Read Kok Borok 1 BOSONG 19 Bible Online

1 BOSONG 19 - Kok Borok bible

1 BOSONG 19

¹Aboni kisa ulo Ammonsarokni habugra Nahas thwi khe bini bwsla Hanun habugra chá kha.

²Habugra Daud hai hwnwi sa kha, “Bini bupha ano bórom khlaimani hai angbo Hanunno bórom khlainai.” Hakhe Daud khairokma sanani bini thani tẃitun rohor kha. Daudni selengrok Ammonsarokni ha-o Hanunni thani bono khá khamma sanani phai lai kha.

³Phiya ba Ammonsarokni tẃiphangrok Hanunno hai hwnwi sa kha, “Nini nwphano bórom khlaimani bai nono khá kaham sanani phai-o hwnwi de nwng ma chong? Abo hai ya, bini selengrok phaimani wng kha nini hano kaham khe naichomnani tei ulo nono mechennani bagwi se phai-o.”

⁴Hakhe Hanun Daudni selengrokno romwi tlangwi bórokni khochai silwi, bórokni rírok khichlang jora khe raui kiphil rwui rohor lai kha.

⁵Tei bórok tháng kha. Daud bórokni kókno khna khe bo borok rohorwi bórokni khochairok lok phi ya sak Jeriko-o tongnani sa hor kha.

⁶Ammonsarok sakno Daudni thani cha ya khlai kha hwnwi saui man khe, Hanun bai Ammonsa 1,000 talen rukphai belep rohorwi korai malkhungrok bai korai kasanai sengkrakrok Mesopotamia, Aram-maka tei Jobani nahornani bagwi rohor kha.

⁷Bórok khung thamchinwisai korai malkhungrok rohor kha tei Makani habugra bini sengkrakrok bai khe phai laiwi Medeba gana-o batham kha lai kha. Ammonsarok bo bórokni kamiyungni nongkhorwi phaiwi chobani bagwi tiyar wng lai kha.

⁸Daud abono khna khe bo Joab tei bebak sengkrakrokno rohor kha.

⁹Ammonsarok nongkhorwi phaiwi kamiyungni duglamo bacha lai kha, bono chubanani phai bainai habugrarok khe kami hapharo tiyar wng lai kha.

¹⁰Joab bwskang bai uklogo arirok bai kasujak nuk khe, bo Israilni kaham kuk sengkrakrokno saiwi Aramsarokni phaising mwkhang khe bacha rwui rw kha.

¹¹Tei sengkrak tongnairokno khe bini takhuk Abisaino bokhorok chongwi rw kha, bo bórokno Ammonsarokni bwkhak naharwi bacha rw kha.

¹²Joab bono hai hwnwi sa kha, “Aramsarok ano mechenmani nuk khe nwng ano chuba phai di tei Ammonsarok nono mechen khe ang nono chuba phainai.

¹³Phan tisa di, kiri ya wng di, chini bororok tei chini Kaitorni kamiyungni bagwi choba nang lai anw. Subraiyung bini chajakmani tẃi’-no khlai thung.”

¹⁴Hakhe Joab tei bini bororok Aramsarok bai choba nang lainani bagwi gana-o tháng lai kha tei bórok ma khár bai kha.

¹⁵Ammonsarok Aramrokno khármani nuk khe bórokbo haino Abisaini bwskangni khachigwi tháng baiwi kamiyungo hap lai kha. Hakhe Joab Jerusalemo kiphilwi tháng kha.

¹⁶Phiya ba Aramsarok bórok Israilrok bai mechenjak kha hwnwi saui man khe bórok tẃitun rohorwi Uphratisni Aramsarokno Jobani habugra Hadadejerni sengkrak bokhorok Sophakno tẃiphang songwi rw lai kha.

¹⁷Daud abono khna khe, bo bebak Israilni sengkrakrokno thumwi Jordan bárwi, Aramrokni bwkhak mwkhang khe bacha lai kha. Bórok Aramrokni bwkhak mwkhang khe bacha lai kha. Bórok Aramrok bai choba nang lai kha.

¹⁸Aramrok Israilrokni bwskangni ma khár bai kha. Daud tei bini bororok Aramni korai malkhung kasanai khorok 7,000 rokno tei khorok 40,000 yakungni sengkrakrokno buthar lai kha. Bórok Aramni sengkrak bokhorok Sophakno buthar lai kha.

¹⁹Hadadejerni selengrok Israilrok bai bórok mechenjak kha hwnwi saui man khe tong kwchang tongna sa lai kha tei bini seleng wng lai kha. Hakhe Aramsarok Ammonsarokno tei chubana muchungjak li ya.