Read Kok Borok 1 BOSONG 14 Bible Online

1 BOSONG 14 - Kok Borok bible

1 BOSONG 14

¹Turni habugra Hiram tẃitunrokno bini nok tangnani bagwi Sidar buphangrok, holongni samung tangnairok tei mistrirok rohor kha.

²Hakhe Subraiyung bono Israilni habugra snam kha hwnwi Daud saui man kha tei bini bororokni bagwi bini hano chasa rw kha.

³Aphuru Jerusalemo Daud teibo kwbángma bwrwi bai káijak kha tei kwbángma sajwk-sajlarok man kha.

⁴Bo Jerusalemo manmani bwsarok wng kha: Samua, Sobab, Nathan, Solomon,

⁵Ibar, Elisua, Elpelet,

⁶Noga, Nepheg, Japhia,

⁷Elisama, Biliada tei Eliphelet.

⁸Daud Israilni habugra wng kha hwnwi Philistiasarok khna khe bebak bórokni sengkrakrok Daudno naitugwi tháng lai kha; Daud abono khna khe bórok bai nang lainani nongkhorwi tháng kha.

⁹Philistiasarok Rephaim harungo phaiwi choprok lai phai kha.

¹⁰Daud Kaitorno, “Ang Philistiasarokno choproknai de? Nwng bórokno ani yago yapharnai de?” hwnwi sẃng kha. Subraiyung bono hai hwnwi sa kha, “Tháng di, ang bórokno nini yago yapharnai.”

¹¹Hakhe Daud Bal Perajimo[15] thángwi bórokno aro mechen kha. Daud hai hwnwi sa kha, “Kaitor ani yak tẃi khe arirokno tẃijlang twi tortwi khe kotor bai khe mechen kha.” Aboni bagwi a thaino Bal Perajim hwno.

¹²Philistiasarok bórokni mwtairok yakarwi klang bai kha, hakhe Daud abórokno sógwi pái di hwnwi dagi kha.

¹³Philistiasarok tei uáisa harungo phai laiwi sekpro lai khua.

¹⁴Daud Kaitorno tei uáisa sẃng phi khe, Kaitor bono hai hwnwi sa kha, “Nwng bórok bai nang laina bagwi rwktharwi ta tháng di; bórokno gerebwi thángwi tei babaisa bwkhakni balsam buphang tẃi khe se choprok di.”

¹⁵Nwng buphang saka-o him laima yapri sari khna khe choprok di, tamni hwn ba Kaitor nini slái swkang Philistiasarokni sengkrakrokno mechennani bagwi tháng kha.

¹⁶Hakhe Daud Kaitor dagimani hai kheno khlai kha, hakhe bórokno Gibeoni simi Gejer jora rwkhlaiwi rohor bai kha.

¹⁷Daudni mung pírjak kha tei Subraiyung bebak dopharokni bwkha-o Daudno kirima hap rw kha.