Read Kok Borok 1 BOSONG 28 Bible Online

1 BOSONG 28 - Kok Borok bible

1 BOSONG 28

¹Habugra Daud Israilni bebak tẃiphangrokno bosongni tẃiphangrokno, habugrano monnai tang okrarokno, 1,000 -ni tei sarani sengkrak bokhorokrok, habugrani núkhungni manwi-khwnwi mwrwknairok, musukrok tei bini bwsarok tei noyungni tẃiphangrok, phan gwnang bororok tei sengkrakrokno Jerusalemo thum kha.

²Hakhe habugra Daud bachaui bórokno hai hwnwi sa kha, “Ani takhukrok tei ani bororok, ani kókno khna di, ang Subraiyungni swmai bokhokni bagwi nok khungsa tei chini Kaitorni yakung berajaknai tangnani muchungo, ang nok tangnani bagwi tiyar khlai bai kha.

³Phiya Kaitor ano sa kha, nwng ani mungwi nok tangwi man glak, tamni hwn ba nwng wng kha khoroksa sengkrak tei kwbángma thẃi kochok rw kha.”

⁴Hai phano Subraiyung Israilni Kaitor Israilo mol brúm brúm habugra chána bagwi ang bai ani bosongno chong kha, bo tẃiphangni bagwi Judani bosongno chong kha, aphani bwsarokni bisingo bebak Israil saka-o habugra chá rwna bagwi bo ano hamjak kha.

⁵Subraiyung ano bwsa kwbángma rw kha, bórokni bisingo Subraiyung Israilni saka-o habugra chánani bagwi ani sajla Solomonno chong kha.

⁶Subraiyung ano hai hwnwi sa kha, “Nini sajla Solomon se ani nok tangnai, ani sajla wngnani ang bono chong kha tei ang bini bupha wngnai.”

⁷Bo tabuk khlaiwi tongmani hai khe ani raidarokno tei dagimarokno kaham khe tẃiwi ton khe ang bini hano mol brúm brúm songchaui tonnai.

⁸Hakhe tabuk bebak Israilrokni bwskango Subraiyungni kuthum laima-o, chini Kaitorno khna rwui, ang norokno hai hwnwi tholo, “Subraiyung nini Kaitor dagimarokno kaham khe tẃi di; hakhe nwng ha kahammano man anw.”

⁹Solomonno bo hai hwnwi sa kha, “Nwng Solomon, ani sajla, nini nwphani Kaitorno sini di, bebak nini bwkha rwui tei muchungmani bai khe bono mon di, bo bebak chini uansukmarok tei chongmarokno saui mano. Nwng bono rutuk khe, nwng bai nukjaknai; phiya nwng bono yakar khe, nono mol brúmni bagwi khibiui rohornai.

¹⁰Tabuk nini bwkha-o chong di, bini nokthar tangnani bagwi Subraiyung nono chong kha; phan tisaui samung tang di.”

¹¹Hakhe Daud bini bwsla Solomonno nok tangnani bagwi bini chongmarokno rw kha, manwi-khwnwi tonjaknai nokrok, rang tonjaknai nokrok, aboni sakani khotolrok, bisingni nokrok, khairokma achukthayungrok.

¹²Tei Subraiyungni nok tangna bagwi tei abono kitingwi nokrok tei Kaitorni nokni rang tonjaknai nokrok, Kaitorno yapharjakmarokno tonnani nokrok bini bwkha-o tongmano rw kha;

¹³ochairok, Lebirok bahai khe bórokni samung ma tang bainai tei Subraiyungni nok bisingo bahai khe samung khlainai tei noktharni manwi-khwnwirokno bahai khe ma naithai bebakno rw kha.

¹⁴Manwi-khwnwirok snam phuru bwswk rangchak, rukphai rwthai abórokno saui rw kha.

¹⁵Rangchakni chatiphangni bagwi rangchak bwswk nang abórok saui rw kha. Rukphaini chatiphangni bagwi bwswk rukphai nang abono saui rw kha

¹⁶Kaitorno yapharmani songphangni bagwi rangchak tei rukphaini songphangni bagwi rukphai,

¹⁷yakheprok, dangairok, khurirok snamnai bagwi bwswk rangchak kwthwng nangnai, rangchakni tei rukphaini dangai snamnani bwswk rangchak bai rukphai nangno abórok saui rw kha.

¹⁸Satrai sókjakmani háyá tangnani bagwi bwswk rangchak kwthwng nangno tei Subraiyungni swmai bokhokno bwkrang bai kholobwi tongnai bwkrang gwnang cherubni bagwi, rangchakni malkhung snamnani bagwi bwswk nang saui rw kha.

¹⁹Daud hai hwnwi sa kha, “Abórokno bo bebak Subraiyungni yak tẃi khe srai-srai khlaiwi siui, chongjak tongmani hai khe samung tangna bagwi saui rw kha.”

²⁰Hakhe Daud bini sajla Solomonno hai hwnwi sa kha, “Phankrak khe, kiri ya khe, abono tang di; tabo ta kiri di, bwkhabo ta bái di; tamni hwn ba Subraiyung Kaitor ani Kaitor nini logi-o tongo. Subraiyungni nokni bagwi samung pái súk ya sak bo nono khibo khibi glak, yabo yakar glak.

²¹Ochairok tei Lebirok noktharni samungo tongna bagwi samung rwjak bai kha. Samung tangna kwrwngrok nono chubana muchung bai-o. Tei bebak tẃiphangrok, lukurok nini kók ma khna bainai.”