Read Kok Borok 2 HABUGRA 5 Bible Online

2 HABUGRA 5 - Kok Borok bible

2 HABUGRA 5

¹Naman Siriyani habugrani sengkrakrokni bokhorok, Siriyani habugra bai belai khe kuchugo bórom khlaijago, tamni hwn khe, Namanni bising tẃi khe Subraiyung Siriyani sengkrakrokno kwplai khlai kha. Bo wng kha belai phan gwnang sengkrak, phiya ba bo biyadi bai chájak.

²Uáisa Israil bai Siriya choba nang lai phuru, Siriyani bororok Israilni bwrwi bwsa khoroksano tlangwi tháng lai kha tei bo Namanni bihikni selengjwk wng kha.

³Salsa selengjwk bini bugrajwkno hai hwnwi sa kha, “Ang ani bugrano Samaria-o tongnai diyarini thani tháng rwna muchungo! Bo bini biyadino ham rwui mannai.”

⁴Hakhe Naman abo khna khe habugrani thani thángwi a bwrwi bwsa samani kókno saui kha.

⁵Siriyani habugra hai hwnwi sa kha, “Israilni habugrani thani tháng di tei aro kóktunno rwui di.” Hakhe Naman thamchisai rukphaini rang dokchisai rangchak belep tei kangchi rí kaham tlangwi tháng kha,

⁶bo Israilni habugrani thani kóktun tubu-ui phai kha, aro khe hai hwnwi swijak, “Nini thani o kóktun sógwi khe’-no ang ani seleng Namanno bini biyadi bemuk ham rwnani bagwi nini thani rohoro hwnwi nwng saui man di.”

⁷Israilni habugra kóktunno pori khe bo hai hwnwi saui bini rí sichik kha, “Siriyani habugra bahai khe ano o borokni biyadino ham rwnai hwnwi ba tong kha? Bo ba tamo ano mwthangwi eba butharwi mannani phan tẃijak Kaitor hwnwi da uansuk lang? Bo ang bai uálainani lama se naitugwi tong kha, omo katswi srai-srai!”

⁸Elisa diyari Israilni habugrano rí sichikma khna hor khe bo habugrano hai hwnwi kók kwchárwi rohor kha, “Nwng tamni nini rí sichik? Bono ani thani rohor di, hakhe bo Israilo diyari tongo hwnwi saui man si thung.”

⁹Hakhe Naman bini korairok tei korai malkhungrok bai phaiwi Elisa tongma nokni duglamo bathak phai kha.

¹⁰Elisa bini borok khoroksano rohorwi hai hwnwi sa rw hor kha, “Tháng di Jordan twima-o uáisni súchaui di, hakhe nini bukur ham phinai tei nwng sap-sutra wngnai.”

¹¹Tamo khe Naman belai jolijagwi hai hwnwi saui kiphilwi tháng kha, “Bo nongkhorwi phaiwi se bini Subraiyung Kaitorni thani suri san anw tei ani hamya-o yak tangwi biyadi ham rw anw hwnwi se ang chongmani!

¹²Israilni twimani slái Damaskosni Abana bai Pharpar ham kuk ya da? Ang ba aro’-no sú-ui ham glak diba?” Hakhe bo thamchi kajagwi thángwi pái kha.

¹³Tamo khe bini selengrok gana-o phaiwi hai hwnwi sa phai kha, “Apha, tumung diyari nono kaisa samung kutuk khlai di hwnwi hwn khe nwng ba abono khlai glak diba? Hakhe súchaui simi sap-sutra wng di hwnmano ba tamo khlai ya tongnai?”

¹⁴Hakhe Naman Elisa samani hai’-no nongkhorwi thángwi Jordan twima-o uáisni twi lobwi kha tei bini bahan chwraini hai’-no chwraini hai wng phi kha tei sap-sutra wng kha.

¹⁵Hakhe bini bebak bororok bai Elisani thani kiphilwi thángwi bachaui kha; tei bo hai hwnwi saui kha, “Tabuk ang saui man kha o ha saka-o Israilni Kaitorno karwi tei kubun Kaitor kwrwi, hakhe aboni bagwi ani o hili rwmano yachak ja di.”

¹⁶Tamo khe Elisa hai hwnwi sa kha, “Ang monmani Subraiyung kwthangni mung bai swmai tangwi sa-o, ang mungsa yachak glak.” Naman yachakna bagwi soi rwna nai kha, tamo khe bo so se soi li ya.

¹⁷Hakhe Naman hai hwnwi sa kha, “Nwng ani hili yachak ya khe koraichirka maknwi horwi páimani swk nini oroni hano ani nogo tlangna rw ja di. Tamni hwn ba ang tabukni simi Subraiyungno karwi tei kubun mwtaini thani sókmung yaphar li ya tei ratharmungbo rathar li ya.

¹⁸Hakhe Subraiyung ang habugra bai pal khe Siriyani mwtai Rimon mwtai nogo surina tháng phano ano nakar anw.”

¹⁹Elisa bono hai hwnwi sa kha, “Kwchang kwchang khe tháng di.” Hakhe Naman kisa hakchalo tháng kha.

²⁰Elisani seleng Gehaji hai hwnwi uansuk kha, “Ani bugra Naman Siriyasa aswk tubumarokno narwk yaui haino rwui rohor kha, ang bono rwktharwi thángwi kisa swk bini thani narwk sinai.”

²¹Hakhe Gehaji Namanno rwktharwi khachigwi tháng kha. Naman borok khoroksano bini thani khachigwi phaima nuhur khe korai malkhungni nongkhorwi, “Tamo wng lang?” hwnwi sẃng kha.

²²Tei bo hai hwnwi sa kha, “Bebak kahamno. Ani bugra nono saui gra di hwnwi rohor kha, tabukno Iphraimni hathái kami-o tongnai diyarirokni bodolni khoroknwi sók phai kha tei bo bórokni bagwi belep thamsai rukphai belep tei rí kaham jornwi rohor di hwn kha.”

²³“Talen kwnwi yachak ja di,” hwnwi Naman sa kha. Talen kwnwi kupulung sola tháinwi-o khachobwi tei rí jornwino Gehajino yachakna bagwi koi kha. Bo abono bini seleng khoroknwino rw khe bórok abono ruju-ui Gehajini swkang swkang tháng lai kha.

²⁴Bo hathái-o sók phai khe bo bórokni yakni abono naui nogo ton kha; hakhe bo bórokno rwui rohor khe bórok tháng kha.

²⁵Hakhe bo bini nok bisingo hap kha tei bini bugrani bwskango bachaui kha. Elisa bono hai hwnwi sa kha, “Gehaji nwng biyang thángwi tongwimani?” Hakhe, “Nini seleng kwrẃngsa-o phano tháng ya ble,” hwnwi bo sa kha.

²⁶Hakhe bo bono hai hwnwi sa kha, “Nwng bai malaina phuru korai malkhungni nongkhor phuru ang ba phola bai nwng bai baksa ya da? ‘Tabuk rang, rírok, oliblwng, angurlwng, merarok, musukrok, selengrok tei selengjwkrok nanani jora de wng lang?’

²⁷Hakhe tabuk Namanni biyadino nwng man sinai tei nini bosongrok mol brúmni bagwi man sinai.” Hakhe Gehajini bwsak khul hai kuphur khe biyadi manẃi ongkhorwi tháng kha.