Read Kok Borok 1 BOSONG 15 Bible Online

1 BOSONG 15 - Kok Borok bible

1 BOSONG 15

¹Daud bini sakni bagwi Daudni kamiyungo nok khungsa tang kha. Bo Kaitorni swmai bokhokni bagwi kaisa thai snamwi kaisa ríni nok swngwi rw kha.

²Hakhe Daud hai hwnwi sa kha, “Lebirok simi se Kaitorni swmai bokhokno ma tẃi sinai, tamni hwn ba Subraiyung bórokno simi se abono tẃinani tei bono monnani bagwi chong kha.”

³Hakhe Daud Israilni Jerusalemo bo snammani thai-o Kaitorni swmai bokhokno tubunani bagwi bebak borokno thum kha.

⁴Tei Daud Aronni bwsarok tei Lebirokno bo buthup khlai kha.

⁵Kohat bosongni Uriel bokhorok bai khe khorok 120 borok phai kha.

⁶Merari bosongni Asaiano bokhorok songwi khorok 220 takhukrok.

⁷Gersom bosongni Joelno bokhorok songwi khorok 130 takhukrok.

⁸Elijaphan bosongni Semaiano bokhorok songwi khorok 200 bini takhuksong.

⁹Hebron bosongni Eliel bokhorok khorok 80 bini takhukrok.

¹⁰Ujiel bosongni Aminadab bokhorok khorok 112 bini takhukrok.

¹¹Hakhe Daud ochai Sadok bai Abiathar tei khorokdok Lebirok: Uriel, Asaia, Joel, Semaia, Eliel tei Aminadabno ring kha.

¹²Bo Lebirokno hai hwnwi sa kha, “Hakhe norok ang snammani thai-o Subraiyung Israilni Kaitorni swmai bokhokno tubu-ui manna tẃi khe norok Lebi bosongni bokhorokrok, norok sakno tei norokni takhukrokno kwthar khlai bai di.

¹³Tamni hwn ba swkango norok tẃi thani kwrwi tei khlaina tongma tẃi chwng khlai yani bagwi Subraiyung Kaitor chwngno sátok kha.”

¹⁴Hakhe ochairok tei Lebirok Subraiyung Israilni Kaitorni swmai bokhokno tubunani bagwi sak sakno kwthar khlai bai kha.

¹⁵Musini khúk tẃi Subraiyung dagimani hai khe Lebirok balphung bai bórokni bangora-o khe Kaitorni swmai bokhokno tẃi lai kha.

¹⁶Daud Lebini bokhorokno bórokni takhukrokno tongthogwi rwchapnani, khamrok tei budukni tammungrok tamnani bagwi chong di hwnwi dagi kha.

¹⁷Hakhe Lebirok Joelni bwsla Heman tei bini takhukrok Berekiani bwsla Asap, Merarini bwsarok, bórokni takhukrok, Kusaiani bwsla Ethan, bórokno rwchapnai chong lai kha.

¹⁸Tei bórokno chubanairok khe bórokni takhukrok Sakaria, Jajiel, Semiramot, Jehiel, Unni, Eliab, Benaia, Maseia, Matithia, Eliphelehu tei Mikneia tei duglam mwrwknairok Obed-Idom bai Jeiel.

¹⁹Rwchapnairok: Heman, Asap tei Ethan; bórok pitolni cheuang ma pung rwnai,

²⁰Sakaria, Ajiel, Semiramot, Jehiel, Unni, Eliab, Maseia bai Benaia: Bórok khe budukni tammung ma tamnai.

²¹Phiya Matithia, Eliphelehu, Mikneia, Obed-Idom, Jeiel tei Ajajia khe kubun tammung ma tamnai.

²²Chenania khe Lebirokni rwchapmung tẃithernai bokhorok, bo abo tẃirokno mano.

²³Berekia bai Elkana khe swmai bokhokni duglam mwrwknai.

²⁴Sebania, Josaphat, Nethanel, Amasai, Sakaria, Benaia tei Eliaser ochairok Kaitorni swmai bokhokni bwskango totro kotormano ma supnai. Obed-Idom bai Jehia bo swmai bokhokni duglam mwrwknai.

²⁵Hakhe Daud tei Israilni okra chakrarok tei sengkrak bokhorokrok tongthogwi Subraiyungni swmai bokhokno tlangna bagwi Obed-Idomni nogo tháng lai kha.

²⁶Kaitor swmai bokhok tẃinai Lebirokno chuba thung hwnwi bórok musuk maksni tei mera maksni ratharwi yaphar lai kha.

²⁷Daud rí kaham ma kanjak, swmai bokhok tẃinai Lebirok, rwchapnairok, rwchapmung tẃithernai Chenania khe bokhorok, Daud kamchwlwi lolang ephod chumjak.

²⁸Hakhe bebak Israil Subraiyungni swmai bokhokno chirik laiwi, bokorong sup laiwi, totro khorang bai cheuang bai tei budukni tammungrok bai khe tam laiwi tubu lai kha.

²⁹Subraiyungni swmai bokhok Daudni kamiyungo sók phai khe Solni bwsajwk Mikal tailam tẃi naikhlaiwi nai ba habugra tongthogwi mwsama nuk khlai kha, hakhe bihik bo bini bwkha-o lachima man kha.