Read Kok Borok 1 BOSONG 16 Bible Online

1 BOSONG 16 - Kok Borok bible

1 BOSONG 16

¹Bórok Kaitorni swmai bokhokno tubu kha tei Daud snammani jidolo rí nok bisingo ton lai kha. Tei bórok Kaitorni bwskango sógwi yapharmungrok yaphar lai kha.

²Hakhe Daud sógwi yapharmungrok yaphar baiwi pái khe Subraiyungni mung bai bororokno hamari rw kha.

³Teibo bebak Israil borok chwla bwrwirokno chámung auan, muihan bophon[16] tei angur bwthái kwranni auang bak kha.

⁴Daud baksa Lebirokno Israilni Kaitorno khulum phuru Subraiyungni swmai bokhok bwskango samung khlainani, bono hambai rwnani tei lobnani bagwi chong kha.

⁵Asap khe bokhorok, Sakaria khe bono chubanai. Jeiel, Semiramot, Jihiel, Matithia, Eliab, Benaia, Obed-Idom tei Jehiel bórok khe budukni tammungrok ma tamnai, Asap khe cheuang khorang ma khlainai.

⁶Tei Ochai Benaia bai Jahasiel khe Kaitorni swmai bokhok bwskango totro thak yaui ma supnai.

⁷Hakhe Daud a salo swkang Asap tei bini takhukrokno Subraiyungno lobwi rwchapnani chong kha.

⁸Subraiyungno hambai rw di, bini mungno ring di; bororokni thani bini samungno saui man rw di!

⁹Bini bagwi lobwi rwchap di; bini bebak kwmamsingcha samungno sa di!

¹⁰Bini mung kwtharno chẃngsacha khlai di, bono khulumnairok tongthok di!

¹¹Subraiyung tei bini phanno rutuk di; thak ya khe bo bai tongna rutuk di.

¹²Bo kwmamsingcha samung tangmano muitu khlaiwi nai di; kwmamsingcha khe bo buj thummano nai di.

¹³Bini seleng Abrahamni bosongrok, ani chongjak Jakobani bwsarok!

¹⁴Bo wng kha Subraiyung chini Kaitor; bebak hano bo jera na-o.

¹⁵Bo mol brúm bini kók khlaimano pogwi tháng ya, bo samani kók piri kusungsai kwrwngwi tongo.

¹⁶Bo Abraham bai kók kha laimani, Isakno swmai tangmani,

¹⁷bo Jakob bai kók kha laimani, abo Israilni thani mol brúmni bagwino tongnai.

¹⁸Bo hai hwnwi sa kha, “Ang nono Kanan hano rwnai, abo nini manthaino wngnai.”

¹⁹Bórok borok báng ya wngwi tong phuru, aro buini hani bororok hai wng kha.

²⁰Bórok dopha tei kaisa dopha-o ma kiting bai kha, kaisa hani tei kaisa ha-o;

²¹phiya Kaitor bórokno kebo bai kusupjak rw li ya; bórokno kati rwnani habugrarokno kul kha.

²²Bo hai hwnwi sa kha, “Ani chongjakno ta tang di, ani diyarino hamya ta khlai di!”

²³Bebak ha Subraiyungni bagwi rwchap di, bebak bororokno sal brúm mwthangmano sakhlai di.

²⁴Bini chẃngsacha dopharokno sakhlai di; bini kwmamsingcha samung bebak bororokni thani!

²⁵Subraiyung wng kha kotor tei kuchuk khe lobjakthai; bebak mwtairokni sláibo bórom khlaijakthai.

²⁶Tamni hwn ba bebak bororokni mwtairok takjak máng se; tamni hwn ba Subraiyung chuknokharok snam kha.

²⁷Bórom bai bugrani mwkhang bini bwskango; phan bai tongthokma bini thani.

²⁸Subraiyungno lob di, joto ha sakani bororok, bini chẃngsacha tei phanni bagwi lob di.

²⁹Subraiyungni chẃngsacha mungni bagwi lob di, yapharmung tubu-ui bini bwskango phai di; sak kwthar khe Subraiyungno khulum di.

³⁰Bebak ha bini bwskango kwlwi di; swngchar thir khe bachajak, abono norwi man ya.

³¹Chuknoha bai ha tongthok di, Subraiyung se bugra hwnwi dopharokno sa di.

³²Twijlang tei bebak aro bisingo tongnairok kutuk di, panthor bai tei bebak aro tongnai tongthok di.

³³Hakhe bolongni bebak buphangrok Subraiyungni bwskango tongthogwi rwchapnai; tamni hwn ba bo swngcharno jera nanani phai-o.

³⁴Subraiyungno hambai rw di, tamni hwn ba bo belai kaham; bini hamjakma mol brúm brúmno tongo.

³⁵Ahwnwibo sa di, “Chwngno phiyók ja di, o Kaitor chini mwthangnai; hakhe nini mung kwtharno hambai rwui manna tẃi tei lobwi chẃngsacha khlaiwi manna tẃi chwngno thumwi dopharokni yakni mwthang di,

³⁶Israilni Kaitor Subraiyung lobjak thung! Mol brúm brúm bono lob di!” Hakhe bebak bororok “Amen” hwn di tei Subraiyungno lob di.

³⁷Hakhe Daud Asap bai bini takhukrokno Subraiyungni swmai bokhok bwskango thak ya khlaiwi sal brúm samung khlaina bagwi aro klang kha.

³⁸Tei Obed-Idom bai khorok 68 takhukrok bórokno ma chubanai, Jeduthunni bwsla Obed-Idom bai Hosa khe duglam mwrwknairok.

³⁹Ochai Sadok tei bini takhuk ochairok Gibeono Subraiyungno khulumma jidolo barja klangjak kha.

⁴⁰Subraiyung Israilno dagiui kerongo bebak swijak tongmani hai khe bórok sal brúm phung bai sarik bai háyá-o sókmung sógwi yapharmung ma yapharnai.

⁴¹Bórok bai pal Heman tei Jeduthun tei kubunrok Subraiyungno lobwi rwchapnani bagwi chongjak, tamni hwn ba bini sói hamjakma mol brúm brúm.

⁴²Heman bai Jeduthun lobwi rwchap lai phuru khe totrorok, cheuangrok tei kubun tamjaknairokno ma tamo. Jeduthunni bwsarok khe duglam mwrwkna chongjak kha.

⁴³Hakhe joto bororok sakni nogo kiphilwi tháng bai kha; tei Daud bini núkhungno hamari rwnani nogo tháng kha.