Read Kok Borok 1 BOSONG 18 Bible Online

1 BOSONG 18 - Kok Borok bible

1 BOSONG 18

¹Aboni ulo Daud Philistiasarok bai choba nang laiwi mechen kha. Bo Philistiasarokni yakni Gat tei gana-ginini kamirokno segwi na kha.

²Bo Moabroknobo mechen kha, bórok Daudni seleng ma khati kha tei bono teks ma rw kha.

³Daud Hamat ganani Jobani habugra Hadadejerno mechen kha, tamni hwn ba bo sakani Uphratisno segwi nanani naiwi tongo.

⁴Daud bini aroni kai 1,000 korai malkhungrok, khorok 7000 korai kasanairok, khorok 20,000 yakung bai himnai sengkrakrokno segwi na kha. Daud kaisara malkhungni bagwi nangmani korai khaui narwgwi rw kha, phiya maksarano khe yakarwi rw kha.

⁵Damaskoso tong bainai Aramni bororok Hadadejerni habugra Jobano chubana phai khe Daud khorok 22,000 bororokno buthar kha.

⁶Hakhe Daud Aramrok tongma-o sengkrakrokni batham khaui rw kha, Aramsarok bini seleng ma wng bai kha tei teks ma rw kha. Subraiyung Daudno bebak thángma’-ono bono kwplai khlai kha.

⁷Hadadejerni selengrok tubumani phuino Daud segwi naui Jerusalemo tubu kha.

⁸Daud teibo kwbángma pitolrok Hadadejerni kamiyung Tibat tei Kunni tubu kha. (Solomon ulo abórokno gele rwui noktharni bagwi dangai, thongla tei manwirok snam kha.)

⁹Hamatni habugra Tou Hadadejerni bebak sengkrakrokno Daud mechen kha hwnwi khna khe,

¹⁰bo bini bwsla Hadoramno Hadadejerno mechenmani bagwi habugra Daudno bwkha kaham tei hambai rwnani rohor kha, tamni hwn ba Hadadejer Tou bai kwbángma choba nang lai kha. Bo kwbángma rangchakni, rukphaini tei pitolni manwirok rohor kha.

¹¹Abórokno habugra Daud Subraiyungni thani yaphar kha; tei abo bai baksa kubun dopha Idom, Moab, Ammon, Philistia tei Amaleksarokni rangchak tei rukphairok namanobo yaphar kha.

¹²Jeruiani bwsla Abisai Idomsarokno sóm harungo mechenwi khorok 18,000 borokno buthar kha.

¹³Bo Idomo sengkrakrokni batham khaui rw kha tei bebak Idomsarok Daudni seleng wng bai kha. Subraiyung Daudno bo thángma’-ono kwplai khlai kha.

¹⁴Hakhe Daud bebak Israilo bugra chá kha tei bo bebak bororokno baksa khe, sói khe buj khlai kha.

¹⁵Jeruiani bwsla Joab khe sengkrak bokhorok; tei Ahiludni bwsla Jihosapat khe swiwi narwknai;

¹⁶Ahitubni bwsla Sadok bai Abiatharni bwsla Ahimelek khe ochairok; Seraia khe tangphang;

¹⁷Jehoiadani bwsla Benaia khe Daudno mwrwknai Keritsa tei Pelethisarokni bokhorok; Daudni bwsarok khe bini samungo kotor tangphang okrarok.