Read Kok Borok 2 HABUGRA 8 Bible Online

2 HABUGRA 8 - Kok Borok bible

2 HABUGRA 8

¹Tabuk khe Elisa Sunemo tongnai bwrwi, bini bwslano bo mwthangwi tisamani a bwrwino hai hwnwi sa kha, “Bacha di, nini núkhungno tẃiwi nwng manma tẃi kwrẃngsa swgo tongwi di; tamni hwn ba Subraiyung o ha-o chacharara khlainai, abo bisisni tong phlainai.”

²Hakhe bwrwimabo Kaitorni borok sama tẃi’-no bini núkhung bai khe Philistia ha-o nokha bisi kaisni tongwi kha.

³Nokha bisi kaisnini páithago bwrwima Israilo kiphilwi habugrani thani bini nok tei bini harok kiphilwi rw phi thung hwnwi sanani tháng kha.

⁴Aphuru habugra Elisani seleng Gehaji bai kók sa laiwi tong lai-o, bo hai hwnwi sẃng kha, “Elisa samung kotor khlaimarokno ano saui khna rw di.”

⁵Gehaji habugrano Elisa bahai khe kwthwino mwthang kha, a kókno saui tong phuru khe’-no a bwsa mwthangjaknaini buma habugrani thani phaiwi bini nok tei harok kiphilwi rw di hwnwi sa phai kha. Hakhe Gehaji hai hwnwi sa kha, “O habugra, iko le omono Elisa bai mwthangjaknai bwsa tei bini buma.”

⁶Habugra bwrwimano sẃng khe, bwrwima bono sa kha, hakhe habugra khoroksa tẃiphangno chongwi hai hwnwi dagi kha, “Bini manna tongma jora tẃi bono rw di, bo yakarwi thángmani salni simi tini jora bini ha-o mai-khul tháima bebak kiphilwi rw di.”

⁷Elisa Damaskoso phai phuru Siriyani habugra Benhadad hamya klaiwi tongo, habugra Elisa aro tongo hwnwi sajak khe,

⁸bo Hajaelno hai hwnwi sa kha, “Hili tlangwi diyarini thani tháng di, hakhe ang tei ha de hamno hamya Subraiyungni thani sẃngwi nai di hwnwi saui di?”

⁹Hakhe Hajael mak brwichi mangingang bai Damaskoso aswk kahamrok tháimani tlangwi Elisano malainani tháng kha, Hajael bo bai malai khe’-no bono hai hwnwi sa kha, “Nini seleng Siriyani habugra ano nini thani rohorwi bini hamya ha de hamno hwnwi sẃng horo.”

¹⁰Elisa hai hwnwi sa kha, “Tháng, di bono saui di, ‘Subraiyung ano phunuk kha, bo hamma le hamnai,’ tamo khe bo thwinai.”

¹¹Hakhe Elisa Hajaelno mwkhang bom ya sak aswk khe naisigwi tong kha. Hakhe Kaitorni borok kapnani cheng kha.

¹²Hakhe Hajael hai hwnwi sẃng kha, “Ani bugra tamni bagwi kap lang?” Hakhe bo hai hwnwi sa kha, “Tamni hwn ba ang saui mano, nwng Israil bororokni bagwi belai khe hamya khlainai; nwng bórokni nok-hukrokno sókchanai, bórokni sikla kaham kahamrokno seng bai tanwi butharnai, chwrai bwsarokno ha-o kádulwi butharnai tei ogo bwsa gwnangrokno pháng pháng khe bohok raphru-ui butharnai.”

¹³Hajael hai hwnwi sa kha, “Bahai khe ang aswk phan gwnang wngwi mannai?” “Ang ba mungsa ya bla?” Elisa hai hwnwi sa kha, “Nwng Siriyani habugra wngnai, hwnwi Subraiyung ano phunuk kha.”

¹⁴Hakhe bo Elisani aroni tháng kha tei bini bugra Benhadadni thani kiphilwi tháng kha, bo bono hai hwnwi sẃng kha, “Elisa nono tamo sa kha?” Bo ano, “Nwng kubui’-no hamnai,” hwnwi sa kha.

¹⁵Tamo khe teini salo bo rítrak kangsa naui abono twi-o chomsaui habugrani mwkhango bo thwi ya sak phehelwi ton kha. Hakhe Hajael bini yagulo Siriyani habugra chá kha.

¹⁶Israilni habugra Ahabni bwsla Joram nokha bisi kaiba habugra chámani jora-o, ha Judani habugra Jihosapatni bwsla Jehoram bugra chána chengo.

¹⁷Bo nokha bisi thamchinwi-o ha Juda-o habugra chá kha tei bo Jerusalemo tongwi nokha bisi char jora habugra chá lang kha.

¹⁸Bini Israilni habugrarok tong tẃi’-no tong kha, Ahabni núkhungni bororok tong tẃi tong kha, tamni hwn khe bihik wng kha Ahabni bwsajwk. Bo Subraiyungni bwskango samung cha ya máng khlai kha.

¹⁹Hai phano Subraiyung bini seleng Daudni bagwi Judano sokomorna muchung ya, tamni hwn ba bo bini bosongno chati tháisa rwna hwnwi swmai tangmani tei bini bosongo kusung kusung habugra chánai.

²⁰Bini jora-o Idomsarok Judano kebengwi bacha lai kha tei bórok sak sakni bagwi habugra khoroksa song lai kha.

²¹Hakhe Joram bini bebak korai malkhungrok tlangwi Jairno láiwi tháng kha tei horo bachaui bo tei bini korai malkhung sengkrakrok bórokno tanthar-súthar khlai kha, hai phano bini sengkrakrok nogo khárwi tháng bai kha.

²²Hakhe Idom tabuk jora Judani ari wngwi kebengwi tongo. Libnabo aphuruni simi’-no ari wngwi tongo.

²³Tabuk Joram samung khlai langmani kók abo ha Judani habugrarokni bosong bijabo swijak kha.

²⁴Joram thwi kha tei Daudni kamiyungni habugrarokno phobmani simalwngo’-no bo’-bo phobjak kha tei bini bwsla Ahajaia bini yakchu-o habugra chá phi kha.

²⁵Israilni habugra Ahabni bwsla Joram nokha bisi chiknwi habugra cháui tong phuru, Jehoramni bwsla Ahajaia ha Juda-o habugra chána cheng kha.

²⁶Ahajaia habugra chá phuru bini umor nokha bisi nwichinwi umor wng kha. Bo Jerusalemo nokha bisi kaisa habugra chá lang kha. Bini bumani mung wng kha Athalia, bo Israilni habugra Omrini busuk.

²⁷Bo Ahabni núkhungni tongmung tong tẃi khe tong kha tei Subraiyungni bwskango mwchang ya samung máng tang kha, tamni hwn khe bo wng kha Ahabni núkhungni chamari.

²⁸Bo Ramot-Giliado Siriyani habugra Hajael bai choba nang lainani bagwi Ahabni bwsla Joram bai tháng lai kha, aro Siriyarok Joramno kwsa khlaiwi rw kha.

²⁹Tei habugra Joram Siriyani habugra Hajael bai choba nang lainani nongkhorwi tháng phuru Rama-o Siriyarok bai kwsa khlaiwi rohorjakmani hamnani bagwi Jejrilni kamiyungo kiphilwi tháng kha tei Ahajaia Judani habugra Jehoramni bwsajla, Ahabni bwsajla Joramno hamya klaiwi tongmani bagwi hamya nainani hwnwi Jejril kamiyungo tháng kha.