Read Kok Borok 2 HABUGRA 3 Bible Online

2 HABUGRA 3 - Kok Borok bible

2 HABUGRA 3

¹Judani habugra Jihosapat nokha bisi chichar habugra cháui tongmani jora-o, Ahabni bwsla Jehoram Israilni habugra wng kha tei Samaria-o nokha bisi chiknwi bugra chá lang kha.

²Bo Subraiyung chajak ya samungrok máng khlai lang kha, hai phano bo buma bai bupha Jesebel swk hamya wng tha ya; bo bupha snam langmani Bal mwtaino khibiui rohor kha.

³Phiya ba, Nebatni bwsla habugra Jeroboam, khlaima hai bo’-bo sumsok khlai kha tei Israil dophano sumsogo khiklai kha; tei bo a tongmungno yakar lang li ya.

⁴Moabni habugra Mesa wng kha merarok rinai tei bo Israilni habugrano nokha bisi sa-o mak 100,000 mera bwsarok tei mak 100,000 mera buikhumuni rí kutungma subo.

⁵Phiya ba Israilni habugra Ahab thwi khe, Moab Israilni ari wngwi bacha kha.

⁶Hakhe habugra Jehoram dakti Samariani thángwi bebak bini sengkrakrokno thum bai kha.

⁷Bo Judani habugra Jihosapatni thani hai hwnwi kók kwchárwi rohor kha, “Moabni habugra ani ari wngwi bacha kha, nwng bo bai choba nang laima-o ano chubaui de mano?” Habugra Jihosapat hai hwnwi sa kha, “I’n thángnai, angbo nwng haino, ani bororokbo nini borokno, ani korairokbo ninino.”

⁸Hakhe, “Bu lama tẃi chwng thángsokma cha?” hwnwi bo sẃng khe, Jehoram, “Idomni hasing panthor tẃi,” hwnwi sa kha.

⁹Hakhe Israilni habugra, Judani habugra tei Idomni tháng lai kha. Nokha salsni him lai khe nungjaknai twi páiwi tháng kha tei aro sengkrakrokni tei bórokni mal-matarokni bagwibo twi kwrwi kha.

¹⁰Israilni habugra hai hwnwi sa kha, “O Subraiyung chwng habugra khorok thamrokno Moabni yago yapharna ring kha.”

¹¹Habugra Jihosapat hai hwnwi sẃng kha, “Subraiyungno sẃngnani oro ba khoroksa phano diyari kwrwi de?” Habugra Jehoramni sengkrak khoroksa hai hwnwi sa kha, “Saphatni bwsla Elisa oro tongo. Bo wng kha Eliani yakchu.”

¹²Tei habugra Jihosapat hai hwnwi sa kha, “Subraiyungni kók bo bai tongo.” Hakhe Israilni habugra tei Idomni habugra bini thani tháng lai kha.

¹³Hakhe Elisa, Israilni habugrano hai hwnwi sa kha, “Ang nini bagwi tamo khlainai? Tháng di, nwma bai nwphani diyarirokno sẃngwi di.” Tamo khe Israilni habugra bono hai hwnwi sa kha, “Omo Subraiyung chwng khoroktham habugrarokno Moabni yago yapharna ring kha.”

¹⁴Elisa hai hwnwi sa phi kha, “Ang monmani Subraiyung kwthangni mung bai swmai tango, ha Judani habugra Jihosapatni mwkhang narwk ya khe nwng bai mungsa khlaina kwrwi?

¹⁵Tabuk ani bagwi tammung tamnai tubu gra di.” Tamnaisa tam kheno Subraiyungni phan Elisani thani sók phai kha,

¹⁶hakhe bo hai hwnwi sa kha, “Subraiyung hai hwnwi sa-o, o haphar kwrano khatil kwbángma khur di.

¹⁷Tamni hwn ba omo Subraiyung sa-o, ‘Norok mungsa nokbar uatwi nuk ya phano o haphar twi bai kupulung wngnai, hakhe norok norokni korairok tei mal-matarok ok kochomwi twi nungwi mannai.’

¹⁸Subraiyungni thani omo samung klaisa se tei norokni yapha-o Moabno bo yapharnai.

¹⁹Tei norok bebak bórokni naithokma kwrak kamiyungrokno yago na bainai, norok oroni bwthái buphangrokno tanwi khiklai bainai tei twimukrokno muthubwi pái bainai, bórokni ha kahamrokno holong bai máng kupulung khlainai.”

²⁰Teini phungo, phungni ratharwi yapharma jora-o Idom bwkhakni twi yorwi phaiwi ha gwnangwi supungwi rw phai kha.

²¹Tei bebak Moabrok habugrarok choba nang lainani phai lai kha hwnwi khna kheno, bebak choba nang laiwi mannai chwraini simi okra jora ring laiwi bórok bai choba nang laina bagwi ha páithago bacha lai kha.

²²Teini phungo bórok bachaui nai ba twi-o sal kwchẃngma khe chẃngsaui tong kha, abo thẃi hai kwchak wng kha.

²³“Omo ba thẃi se bla?” hwnwi bórok kwmam lai kha. Habugra khorokthamrok choba nang laiwi bórok kiching bórok buthar lai khna, phai di chwng thángwi bórokni tong kwrwi na lai sinai.

²⁴Tamo khe bórok Israilrokni bathamo sók phai khe Israilrok achomsa khe swprak sógwi bórokno riphrigwi rohor bai kha. Israilrok Moabrokno riphrigwi máng tanthar bai kha,

²⁵tei bórokni kamiyungrokno sokomor bai kha. Israilrok ha kahamno láiwi tháng twtwi holong khitarwi ha gwnangwi kupulung wng ya sak khitar lai kha, bórok bebak twimukrokno bo supung bai kha tei bebak buphang kahamrokno tanwi khiklai bai kha. Kir-haresetni holongrok simi se tong rwk si-o. A kamiyungrogo tongnairokno badul koknairok habwi swprak bai kha.

²⁶Moabni habugra choba-o páithothok nuk li ya khe, bo snira seng bai nang lainai sengkrakrokno tẃiwi arirokni bising tẃi Idom hani habugrani thani yógwi thángna nai kha, tamo khe bo yógwi se man li ya.

²⁷Hakhe bo bini yakchu-o habugra chongnani bwsla okra kukno tlangwi kamiyungni chokdeual saka-o Moabni mwtaini mung bai ratharwi yaphar kha. Israilrokno belai jolijakma bagwi bórok uslu lai kha tei sakni ha-o kiphilwi tháng lai kha.