Read Kok Borok 1 BOSONG 29 Bible Online

1 BOSONG 29 - Kok Borok bible

1 BOSONG 29

¹Habugra Daud bebak borok kuthum laima panda-o hai hwnwi sakhlai kha, “Ani sajla Solomonno Kaitor chong kha, hai phano bo belai chwrai kho tei mungsa saui man ya kho. Samung khe kotorma, tamni hwn ba o noyung khe borokni bagwi ya, Subraiyung Kaitorni bagwi nokthar se.

²Hakhe ani Kaitorni nokni bagwi saktharwi kwbángma rangchak, rukphai, pitol, sor, buphang, aswkni kwchak-kwkhrang holong kahamrok tei morok marbelrok thum kha.

³Abórokno karwi noktharni bagwi ani sak choraini rangchak, rukphai Kaitorni noktharno hamjagwi rw kha.

⁴Ang 100 metrik ton kaham kuk rangchak tei 240 metrik ton rukphai kaham bai noktharni deual snamnani bagwi rw kha.

⁵Rangchakni samungno rangchak bai, rukphaini samungno rukphai bai samung tang kwrwngrokni yak tẃi bebak samung tangjaknai. Tini sabo sabo Subraiyungni thani muchungwi yapharna chong?”

⁶Hakhe bosongni bokhorokrok, habugrani khoroksai khorokrani tangphang okrarok bórok haino yaphar bai kha.

⁷Bórok Kaitorni nok tangna bagwi 190 ton rangchak, 380 ton rukphai, 675 ton pitol 3,750 ton sor yaphar lai kha.

⁸Holong kaham tongnai bororok khe noktharni rangkhógo rw bai kha, abo Gersono tongnai Lebi beremni Jehielni yago tongo.

⁹Bororok belai tongthok lai kha, tamni hwn ba bororok haino muchungwi Subraiyungno yaphar bai kha, habugra Daudbo belai tongthokjak kha.

¹⁰Abo baino habugra Daud bebak bororok kuthum laimani bwskango Subraiyungno lobwi hai hwnwi sa kha, “O Subraiyung chini chuchusong Israilni Kaitor, nwng mol brúm brúm lobjak thung.

¹¹O Subraiyung nwng se kotor, phan gwnang, chẃngsacha, kwplaisa tei naithokma, bebak chuknoha-o tei ha-o tongmarok nini máng se, o Subraiyung, bebakni slái nwng se bórijak thung.

¹²Bebak rang-rí tei bórom nini aroni se phai-o; nwng se bebakno mwthangwi tongo, nini yago se bebak phan bai manmung tongo. Nini yak bai se jotono kotor tei phan gwnang khlaiwi mano.

¹³Aboni bagwi tabuk, chwng nono hambai rw-o, chini Kaitor nini chẃngsacha mungno chwng lob ja-o.

¹⁴“Phiya ang ba sabo tei ani bororok ba tamo, sakni muchung tẃi yapharmung snam mannai? Tamni hwn ba bebak nini aroni se phai-o, tamo khe ninino se chwng nono yapharo.

¹⁵Bebak chini chuchusong hai khe chwngbo nini bwskango buini hani nograi hai se, o ha saka-o chwng sampili hai tei daktino kwmaui thángnai.

¹⁶O Subraiyung chini Kaitor, nini mung kwtharno bórom khlaiwi nini nokthar tangnani bagwi chwng abórok bebakno nini thani tubu lai-o; phiya abórok bebak nini máng se, nini aroni se phai-o.

¹⁷Ani Kaitor, ang saui mano, nwng chini bwkhano amjogwi nai-o, bwkha kahamrokno nwng hamjago. Ang bo bwkha kaham bai nono abórokno yaphar kha, tabuk nini oro kuthumnai bororok bwkha kaham bai yapharwi nini thani tongthok laiwi tongma ang nuk kha.

¹⁸O Subraiyung, Abraham, Isak tei Jakobni Kaitor, bororokni bwkha-o abo hai bórom khlaima mol brúm tong thung tei bórok nini thani sói khe tong mannani chuba di.

¹⁹Ani sajla Solomonno nini bebak raidarok, dagimarokno kaham khe bwkha bai tangwi manna tẃi ang tiyar khlaimani nini nokthar tangwi mannani chuba ja di.”

²⁰Hakhe Daud bebak kuthumnairokno hai hwnwi sa kha, “Subraiyung norokni Kaitorno lob di.” Bebak bororok bórokni chuchusongni Kaitor Subraiyungno lob lai kha tei bórokni bokhorok bom laiwi Subraiyungno tei habugrano khulum lai kha.

²¹Teini salo bórok Subraiyungni thani yapharmung yaphar lai kha musuk mak 1,000, mak 1,000 merarok, mak 1,000 mera bwsarok tei arakrok kwbángma bebak Israilni bagwi sókmung yaphar lai kha.

²²A salo bórok Subraiyungni bwskango chá laiwi nung laiwi belai tongthok lai kha. Bórok Daudni bwsla Solomonno tei uáisa habugra hwnwi sakhlai kha. Subraiyungni mung bai bórokni habugra hwnwi thok lu-ui phul lai kha tei Sadok khe ochai.

²³Hakhe Solomon bupha Daudni sak slái-o Subraiyungni achukthayungo habugra chá kha, bini bebak samungno cha kha; tei bebak Israilrok bini kók khna bai kha.

²⁴Bebak tẃiphangrok, phan gwnangrok tei habugra Daudni bwsajlasong habugra Solomonno bórom khlaina soi bai kha.

²⁵Subraiyung Solomonno bebak Israilni bwskango bórom gwnang khlai kha tei Israil ha-o bebak habugra chá lang bainairokni slái chẃngsacha khlai kuk kha.

²⁶Abo hai khe Jisaini bwsla Daud bebak Israil ha-o habugra chá lang kha.

²⁷Bo Israilo habugra chámani wng kha nokha bisik brwichi jora; bisi kaisni Hebrono tei nokha bisik tham chitham khe Jerusalemo.

²⁸Bo chakra wngwi thwi kha, belai rangbo tei bórombo gwnang, bini bwsla Solomon bini yakchu-o habugra chá kha.

²⁹Habugra Daudni aswk samungrok yaphangni simi páithak jora Samuel, Nathan tei Gad diyarirokni bosong bijabo swijak tongo.

³⁰Bo phankrak khe bugra cháui ton phuru-o bini sak, Israil saka-o tei bini harogo tongwi manjakmani kókrok bebakno swijak.