Read Kok Borok 1 BOSONG 21 Bible Online

1 BOSONG 21 - Kok Borok bible

1 BOSONG 21

¹Soitan Israilno kebengwi bacha kha, hakhe bo Daudni bwkha-o Israilno lekhanani bagwi chong kha.

²Hakhe Daud Joab bai sengkrak bokhorokrokno hai hwnwi dagi kha, “Tháng di, Birsebani simi Dan jora Israilrokno lekhaui nai di, bwswk borok báng ano sa phai di, ang sinani muchungo.”

³Phiya ba Joab hai hwnwi sa kha, “Subraiyung tabuk tongmani slái tei uái sara kwbáng rw thung! Bórok bebak nini selengrok máng ya de, ani bugra? Hakhe tamni nwng abo hai khlaiwi bebak Israilno ba majra phnagna nai?”

⁴Phiya ba habugrani kók Joab ma khna kha, hakhe Joab bebak Israil ha-o thángwi Jerusalemo kiphilwi phai kha.

⁵Joab Daudni thani choba nang laiwi mannai bebak bororokno lekhaui sa phai kha. Israilo khorok 1,100,000 tei Juda-o khorok 470,000 ká-o.

⁶Phiya ba Joab Lebi tei Benjaminrokno aro khop li ya, tamni hwn ba bo habugra dagimano chajak li ya.

⁷Abo hai khlaimani bagwi Kaitor chajak li ya, hakhe bo Israilno swprak kha.

⁸Daud Kaitorno hai hwnwi sa kha, “Ang abo hai samung tangwi sumsok kotorma khlai kha, tamo khe ang suri ja-o, nini selengni cha yano nakar ja si di, ang butua wngwi se abo hai khlaijak si-o.”

⁹Subraiyung Daudni diyari Gadno hai hwnwi sa kha,

¹⁰“Daudni thani thángwi saui di, ‘Subraiyung hai hwnwi sa-o, nono ang daltham yapharo, nwng dalsano saiwi na di, ang abo haino nono khlainai.’ ”

¹¹Hakhe Gad Daudni thani phaiwi bono hai hwnwi sa phai kha “Subraiyung hai hwnwi sa-o, ‘Nini muchungmano na di,

¹²nokha bisik tham asari, eba taltham jora nini kena arirokni bwskangni ma khárnai, eba khe Subraiyungni seng nini saka-o saltham klainai, nini ha-o bok rohornai tei bebak Israil amchoirogo Suari sokomornai,’ tabuk nwng chong di, ang Subraiyungno tamo thángwi sauinai?”

¹³Hakhe Daud Gadno hai hwnwi sa kha, “Ang belai dobo klai kha, Subraiyungni yago’-no klai thung, tamni hwn ba bini khairokma kwbángma, phiya ba ang bórokni yago ta klai thung.”

¹⁴Hakhe Subraiyung Israilni saka-o bok rohor khe khorok 70,000 borok thwi bai kha.

¹⁵Tei Kaitor khoroksa suarino Jerusalem sokomorna rohor kha, phiya ba bo Jerusalemno sokomorna nai phuru Subraiyung bini bwkha sláiwi suarino hai hwnwi sa kha, “Wng kha, bathak si di,” suari khoroksa Jebuso tongnai Araunani khamparo bachaui tongo.

¹⁶Daud mwkhang tisaui nai ba Subraiyungni Suarino ha bai chuknohani kwcharo bini yago seng tẃijak Jerusalemno sokomornani tiyar wngjak khe nuk kha. Hakhe Daud tei okrarok rí kichik kan laiwi khá khamma phunugui ha-o bokhorok bom lai kha.

¹⁷Daud Kaitorno hai hwnwi sa kha, “Ang se borok lekhana bagwi dagi bla, ang se samung cha ya khlaiwi sumsok khlai kha; o bororok tamo khlai kha ba? O Subraiyung, ani Kaitor, ang bai ani núkhungno se sátok di tei nini bororokni saka-o bok ta na thung.”

¹⁸Hakhe Subraiyungni suari Gadno Daudni thani thángwi Araunani khamparo Subraiyungni bagwi háyá kaisa snamnani bagwi dagi di hwnwi sa kha.

¹⁹Hakhe Daud Subraiyungni kók khnaui Gad samani hai khe khlai kha.

²⁰Arauna tei bini bwsarok khorokbrwi khe gom nagwi tong lai-o, bórok suarino nuk khe bini bwsarok huijak lai kha.

²¹Daud Araunani thani phai kha, Arauna Daudno nuk khe gom nagwi tongmani yakarwi thángwi mwkhang ha-o klaiwi khulum kha.

²²Daud bono hai hwnwi sa kha, “Ano nini khamparno phal di, ang nono rang rw anw, ang aro Subraiyungni bagwi bok klaimani hamna tẃi háyá kaisa tangnai.”

²³Hakhe Arauna Daudno hai hwnwi sa kha, “Na di, ani bugra nini muchung tẃi khlai di, nai di ang sógwi yapharna bagwi beresrok gom nakmani buphang tei yapharmungni bagwi gom ang nono bebak rw kha.”

²⁴Phiya ba habugra Daud Araunano hai hwnwi sa kha, “I’nhi, ang nono rang rw súgwi se paiwi nanai. Subraiyungni bagwi nini thani naui ahai’-no yaphar glak.”

²⁵Hakhe Daud Araunano khamparni bagwi 600 rangchakni rang rw kha.

²⁶Daud Subraiyungni bagwi aro háyá kaisa tisa kha tei sógwi yapharmung bai khakchangma yapharmung yapharwi Subraiyungno ring kha tei bo chuknohani háyá sakani sógwi yapharma hór bai sakhlai kha.

²⁷Hakhe Subraiyung suarino dagi khe bo bini sengno nor kha.

²⁸A jora-o Daudni surimano Subraiyung khna kha hwnwi saui man khe Araunani khamparni ha-o yapharmung yaphar kha.

²⁹Musi hasing panthoro Subraiyungni bagwi ríni nok snammani tei yapharmungrok yapharmani háyá a jora-o Gibeono’-no tong kho.

³⁰Phiya ba Daud khe Kaitorno khulumnani aro thángwi man ya kho, tamni hwn ba bo Subraiyungni suarini sengno kirijago.