Read Kok Borok 1 BOSONG 13 Bible Online

1 BOSONG 13 - Kok Borok bible

1 BOSONG 13

¹Daud 1,000-rokni bokhorok tei 1,00-rokni bokhorok tei tẃiphangrok bai kók malai lai kha.

²Hakhe Daud bebak Israilrok kuthum laima-o hai hwnwi sa kha, “Norok abo chajak bai khe tei chini Subraiyung Kaitorni muchungma wng kha tẃitun rohorwi chini hani borokrok ochairok tei Lebirokno oro chwng bai pal kuthum phai bai thung hwnwi sa hornai.

³Hakhe chwng Kaitorni swmai bokhokno tubu lai anw, tamni hwn ba abo Solni jorani simi naijak ya klaiwi tong kha.”

⁴Bebak bororokno Daud samano khlaina gosi lai kha, tamni hwn ba jotono sói khlaithai hwn lai kha.

⁵Hakhe Daud Kiriatjearimni Jerusalemo Kaitorni swmai bokhokno tubunani bagwi bebak Israil bororokno Ijipni ha ari Sihorni Lebohamato thum kha.

⁶Hakhe Daud tei Israil Kaitorni swmai bokhokno tubunani bagwi Bala-o tháng lai kha, abono Kiriatjearim bo hwno, abo Judani amchoi-o klai-o. A bokhok Subraiyungni hwnwi hwnjago tamni hwn ba bo aro cherubrokni kwcharo khe tongo.

⁷Bórok Abinadabni nokni Kaitorni swmai bokhokno kariui musukni malkhung kwtal saka-o ton lai kha. Uja bai Ahio malkhungno béng lai kha.

⁸Daud tei bebak borok Kaitorni bwskango tongthogwi rwchabwi budukni tammungrok tei totro kotorrok, kham tamwi mwsa lai kha.

⁹Ulo bórok Chidonni khampar jora sók phai phuru musuk yakung uslu-ui klaina nai khe Uja swmai bokhokno yak bai rom kha.

¹⁰Hakhe Kaitor Ujano belai jolijak kha tei bo bokhokno tangmani bagwi bono buthar kha. Bo aro Kaitorni bwskangono thwi kha.

¹¹A thaino Peres-uja[14] hwnjago, Subraiyung Ujano sátokmani bagwi Daud jolijak kha.

¹²A salo Daud Kaitorno kirijagwi hai hwnwi sa kha, “Bahai khe ang Kaitorni swmai bokhokno malkhungo tlangwi man sinai?”

¹³Hakhe Daud swmai bokhokno bini nok Jerusalemo tlang li ya, tamo khe bo abono Gitisa Obed-Idomni nogo se klang si-o.

¹⁴Kaitorni swmai bokhok Obed-Idomni nogo taltham tong kha tei Subraiyung Obed-Idomni núkhung tei bebak bini tong kwrwino hamari rw kha.