Read Kok Borok 1 BOSONG 23 Bible Online

1 BOSONG 23 - Kok Borok bible

1 BOSONG 23

¹Daud belai chakra wng khe bo bini bwsla Solomonno Israilo habugra chá rw kha.

²Daud Israilni bebak tẃiphangrok tei ochairok, Lebirokno thum kha.

³Nokha bisi thamchi tei aboni kuchuk Lebirokno lekhaui nai kha, bebagwi khorok 38,000 wng kha.

⁴Daud khorok 24,000 rokno Subraiyungni nok tangnani barja rw kha tei khorok 6,000 rok khe tangphang okrarok tei jera nanairok,

⁵khorok 4,000 rok khe duglam mwrwknairok tei khorok 4,000 rok khe ang snammani tammungrokno tamwi Subraiyungno lobnani.

⁶Daud Lebirokno bórokni berem tẃi doltham khlai kha, Gersom, Kohat tei Merari.

⁷Gersomni bwsla khoroknwi tongo: Ladan tei Simei.

⁸Ladanni bwsla khoroktham: Jehiel okra, Jetham tei Joel.

⁹Bórok Ladan bosongni bokhorokrok. Simeini khoroktham bwslasong tongo: Selomot, Hajiel tei Haran.

¹⁰Tei Simeini bwsla khorokbrwi: Jahat, Jina, Jeus tei Beria.

¹¹Jahat khe okra tei Jisa khe kusu. Jeus bai Beriani khe aswk bwsa báng lai ya, hakhe bórok kaisa berem khlaijak kha.

¹²Kohatsani bwsla khorokbrwi: Amram, Ijar, Hebron tei Ujiel.

¹³Amramni bwsajlasong: Aron bai Musi. Aron khe kwthar manwirokno yapharnani bagwi bo tei bini bwsarok mol brúm Subraiyungni bwskango satrai sóknani tei bono mannani tei bini mung bai hamari rwnani chongjak kha.

¹⁴Phiya ba Kaitorni borok Musini bwsajlasong khe Lebi bosongo duljago.

¹⁵Musini khoroknwi bwsarok: Gersom bai Eliaser,

¹⁶Gersomni bwsarok: okrasa Sebuel.

¹⁷Eliaserni khoroksano bwsla: Rehabia tei Eliaserni bwsarok kwrwi, phiya ba Rehabiani kwbángma bwsarok tongo.

¹⁸Ijarni bwsa: Selomit okra.

¹⁹Hebronni bwsla khorokbrwi: Jeria okra, Amaria bini kusu, Jahasiel tei Jekamiam.

²⁰Ujielni khoroknwi bwsarok: Mika okra tei Isia kusu.

²¹Merarini khoroknwi bwsarok: Mahali bai Musi. Mahalini bwsa khoroknwi tongo: Eliasar bai Kis.

²²Eliasar khe bwsa man yaui’-no thwi kha, bwsajwksong simi se tongo, bórokni sandai Kisni bwsarok bórok bai káijak bai kha.

²³Musini bwsla khoroktham: Mahali, Eder tei Jeremot.

²⁴Omorokno Lebi bosongni berem tei núkhungrokni bororok, bórok bebaknono sakni mung bai mung swijak, bisik nwichini simi kuchuk jora khe Subraiyungni nogo samung ma khlainai.

²⁵Daud hai hwnwi sa kha, “Subraiyung, Israilni Kaitor bini bororokno khakchangma rw kha tei bo Jerusalemo mol brúm brúm tongnai.

²⁶Hakhe Lebirok Subraiyungni ríni nok tei khulum phuruni bagwi manwirokno tei nornani nang li ya.”

²⁷Daudni páithak samarokno rwksaui Lebirok nokha bisik nwichi ká khe Subraiyungni samungni bagwi mung tisajago.

²⁸Bórokni samung wng kha Subraiyungni noktharni samungo Aronni bwsarokno chubanani, nokrok mwrwknani tei aboni nok bisingrok tei kwthar manwirokno sap-sutra khe tongnani tei Kaitorni nogo nangmani samung tangnani:

²⁹Tei Kaitorni thani auan yapharmani barja, auan gungra yapharma, chuan kwrwi belep, hangjak tei olib thok bai buljak tei rwtanani bai sunani samung se.

³⁰Bórok sal brúm phung bai sarik bai hambai rwnani tei lobnani ma bachanai.

³¹Tei sabat salo Subraiyungni thani sógwi yapharjak phuru, tal kwtal tei kubun pandarok phuru khe nangmani tẃi khe Lebirok Subraiyungni samungni bagwi chongjak kha.

³²Bórok Subraiyungni ríni nok, nokthar, Subraiyungni nokni samungo bórokni takhuk Aronni bwsarokno chubanani bagwi chongjak kha.