Read Kok Borok 2 HABUGRA 4 Bible Online

2 HABUGRA 4 - Kok Borok bible

2 HABUGRA 4

¹Diyarirokni bisingni randijwk khoroksa Elisani thani thángwi hai hwnwi sa kha, “Nini seleng ani bwsai thwiwi tháng kha. Nwng saui mano bo Kaitorno kirinai borok, nai di tabuk khe a lakai rwnaisa angsla khoroknwirokno seleng snamna bagwi na phaina phai-o.”

²Elisa bono hai hwnwi sa kha, “Ang nini bagwi tamo khlaiwi man? Nini nogo tamorok tong ano sa di,” aphuru khe bo hai hwnwi sa kha; “Gola bwsa-o olibni thok kisichano karwi ani tei mungsabo kwrwi.”

³Hakhe Elisa hai hwnwi sa kha, “Phataro thángwi noksa-nok-arirokni thani thángwi tei nwng manma jora tẃi gola bukcha kwbángma khe thum di, kisicha khe ta tubu di.

⁴Hakhe nwng bai nini bwsarok nok bisingo hap phuru dugar kholobwi bebak gola-o thok lu-ui di, abo pung kheno babaisa norwi ton di.”

⁵Hakhe a bwrwima bini sajlarok bai khe nogo thángwi dugar kholobwi olib thok gwnang gola bwsano na kha tei bwsarok golarok tubu khe aro thok lukhlai kha.

⁶Bebak gola bukcha pung bai khe bo bwslano hai hwnwi sa kha, “Teibo gola tubu-ui phai di.” Bwsla khoroksa hai hwnwi sa kha, “Tei gola kwrwi kha,” hakhe thok yorma thak kha.

⁷Bwrwima Elisani thani phaiwi sa phai kha, “Hakhe Elisa hai hwnwi sa phi kha, ‘Tháng di, a olib thokno phal baiwi nini lakairok su bai di tei nwng bai nini bwsarok a bára tong rwkmani bai thangwi tongwi man anw.’ ”

⁸Salsa Elisa Sunem tẃi tháng phuru aro khoroksa gwnang bwrwima tongmani. A bwrwima Elisano chánani kobok kha, hakhe bo a lama tẃi láiwi tháng tháng phuru bo aro mai chá chá-o,

⁹bo bwsaino hai hwnwi sa kha, “Ang kaham khe saui mano, oro phai phainai bo wng kha Kaitorni borok kwthar.

¹⁰Phai di, chini núkhúng saka-o nok bwsa te khe khungsa tang lai anw, aro thuthai kaisa, songphang kaisa, maicha kaisa tei chati kaisa ton lai anw, chini aro phai khe aro tongwi man anw.”

¹¹Salsa bo aro phai kha tei nokni sakani nokni khotolo thángwi aro lenglaui kha.

¹²Hakhe bo bini seleng Gehajino hai hwnwi sa kha, “Sunamni a bwrwimano ringhor di.” A bwrwima ringjak kheno phaiwi bini bwskango bacha phai kha.

¹³Hakhe bo Gehajino hai hwnwi sa kha, “Bwrwimano sẃng di, ‘Nai di nwng chini bagwi aswk khlai kha. Nini bagwi ang tamo khlaiwi man?’ Ang nini wngwi habugrano eba sengkrak bokhorokno phano sa chru di da hwn?” A bwrwima hai hwnwi sa kha, “Ang ani sakni bororokni bisingo’-no tongo.”

¹⁴Elisa Gehajino hai hwnwi sẃng kha, “Hakhe bini bagwi tamo khlaina nangnai?” Gehaji hai hwnwi sa kha, “Nai di, bini bwsa chwla khoroksa phano kwrwi tei bini bwsai bo chakra súk kha.”

¹⁵Hakhe bo hai hwnwi sa kha, “Bwrwimano oro ringhor di.” Bo bono ring kheno bo phaiwi duglamo bacha phai kha.

¹⁶Hakhe Elisa bono hai hwnwi sa kha, “Khalini tabuk hai’-ono nwng absa khoroksa ma bam anw.” Tei a bwrwima hai hwnwi sa kha, “I’nhi, ani bubagra, o Kaitorni borok, nini selengjwkno ta bandi ja di.”

¹⁷Tamo khe Elisa sama haino ogo bwsa wng kha tei bisi kiphilwi a jora sók phai khe bo bwsa chwla khoroksa man kha.

¹⁸Tei a chwrai tor kha-lok kha. Tabuk salsa khe omo hai wng kha, salsa mai ramani jora-o ranairok bai baksa bupha tong thani tháng kha.

¹⁹Achomsa bo hai hwnwi chirik kha, “O Apha, ani bokhorok sa-o, ani bokhorok sa-o.” Bupha seleng khoroksano hai hwnwi sa kha, “O chwraino bumani thani tlangwi tháng di.”

²⁰Seleng o chwraino bumani thani kiphilwi tlangwi tháng kha, chwrai bumani yapha khuri-o sal kwpal cholong jora bamjagwi tong phuru’-ono thwi kha.

²¹Hakhe buma Elisa tongmani a sakani khotolo tlangwi tei Elisani thuyamo mokholwi rw kha tei dugar soui nongkhorwi tháng kha.

²²Hakhe bo bini bwsaino ringwi hai hwnwi sa kha, “Khoroksa swk selengno koraichirka bai ani oro rohor di, ang diyari Elisani thani thángwi daktino kiphilwi phainai.”

²³Hakhe bo hai hwnwi sa kha, “Tamni bagwi nwng tini bini thani thángnai ba?” Tini ba Sabat sal buya tei tal nuk swkang buya. Hakhe bo hai hwnwi sa kha, “Ta uana di,”

²⁴Hakhe bo koraichirka saka-o kasaui bini selengno hai hwnwi sa kha, “Dakti Koraichirka him rwui bwskango swkangwi tháng di, ang sa ya sak twrwk ta wng di.”

²⁵Hakhe bo aroni Karmel hathái-o Kaitorni borok tong thani tháng kha. Bo Kaitorni a borokno bini phaising phaimani nuhurwi bini seleng Gehajino hai hwnwi sa kha, “Iko nahar di Sunamjwkmano;

²⁶bo khachigwi bo bai malaiwi sẃngwi di, bini bwsai tei bwsla ba kaham kwrwng da tong bai,” bwrwima hai hwnwi sa kha, “kaham kwrwng mángno.”

²⁷Ulo bo Elisani thani sók phai khe, bini yakungo kwbak kha. Abo bai Gehaji bono dagarwi rwui rohorna nai kha tamo khe Elisa bono hai hwnwi sa kha, “Ahai ta khlai khu di, bini bwkha belai khe khamjak tei Subraiyung abono tabukbo ano mungsa phano sa ya kho.”

²⁸Hakhe bwrwima bono hai hwnwi sa kha, “Ang nono bwsa da san kha ba? Ani kháno ta thwi rw di hwnwi nono ang sa ya diba?”

²⁹Elisa Gehajino naisigwi hai hwnwi sa kha, “Do di! nini yago ani latha naui tháng di. Lama-o khoroksa swk bai malai phano kók tháisa phano ta sa di eba khoroksa swk nwng bai kók sacha khe ta sa phi di. Dik dik thángwi lathano a chwraini bwsak saka-o beraui di.”

³⁰A chwraini buma Elisano hai hwnwi sa kha, “Ang Subraiyung kwthangni thani tei nini thani swmai tangwi sa-o, ang nono yakarwi tháng glak,” hakhe bo bachaui a bwrwima bai tháng kha.

³¹Tabuk Gehaji bórokni swkang swkang thángsok kha tei Elisani lathano a chwraini bwsago beraui kha; hai phano aro thángmani mungsa sari eba mari si li ya. Hakhe bo Elisani thani kiphilwi thángwi hai hwnwi saui kha, “Chwrai sicha ya kho.”

³²Elisa nok bisingo sók phaiwi nuk phai kha, a chwrai kwthwi bini thuyamo mokholjak.

³³Hakhe bo nogo habwi a khoroknwino phataro rohorwi dugar kholobwi Subraini thani suri kha.

³⁴Hakhe bo a chwraini saka-o botok khe roko kha tei chwraini búkhúk bai bini búkhúk, bini mokol bai bini mokol, bini yak bai chwraini yak thepaui aro roko kha. Bo a chwraini saka-o thepaui pholok kha tei a chwraini bwsak tungsa kha.

³⁵Elisa bacha kha tei nok bisingo srapsa himgurungwi kiphilwi a chwraini saka-o botok wngwi phi kha; hakhe a chwrai uáisni haichuk kha tei mokol phiyok kha.

³⁶Hakhe Elisa Gehajino ringwi hai hwnwi sa kha, “Sunamni a bwrwimano ringhor di,” Hakhe bo bwrwimano ringhor kha. Bo aro phai khe Elisa bono hai hwnwi sa kha, “Iko, nwslano tlang si di.”

³⁷Hakhe a bwrwima nok bisingo phaiwi bini yakungo romwi ha-o klaiwi khulum kha; hakhe bo bwslano bamwi nongkhorwi tháng kha.

³⁸Aro ha gwnangwi asari nang khe Elisa tei uáisa Gilgalo kiphil phai kha. Tabuk bodol kaisa diyarirok bini bwskango achuk laiwi tong laijak; tei bo bini selengno hai hwnwi sa kha, “Twk kotormano hóro boksa di tei bórokni bagwi mai-mui sóng di.”

³⁹Bórokni bisingni khoroksa mui kwthwng kholnani hapharo nongkhorwi tháng kha, hakhe bolongni angur nuk kha, bo bolongni bwtháibo nuk kha. Abórokno tubu-ui abono tanphinigwi twk boksajago khichon kha, hai phano abórok tamo bórok mungsa sini li ya.

⁴⁰Chá lainani bagwi bororokno bok lai kha. Hakhe bórok chána cheng lai khe’-no chirigwi hai hwnwi sa lai kha, “O Kaitorni borok, omo ba butharnai se bla.” Bórok abono cháui man li ya.

⁴¹Hakhe Elisa hai hwnwi sa kha, “Auan kwsap kisa ani thani tubu di. Tei bo abono twgo rwui sa kha, bororokno chánani bagwi bogwi rw di.” Hakhe aro tei mungsa dera rwnai kwrwi kha.

⁴²Bal Salisa-o tongnai borok khoroksa Elisani banta tháiskangni auan belep, lep nwichi auan belep tei bini kholjango bwchlwi kwtal tubu kha. Elisa hai hwnwi sa kha, “Omono bororokno rw di tei chá rw di.”

⁴³Hakhe bini seleng hai hwnwi sa kha, “Aswk bai ang borok khorok sarano bahai khe thwk rwui mannai?” Elisa hai hwnwi sa phi kha, “Bórokno chána bagwi rw di; tamni hwn khe Subraiyung sa-o: ‘bórok chá baiwibo bára tong rwk anw.’ ”

⁴⁴Hakhe bo bórokno chámung rw kha; tei Subraiyung sama tẃi’-no bórok chá baiwibo bára tong rwk kha.