Read Kok Borok 2 HABUGRA 6 Bible Online

2 HABUGRA 6 - Kok Borok bible

2 HABUGRA 6

¹Tei diyari bodol kaisa Elisano hai hwnwi sa lai kha, “Nai di, nwng tongmani nini a nok belai bwsa kuk wng kha.

²Chwng tongnani nok tangwi manna tẃi khe Jordano buphangrok tanwi tubuna bagwi chwngno rohor ja di.” Elisa, “Tháng lai di,” hwnwi sa kha.

³Hakhe khoroksa sa kha, bórokni bere khoroksano bórok bai thángnani koiwi kha, hakhe bo soi kha.

⁴Hakhe bo bórok bai baksa tháng kha. Tei bórok Jordano sók phaiwi buphang tanna cheng lai kha.

⁵Bórokni bere khoroksa buphang tanwi tong phuru achomsa rua kogwi twi-o klaiwi tháng kha; hakhe bo chirigwi hai hwnwi sa kha, “Ang tamo khlaima cha kha!” Omo ang buinino se tubu-o.

⁶Hakhe Elisa hai hwnwi sẃng kha, “Abo buro-o klai kha?” A borok buro-o klaiwi phunuk kha. Hakhe Elisa bedek bwsa tanwi twi-o khiklai rwui sorni ruano twi saka-o kuphungsa rw kha.

⁷Hakhe bo hai hwnwi dagi kha, “Khochaui na si di,” hakhe a borok khochaui na kha.

⁸Salsa Siriyani habugra Israilrok bai choba nang lai phuru bini selengrokni thani ahai hwnwi kókbiti san kha, “Ani batham omo hai omo hai jidolo se wngnai.”

⁹Tamo khe Elisa Israilni habugrano aro gana-o ta tháng di hwnwi sa rw hor kha, tamni hwn ba Siriyarok aro swprakna bagwi naisingwi tong lai-o.

¹⁰Hakhe Israilni habugra aro tongnairokno hus khlai rwui sa hor kha, hakhe bórokbo mwrwk lai’-no tong lai kha. Omo hai uáinwi uáitham’-no wng kha.

¹¹Siriyani habugra abo bai belai uanajak kha; bo bini bebak tẃiphangrokno ring baiwi hai hwnwi sẃng kha, “Norokni bisingo sabo Israilni habugrani bwkhak daiwi tong?”

¹²Bórokni bere khoroksa hai hwnwi sa kha, “Khoroksa buya, o bugra. Diyari Elisa se Israilni habugrano ringwi nwng nini noksingo tongwi serek khe samano suda saui rw-o.”

¹³Hakhe bo hai hwnwi sa kha, “Bo buro wng kha, thángwi naitugwi di; ang borok rohorwi bono rom rwnai.” “Bo Dothano se” hwnwibo sajak kha.

¹⁴Elisa Dothano se tongo hwnwi sajak khe bo korairok tei korai malkhungrok bai sengkrak kwbángmano aro rohor kha, bórok aro horo sógwi khe chorsa khe gerep lai kha.

¹⁵Teini phung aisirisiri-o Elisani seleng bachaui phataro thángwi nuk kha, Siriyani sengkrakrok, korairok, korai malkhungrok bai kamiyungno kitingjak. Bo Elisani thani kiphilwi thángwi hai hwnwi saui kha, “Ani bugra chwng tamo khlai lai sinai?”

¹⁶Elisa hai hwnwi sa kha, “Ta kiri di, bórokni bwkhak tongmani slái chini bwkhak tongma se báng kugo.”

¹⁷Hakhe bo hai hwnwi suri kha, “O Subraiyung, bo nukna tẃi khe bini mokol phiyógwi rw di,” Subraiyung bini surima khna kha tei Elisani seleng hathái kupulung korairok bai hórni korai malkhungrok Elisano kitingjak khe nuk kha.

¹⁸Siriyarok bono kebengsaui phai khe, Elisa hai hwnwi suri san kha, “O Subraiyung, o bororokno mokol nuk ya khlai rw di.” Subraiyung bini surima khna kha, hakhe bórokno mokol nuk ya khlaiwi rw kha.

¹⁹Hakhe Elisa bórokni thani thángwi hai hwnwi sa kha, “Norok lama koró kha; omo ba norok naitukmani kamiyung ya bla.” Ani utung utung phai di, ang norok naitukmani a borokni thani tlangnai, hakhe bo Samaria-o bórokno tlang kha.

²⁰Bórok kamiyungo hap kheno Elisa hai hwnwi suri san kha, “Subraiyung bórok nukgwi manna tẃi mokol phiyógwi rw bai si di.” Subraiyung bórokni mokol phiyogwi rw bai khe saui man kha bórok Samaria bisingo se sók phai kha.

²¹Israilni habugra Siriyarokno nuk khe Elisano hai hwnwi sẃng kha, “Ang bórokno butharwi pái sinai de? Ang bórokno buthar sinai de?”

²²Bo hai hwnwi sa kha, “Nwng bórokno romwi manmaroknobo khoroksano phano buthar man glak. Nwng khaui tubumani bórokni sengkrakrokno suda ta buthar di. Bórokno chá rw di, khan rw di tei bórokni habugrani thani kiphilwi tháng thung.”

²³Hakhe Israilni habugra bórokni bagwi chámung panda kotor songcha kha tei bórok chá bai khe, nung bai khe, bo bórokno Siriyani habugrani thani kiphilwi rohor kha. Aboni ulo khe Siriyarok tei ha Israilno segwi na phai li ya.

²⁴Sal kisani ulo Siriyani habugra Benhadad bini bebak sengkrakrokno tẃiwi Israilni kamiyung Samaria-o thángwi gerep lai kha.

²⁵Bórok gerebwi tongma bai Samaria-o bok nang kha tei koraichirka bokhorok tháisa tháisa morokma charchi rukphaini rang tei tokthuni bikhi[2] malasa khe kaiba rukphaini rang bai phaljago.

²⁶Salsa Israilni habugra kamiyungni chokdeual gana tẃi lái tháng phuru bwrwima khoroksa chirigwi, “O habugra ano chuba ja di” hwnwi sa kha.

²⁷Bo hai hwnwi sa kha, “Subraiyung se nono chuba ya hwn khe ang bahai khe chubaui mannai? Ani hwnwi ba chájaknai-nungjaknai da tong ba?”

²⁸Hakhe bo hai hwnwi sẃng kha, “Nini tamo tekto tong?” A bwrwima hai hwnwi sa kha, “O bwrwima ano sa kha, ‘Phai di tini nini chwraino chá lai si anw; khwna khe ani chwraino’-no chá lainai.’

²⁹Hakhe ani angslano sóngwi chá lai kha, teini salo ang bono hai hwnwi sa kha, ‘Phai di nini nwslano chá lai si anw’; tamo khe bo bwslano huiwi ton kha.”

³⁰Abo khna kheno habugra bini rí sichik kha, chokdeualo tongnairok habugrano rí soroi kanjak khe nuk bai kha.

³¹Habugra hai hwnwi sa kha, “Ang tini sal hap ya sini’-no Saphatni bwsla Elisano tumung butharwi man ya khe Kaitor ano abo hai’-no eba teibo bára kuk phano khlai thung!”

³²Elisa nogo achugwi tongmani, okrarokbo bo bai pal khe achuk laijak. Habugra butharnairokno rohorwi páijak, tamo khe a bororok sók phai ya sini Elisa okrarokno hai hwnwi sa kha: “A borok butharnai ano butharna bagwi tabukno borok rohormani norok saui da man? Nai di, o butharnairok sók phai kheno dugar soui berebwi rw di. Bini utung-utung khe bórokni habugrani yaprini khorangno ang khna ya diba?”

³³Bo abo sa baidrop se wng si-o, hai khe’-no habugra[3] sók phaiwi sa kha, “Subraiyung baithang se chini saka-o tekto sók phai rw-o, tamni bagwi ang tei Subraiyungno mungsa swk khlai thung hwnwi naisingwi tong sinai?”