Read Kok Borok 1 BOSONG 11 Bible Online

1 BOSONG 11 - Kok Borok bible

1 BOSONG 11

¹Hakhe bebak Israil bororok Hebrono Daudni thani kuthum laiwi hai hwnwi sa kha, “Nai di, chwngbo nini bahan tei bwthẃi’-no.

²Agi-o Sol habugra cháui tong phuru nwng se Israil bororokno choba-o tẃithero tei nwng se ani borok Israilrokni mwrwknai wngnai tei bórokno muphunnai hwnwi Subraiyung nini Kaitor swmai tangwi sa-o.”

³Hakhe bebak Israilni tẃiphangrok habugra Daudni thani Hebrono phai lai kha, bo bórok bai Subraiyungni bwskango kók kha lai kha. Daudno Israilni habugra chong lai kha, Samuelni tẃi Subraiyung swmai tangmani hai khe bórok bono thok phulwi Israilni habugra chong lai kha.

⁴Daud bai bebak Israilrok Jerusalemno tháng lai kha. Abo khe Jebuso, Jebussarok tong bai-o.

⁵Jebusrok Daudno hai hwnwi sa kha, “Nwng bisingo habwi man glak.” Tamo khe Daud kamiyung kwrakma Siyonno segwi na kha tei abo Daudni kamiyung hwnjak kha.

⁶Daud hai hwnwi sa kha, “Jebusrokno swkang butharwi mannai bo’-no sengkrakrokni bokhorok wngnai.” Tei Jeruiani bwsla Joab swkang tháng khe bo’-no sengkrak bokhorok wng kha.

⁷Daud kamiyung kwrakma-o tong kha, aboni bagwi Daudni kamiyung hwnjago.

⁸Hatháini salka bwkhakni simi chengwi bo kamiyung tang kha, ulo Joab khe pái rwui tangwi rw kha.

⁹Daud phan gwnang wng rwk-wng rwk wng kha, tamni hwn ba phan gwnang Subraiyung se bo bai tongo.

¹⁰Omorokno Daudni phan gwnang seng kwrakrok. Subraiyung Israilrokni bagwi swmai tangmani hai khe bórok tei Israilrok bai baksa bono habugra snamnani bagwi tei bini ha-o chubachu rw lai kha.

¹¹Daudni phan gwnang sengkrakrok: Jasobiambo Hakmoni bosongni borok, bo “Khorokthamni”[10] bokhorok. Bo borok khorok thamrarok bai choba nang laiwi bini olonga bai nang laiwi bebakno buthar bai kha.

¹²Khoroktham phan gwnangrokni bisingo tei khoroksa khe Ahohisa Dodoni bwsla Eliasar.

¹³Philistiasarok chobani bagwi aro kuthum lai phuru bo Daud bai Pasdamimo tongo. Israil bororok khár bai phuru-o bo barlini panthoro tongo.

¹⁴Phiya bo panthor kwcharo bachaui Philistiasarok bai choba nang laiwi bórokno buthar bai kha, Subraiyung bono kwplai khlai kha.

¹⁵Salsa khe khorokthamchini bisingo khoroktham sengkrak bokhorokrok Adulamni hagurung Daud tongmani holongo tháng lai kha, aphuru Philistiani sengkrakrok Rephaim harungo batham kha laiwi tongo.

¹⁶Aphuru Daud khe chokdeual kwrakma kitingjak hathái saka-o tongo, bodol kaisa Philistiasarokni sengkrakrok Betlehemno sek phai kha.

¹⁷Daud nogo thángna muchungwi hai hwnwi sa kha, “Sabo ano Betlehemni duglam ganani twikhorni twino khan rw phaiwi mannai?”

¹⁸Hakhe khoroktham phan gwnang sengkrakrok Philistiasarokni batham tẃi thángwi Betlehem duglamni twikhorni twino khógwi Daudni thani tubu lai kha. Tamo khe Daud abono nung li ya, bo abono Subraiyungni thani yapharwi lukhlaiwi khibi kha.

¹⁹Bo hai hwnwi sa kha, “Ang abono nungwi se man ya, ang bórokni thẃino nungmani se klainai, tamni hwn ba bórok kiri-kóró khe se abono tubu lai-o.” Aboni bagwi bo nung li ya. Abo hai khoroktham phan gwnangrok se khlai-o.

²⁰Joabni takhuk Abisai khorok thamchini[11] bokhorok. Bo bini olonga bai khe khorok thamra[12] bororok bai choba nang laiwi buthar bai kha, hakhe khorok thamchirokni bisingo mung man kha.

²¹Bo khorok thamchirokni bisingo belai mung gwnang kuk wng kha tei bórokni bokhorok wng kha, phiya ba “Khoroktham” bokhorok hai le wng súgwi man ya.

²²Kabjilni Jehoiadani bwsla Benaia bo mung gwnang sengkrak, bo samung kotor kwbángma tang kha tei Moabni sengkrak kotor khoroknwino buthar kha. Bo salsa kothor klaimani salo hakhoro thángwi singho masano buthar kha.

²³Bo khoroksa Ijipni borok yago rí takmani rwsami hai khe olonga tẃijak. Benaia bini thani bini sengkrak bai thángwi Ijipni borokni yakni olongano segwi naui bini olonga bai’-no buthar kha.

²⁴Abórokno Benaia samung kotor tangmani, hakhe bo khorok thamchirokni bisingo mung khlai kha.

²⁵Bo abo hai khe thamchirokni bisingo mung khlai kha, phiya ba “Khorokthamrokni” bisingo le aswk wng ya. Daud bono bini mwrwknai chong kha.

²⁶Phan gwnang sengkrakrok wng kha: Joabni takhuk Asahel, Betlehemo tongnai Dodoni bwsla Elhanan.

²⁷Harodo tongnai Samot, Pelono tongnai Helej.

²⁸Tekoa-o tongnai Ikesni bwsla Ira, Anathoto tongnai Abiejer.

²⁹Husathisa Sibekai, Ahohisa Ilai.

³⁰Netophani Maharai, Netopha-o tongnai Banani bwsla Heled.

³¹Benjamin bosongni Gibea-o tongnai Ribaini bwsla Ithai, Pirathono tongnai Benaia.

³²Gas harung gana-o tongnai Hurai, Arbato tongnai Abiel.

³³Bahurumni Asmabet, Salbono tongnai Eliaba.

³⁴Gijonsa Hasem,[13] Hararo tongnai Sagini bwsla Jonathan.

³⁵Hararisa Sakharni bwsla Ahiam, Urni bwsla Eliphal.

³⁶Mekerasa Hepher, Pelono tongnai Ahia.

³⁷Karmelo tongnai Hesro, Ejbaini bwsla Narai.

³⁸Nathanni takhuk Joel, Hagrini bwsla Mibar,

³⁹Ammonsa Selek, Joabni aital tẃinai Jeruiani bwsla Birotni Naharai.

⁴⁰Ithri-o tongnai Ira bai Gareb,

⁴¹Hitisa Uria, Alaini bwsla Jabad.

⁴²Ruben bosongni Sijani bwsla Adina, bo khorok thamchi sengkrakrokni bokhorok.

⁴³Makani bwsla Hanan tei Mithni-o tongnai Josaphat,

⁴⁴Astera-o tongnai Ujia, Aroero tongnai Hothamni bwsajlasong Sama bai Jeiel,

⁴⁵Simrini bwsla Jediael, bini takhuk Tijisa Joha,

⁴⁶Mahaba-o tongnai Eliel tei Elnamni bwsarok Jeribai bai Josabia, Moabsa Ithma,

⁴⁷Mejoba-o tongnai Eliel, Obed tei Jasiel.