwchar tẃi khe Babilonsarok kitingwi kasu-ui tongmani bising tẃi khárwi tháng lai kha, bórok bebak Araba harung tẃi khe khár lai kha.

⁵Babilonni sengkrakrok Jedekiano riphrik lai kha tei bono Jeriko-o rom lai kha, bebak Babilonni sengkrakrok bono khibiui khár bai kha.

⁶Hakhe bórok habugrano rom kha tei Babilonni Ribla-o habugrani thani bono tubu lai kha tei bono butharnani dagijak kha.

⁷Bórok Jedekiani bwslasongno bini mokol bwskangno buthar kha tei Jedekiani mokolrokno ekhregwi bórok bono sorni buduk bai khaui Babilono tlang kha.

⁸Nebukadnejar habugra chámani nokha bisi chichukuni nokha talbani salsnini salo, Babilonni habugra Nebujaradan habugrani seleng, sak mwrwknai sengkrak bokhorok Jerusalemo hap phai kha.

⁹Bo nokthar, noyung tei Jerusalemni bebak bororokni nokrokno hór bai sók kha; bebak nok kotor kotorno sók bai kha.

¹⁰Bini bebak sengkrakrok Jerusalem gwnangwini chokdeual tongmarokno swbai bai kha.

¹¹Tei Nebujaradan sengkrak bokhorokno mwrwknai bebak kamiyungo yógwi tong rwk bainai bororokno, samung tang kwrwngrokno romwi Babilono tlang bai kha.

¹²Tamo khe mwrwknai bokhorok kisa bigra bororokno, ha kwrwijarokno, yakarwi klang bai kha tei hapharo tei angur bari-o samung tangna bagwi klangwi tháng kha.

¹³Subraiyungni noktharo tongma pitolni thonglarokno tei pitolni dangaino swbai kha, pitolni dangai kotornobo swbaiwi Babilono tlangwi tháng kha.

¹⁴Bórok mairangrok, tharukrok, thapla hukjaknai, chati phnangjaknai manwirok, satrai sókjaknai manwi tei bebak ochai noktharo samung khlaima pitolni manwirokno tlangwi tháng kha.

¹⁵Hakhe bórok hór mwchẃngma karairok, dangairok tei rangchakrok, rukphaini snamjak bebak dangairok, sor tẃijaknai manwirokno mwrwknai bokhorok tlangwi tháng bai kha.

¹⁶Habugra Solomon Subraiyungni Noktharni bagwi snam langmani thongla kongnwirok, kaisa thopna tei kotorma twini dangairok hilikmani pitolno, o manwirokno rwtauibo man ya.

¹⁷Kaisa thongla chukmani wng kha mitar kaichar, aboni buchuk saka-o pitol bai khopjak, abo chukmani mitar kai 1.3 abono kitingwi pitolni snamjak chei rapjak bai dalim bwthái hai berajak tei kaisa thonglabo abo hai’-no chei rapjak gwnang.

¹⁸Nebujaradan sengkrak bokhorok ochaiyung Seraiano bini slái ochai kusu Japhaniano tei khoroktham duglam mwrwknairokno romwi khaui tlang bai kha.

¹⁹Bo tei khoroksa chobani tẃiphangno, khorokba habugrano kókbiti sanairokno, sengkrak bokhorokni chubachu sengkrakno, sengkrakrokno lekhaui narwknai tei khorok dokchi nang kuknai bororok kamiyungo tongnairokno romwi tlang bai kha.

²⁰Nebujaradan bórokno Ribla kamiyungo tongnai Babilonni habugrani thani tlangwi tháng bai kha.

²¹Hamatni amchoi-o aro habugra bórokno bu baiwi aro’-no buthar bai kha. Hakhe Judani bororok bórokni hani khaui buini ha-o tlangjak bai kha.

²²Habugra Nebukadnejar Ahikamni bwsla Gedalia Saphanni busukno Juda-o tong rwknai bororokni bagwi habugra chongwi klang kha.

²³Judani choba-o manjak ya tẃiphangrok tei sengkrakrok Babilonni habugra Gedaliano habugra chongwi klang kha hwnwi khna khe’-no Mijpa-o phai laiwi malai phai kha. Abórok wng kha, Nethaniani bwsla Ismael, Kareani bwsla Johanan, Netopha-o tongnai Tanhumetni bwsla Seraia tei Makatsa Jasania.

²⁴Gedalia bórokno hai hwnwi sa kha, “Norok Babilonni tẃiphangrokno kirina nang glak hwnwi ang norokno kók rw-o. Norok o ha-ono tong di tei Babilonni habugrano mon lai di, hakhe norokni kaham wngnai.”

²⁵Tamo khe nokha bisi snini jora-o Nethaniani bwsla Ismael tei khoroksa habugrani noyungni borok Elisamani busuk tei borok khoroksano tlangwi Mijpa-o tháng kha tei aro Gedaliano buthar lai kha. Bo bórok bai tongnai Israilrokno tei Babilonni boroknobo buthar kha.

²⁶Hakhe bebak bororok okra, chwrai tei sengkrak bokhorokrok bachaui Babilonsarokno kirima bai ha Ijibo khárwi tháng bai kha.

²⁷Judani habugra Jehoiachin chopjakmani nokha bisik thamchisni kámani nokha bisi tal chinwini talo tei nwichisni salo Ebilmerodak Babilonni habugra chá kha tei khairogwi Jehoiachinno phiyógwi rw kha,

²⁸bo Jehoiachinno kók kwchang sa kha tei bo Babilono tongnai kubun habugrarokni slái bono kuchugo achuk rw kha;

²⁹hakhe Jehoiachin bini chopjagwi tong phuruni kanmung chummungrokno slái rw kha tei bo thwi yasak’-no habugra bai thansa khe máng ma cháui tháng kha.

³⁰Habugra sal brúm brúmno Jehoiachinni nangmani rangrok thwi yasak’-no bono rwui tháng kha.