Read Kok Borok 2 HABUGRA 9 Bible Online

2 HABUGRA 9 - Kok Borok bible

2 HABUGRA 9

¹Aphuru Elisa diyarirokni bisingo khoroksano ringhorwi hai hwnwi sa kha, “Tiyar wng di tei gola-o olibni thok naui Ramot-Giliado tháng di.

²Tei nwng aro sógwi khe Jihosapatni bwsla, Nimsini khe busuk Jehuno naituk di, bini bayap bodolni swkagwi bono bisingni sakni nokni khotolo tlang di.

³Bini bokhorogo o thokno lukhlai rwui saui di, ‘Omo Subraiyung sa-o, ang nono thok phulwi Israilni habugra snam kha.’ Hakhe dugar phiyogwi oroni khár si di, ta ler si di.”

⁴Hakhe a sikla diyari khoroksa Ramot-Giliado tháng kha.

⁵Bo aro sók phai khe khoroksano sengkrak bokhorok kókchap nogo khe bono hai hwnwi sa kha, “O sengkrak bokhorok, ang nono kók tháisa sana tongo.” Hakhe Jehu, “Chini bisingo sabo bai sanai?” hwnwi sẃng khe, bo “nwng bai se, o sengkrak okra,” hwnwi sa kha.

⁶Hakhe bo bachaui nok bisingo hap laiwi tháng kha tei a sikla diyari Jehuni saka-o thok lu-ui hai hwnwi sa kha, “Omo Israilni Subraiyung Kaitor sa-o. Ang nono Israilni Subraiyungni bororokni saka habugra wngnani thok phulo.

⁷Nwng khe Ahabni núkhung nini bugrano ma swpraknai, abo Jesebelno sátokna, tamni hwn ba ani diyarirokno tei ani selengrokno butharmani yagul su-ui manna bagwi.

⁸Ahabni bebak bosong ma thwi bainai, ang Ahab bosongni bebak chwlano khajak phano, phiyókjak phano Israilni nornai.

⁹Tei ang Ahabni bosongno Nebatni bwsla Jehoramni bosongo khlaimani hai tei Ahiani bwsla Basani bosongno khlaimani hai khlainai.

¹⁰Jejril hapharo sẃirok Jesebelni bahanno chá anw tei khoroksabo bono phobnai tong glak.” Abo sa bai khe’-no a diyari nokni nongkhorwi khachik lang kha.

¹¹Jehu kiphilwi tẃiphangrokni bodolo tháng phi khe bórok bono hai hwnwi sẃng kha, “Bebak kaham máng da?” A kobor nini thani tamni phai? Hakhe Jehu bórokno, “Norok bono sini-o tei bini kókbo saui mano,” hwnwi sa kha.

¹²Bórok hai hwnwi sa phi kha, “Abo kubui ya; tabuk chwngno sa di!” Hakhe bo hai hwnwi sa kha, bo ano o kók se sa-o, “Subraiyung omo sa-o, ang nono Israilrokni habugra chong kha.”

¹³Hakhe bórok bebakno sak sakni rírok khiklai baiwi bini yakung yaphango beraui rw lai kha tei bórok totro kotor tamwi hai hwnwi sa kha, “Jehu se habugra wng kha.”

¹⁴Abo tẃi khe Nimsini busuk Jihosapatni bwsla Jehu Joramni bwskango kebengwi bacha kha, tabuk Joram khe bebak Israilrok bai Ramot-Giliado Siriyani habugra Hajaelno kasu laiwi tong lai-o,

¹⁵tamo khe habugra Joram Siriyani habugra Hajael bai choba nang lai phuru kwsa wngmani hamnani bagwi Jejrilo kiphilwi tháng kha, Jehu hai hwnwi sa kha, “Norokni bwkha tong khe khoroksano phano oro kamiyungni yógwi thángwi Jejrilo saui ta man rw hor di.”

¹⁶Hakhe Jehu korai malkhungo kasaui Jejrilni bwkhak naitugwi tháng kha, aro Joram klaiwi tong kha tei Judani habugra Ahajaiabo Joramno nainani tháng kha.

¹⁷Aphuru Jejrilo kuchuk sakani nok mwrwkjaknai-o tongwi Jehu bai bini palrokno phai laima nuhurwi hai hwnwi sa kha, “Ang bodol kaisa phaima nuhur kha.” Joram, “Bórok bai malainani khoroksa korai sengkrakno rohor di, bo thángwi kók de tong hwnwi sẃng thung,” hwnwi sa kha.

¹⁸Hakhe khoroksa korai sengkrak Jehu bai malainani thángwi hai hwnwi sẃng kha, “Habugra sẃng rwhoro, ‘Kaham kók da tong hwnwi?’ ” Jehu hai hwnwi sa kha, “Kaham kók bai nwng tamo khlainai? Ani uklogo se kasa di.” A mwrwknai, “Kók tunnai bórokni aro sógwima le sógwi kha, kiphilwi se phai phi li ya,” hwnwi sa kha.

¹⁹Hakhe tei khoroksa korai sengkrak rohorjak phi kha, bo aro sók phaiwi hai hwnwi sẃng kha, “Habugra sẃng rwhoro, kaham kók de tong hwnwi?” Jehu hai hwnwi sa phi kha, “Kaham kók bai nwng tamo khlainai?” Ani uklogo se kasa phi di.

²⁰Mwrwknai hai hwnwi sa phi kha, “Kók tunnai bórokni aro sógwima le sógwi kha, kiphilwi se phai phi li ya, bo teibo hai hwnwi sa kha, a korai malkhung kanai khe Nimsini bwsla Jehu kobor hai khe nuhuro.”

²¹Joram hai hwnwi sa kha, “Ani korai malkhung tiyar khlai di,” bórok bini korai malkhung tiyar khlai kha. Hakhe Israilni habugra Joram bai Judani habugra Ahajaia Jehu bai malainani sak sakni korai malkhungo kasa laiwi tháng lai kha. Jejrilo tongnai Nabotni hapharo bórok malai lai kha.

²²Jehuno nuk khe Joram bono, “Kaham kók da tong?” hwnwi sẃng kha. Jehu hai hwnwi sa kha, “Nwma Jesebel tabuk suda takjak mwtairok khulumui tei swkalni kóktháirok tẃiwi tong khe bahai khe chwng kwchang kwchang tongwi man sinai?”

²³Joram uphilwi Ahajaiano, “O phatra Ahajaia,” hwnwi khár kha.

²⁴Hakhe Jehu bini badukhung bai chakhla naui sotonwi Joramni oklebo kok kha tei bini bwkhathái-o yóphlajak kha, bo thwi khe bini korai malkhungni klai kha.

²⁵Aphuru Jehu bini korai malkhung tẃinai Bidkarno hai hwnwi sa kha, “Nwng bono khochaui Jejrilo tongnai Nabot hapharo khiklai rwui di, tamni hwn ba nwng bai ang khoroknwino korai kasa laiwi bini bupha Ahabni uklogo tlang laiwi tong lai phuru-o Subraiyung omo hai bini bagwi kók sakhlai kha.

²⁶‘Miya phuru ang kubui’-no Nabotni tei bini bwsarokni thẃi nuk kha hwnwi Subraiyung ano sa-o, tei ang o ha-o nono yagul sunai.’ Aboni bagwi nwng tabuk bono khochaui Subraiyungni kók tẃi o ha-o khiklaiwi rwui di.”

²⁷Judani habugra Ahajaia abono nuk khe Bet-hagan bwkhak khár kha tei Jehu bono riphrigwi hai hwnwi sa kha, “Bonobo kok di.” Hakhe bórok bono Ibliam gana Guro bini korai malkhung saka-o kok kha, bo Megido jora khárwi thángwi aro thwi kha.

²⁸Hakhe bini selengrok Jerusalemo tlangwi Daudni kamiyungo bini buphasong bai baksa khe phob kha.

²⁹Ahabni bwsla Joram nokha bisi chisa habugra cháui tong phuru, Ahajaia ha Judani habugra chána cheng kha.

³⁰Jehu Jejrilo sók phai khe Jesebel abono khna kha hakhe bo mokolo naithok khe kosom sil kha tei bwkhnai naithok rwui khalwi tailam tẃi naikhlaiwi rohor kha.

³¹Jehu duglamo hap khe’-no a bwrwima, “O Simri nini bugrano butharnaisa kaham kók da tong?” hwnwi sẃng kha.

³²Jehu tailam bwkhak naisigwi hai hwnwi sa kha, “Sabo ani bwkhak tong?” khoroknwi khoroktham gurmarok tailam tẃi bono naikhlaiwi rohor lai kha,

³³tei Jehu bórokno hai hwnwi sa kha, “A bwrwino kokhlaiwi rohor di.” Hakhe bórok bono kokhlaiwi rohor lai kha, bini baksa thẃirok hatina-o tei korairogo siljak bai kha tei bórok bono yakung bai kádul lai kha.

³⁴Hakhe bo bisingo habwi chá kha, nung kha tei hai hwnwi sa kha, “Tabuk nai di, o swraimung nangjak bwrwino tlangwi phobwi si di, tamo khe bo habugrani bwsajwk.”

³⁵Bórok bono phobnani tháng bai khe bokhorok chárá, yakung tei yapharokno karwi tei mungsa nuk lai li ya.

³⁶Bórok kiphilwi phaiwi Jehuno hai hwnwi sa phai kha, “Omo Subraiyung Tisbi-o tongnai bini seleng Eliani khúk tẃi o kók samani, Jejril hapharo Jesebelni bahanno sẃirok chánai,

³⁷tei chá bai ya tong rwkmano Jejril hapharo khi hai khe klaiwi tongnai, hakhe khoroksa phano omo Jesebel hwnwi siniui man glak.”